រាជធានីភ្នំពេញៈ គៀត សុវណ្ណាឡាង ជាតារាសម្ដែងល្បីឈ្មោះមួយរូប ក្រោយលេចមុខក្នុងខ្សែរឿងជាច្រើន បន្ទាប់មកតារាស្រស់សោភារូបនេះបានវិវឌ្ឍក្លាយជាតារាចម្រៀងដ៏ពីរោះ ដែលធ្វើឲ្យមហាជនភ្ញាក់ផ្អើល។ ប៉ុន្តែកាលពីថ្ងៃទី៣១ ខែឧសភា ឆ្នាំ២០១៤ ម្សិលមិញនេះ សិល្បការិនីសម្តីផ្អែមរូបនេះបានធ្វើឲ្យលោកគ្រូអ្នកគ្រូ និងសិស្សានុសិស្សភ្ញាក់ផ្អើលយ៉ាងខ្លាំង។
ភ្ញាក់ផ្អើលដោយសារតែតារាសម្តែង និងច្រៀងគៀត សុវណ្ណាឡាង បានលេចវត្តមានក្នុង កម្មវិធីប្រារព្ធខួបលើកទី៦៥ ទិវាកុមារអន្តរជាតិ ដែលប្រព្រឹត្តទៅនៅវិទ្យាល័យហ៊ុនសែន បូរី១០០ខ្នង ជាអធិបតី ក្នុងនាមជាអតីតសិស្សនៅសាលានេះ ហើយបានចូលរួមផ្តល់ជា សៀវភៅ ប៊ិក និងថវិកាមួយចំនួនដល់សិស្សទីទ័លក្រ៩៩នាក់ និងសិស្សកាយរឹទ្ធិ កាកបាទក្រហម ក្រោមក្រសែភ្នែកសិស្សជាងមួយពាន់នាក់ ហើយបន្ទាប់ពីចប់ពួកគេបាន សុំហត្ថលេខា និងថតរូបជាមួយយ៉ាងគគ្រឹកគគ្រេង។
តារាសាច់សខ្ចី គៀត សុវណ្ណាឡាង បានថ្លែងទាំងទឹកមុខញញឹមប្រិមប្រិយថា នាងមានការ រីករាយសប្បាយចិត្តឥតឧបមាដោយនៅពេលនេះបានមកចូលរួមក្នុងកម្មវិធីទិវាកុមារអន្តរជាតិ នៅសាលាដែលនាងធ្លាប់សិក្សារៀនសូត្រជាថ្មី និងបានជួបប្រាស្រ័យជាមួយលោកគ្រូ អ្នកគ្រូ និងប្អូនៗជំនាន់ក្រោយដោយទឹកមុខស្រស់បស់។
ជាពិសេសនាងមានបានចូលរួមជួយតាម លទ្ធភាពជាសៀវភៅ ប៊ិក និងថវិកា ដល់សិស្សជួបការលំបាកក្នុងការសិក្សាក្នុងថ្ងៃសិទ្ធិកុមារ និងយុវជនក្រុមកាយរឹទ្ធិ កាកបាទក្រហមថែមទៀតផង។ បើតាមអ្នកម្តាយកញ្ញា គៀត សុវណ្ណាឡាង បានឲ្យដឹងផងដែរថា កូនស្រីរបស់គាត់មានការ រីករាយសប្បាយចិត្តណាស់ដែលបានមកកាន់សាលាដែលនាងធ្លាប់សិក្សារៀនសូត្រ ហើយ សូម្បីតែរូបគាត់ក៏បានសិក្សារៀនសូត្រនៅវិទ្យាល័យហ៊ុនសែនបូរី១០០ខ្នងនេះដែរ។
មាតាដែលតាមស្អិតការពារកូនរូបនេះ បានបន្តថា នេះមិនមែនជាលើកទី១ទេដែលកូនស្រី ចូលរួមក្នុងសកម្មភាពសង្គម ជួយសិស្សក្រីក្រនោះ ដោយកន្លងមកសុវណ្ណាឡាង បានចូលរួម ក្នុងកម្មវិធីសប្បុរសធម៌ កម្មវិធីតន្ត្រីមនុស្សធម៌ សម្តែងច្រៀងរកថវិកាជួយអង្គការកុមារកំព្រា ជាញឹកញាប់។ “
យើងមិនត្រូវគិតតែលុយនោះទេ អ្វីដែលយើងអាចចូលរួមបាន ឬយើងមានលទ្ធភាព យើងត្រូវតែជួយដល់ជនក្រីក្រ កុមារកំព្រា ដែលជាសកម្មភាពសង្គមមួយនៅក្នុងវប្បធម៌នៃការចែករំលែក” គាត់បានបន្ថែម។ ទន្ទឹមនឹងនេះដែរ អតីតហ្វ្រេស៊ីហ្គើល និងជាតារាចម្រៀងក្នុងផលិតកម្ម Phleng Record កញ្ញា គៀត សុវណ្ណាឡាង បានផ្តាំផ្ញើផងដែរដល់ប្អូនៗឲ្យខិតខំសិក្សារៀនសូត្រ ឲ្យមានចំណេះដឹង និងសមត្ថភាពពិតប្រាកដដើម្បីឈានទៅបន្តការសិក្សានៅមហាវិទ្យាល័យជំនាញ និងចាប់អាជីពការងារលើកស្ទួយគ្រួសារ ក៏ដូចជាសង្គមជាតិយើងកាន់តែរីកចម្រើន មានវឌ្ឍនភាពទ្វេឡើងថែមទៀត។
គួរបញ្ជាក់ថា គៀត សុវណ្ណាឡាង ជាតារាសម្ដែងល្បីឈ្មោះមួយរូប ក្រោយលេចមុខក្នុងខ្សែរឿងជាច្រើន ពិសេសក្នុងរឿង«ទឹកចិត្តបងស្រី» ដែលជារឿងចុងក្រោយ។ ក្រោយមកនាងក៏បានក្លាយជាអ្នកចម្រៀងក្នុងផលិតកម្ម Phleng Record កាលពីដើមឆ្នាំ២០១២។
បទចម្រៀងមួយចំនួននៅក្នុងផលិតកម្មនេះទទួលបានការចាប់អារម្មណ៍ច្រើន ពីទស្សនិកជនជាពិសេសបទ «ល្ងង់ៗទើបមិនឈឺចាប់» «ចង់ធ្វើជាសង្សារគ្នាម្ដងទៀត» ជាដើម។ ថ្មីៗនេះកញ្ញាក៏ត្រៀមអាល់ប៊ុមថ្មីរបស់ខ្លួនជាច្រើនទៀតផងដែរ ដើម្បីបម្រើអារម្មណ៍ទស្សនិកជន៕