ខេត្តប៉ៃលិន៖ ជនសង្ស័យដែលជាកម្មករ រកស៊ីលីឈើគ្រញួង២នាក់ត្រួវបានកម្លាំងសមត្ថកិច្ចក្រុមចំរុះ (នគរបាលព្រំដែន និងទាហាន) ធ្វើការចាប់ឃាត់ខ្លួន ខណៈដែលពួកគេកំពុងធ្វើសកម្មភាព យកឈើប្រណីតចំនួន១៩ដុំ ប្រហែល១តោន ទៅលាក់ទុកនៅក្នុងស្រះទឹកក្បែរជើងភ្នំ បម្រុងនឹងយកទៅលក់បន្តឱ្យឈ្មួញម្នាក់ ឈ្មោះ វុធ អាយុប្រហែល៤០ឆ្នាំ មិនស្គាល់អាស័យដ្ឋានពិតប្រាកដ រស់នៅក្នុងខេត្តប៉ៃលិន ។
ហេតុការណ៏ចុះឃាត់ខ្លួននេះ បានកើតឡើងកាលពីវេលាម៉ោង ១១និង៤០នាទី ព្រឹក ថ្ងៃទី៣១ ខែឧសភា ឆ្នាំ២០១៤ ក្បែរជើងភ្នំខៀវ ស្ថិតក្នុងភូមិថ្មី សង្កាត់ទូលល្វា ក្រុងប៉ៃលិន ខេត្តប៉ៃលិន ។ ជនសង្ស័យដែលសមត្ថកិច្ចឃាត់ខ្លួនទី១ឈ្មោះ ខែម សិលា ភេទប្រុស អាយុ៣៥ឆ្នាំ មានស្រុកកំណើតភូមិចំការឫស្សី ឃុំព្រែកព្រះស្តេច ស្រុកស្វាយប៉ោ ខេត្តបាត់ដំបង ។
ទី២ឈ្មោះ វ៉ាន់ ពៅ ភេទប្រុស អាយុ២៥ឆ្នាំ មានស្រុកកំណើតភូមិឫស្សីក្រាំង ខេត្តពោធ៏សាត់ ។ ជនសង្ស័យទាំង២ទើបតែមកស៊ីឈ្នួលលីសែងឈើគ្រញូងបានប្រហែលជាង១អាទិត្យប៉ុណ្ណោះ ដោយស្នាក់នៅភូមិកើតហេតុខាងលើ ។ តាមការរៀបរាបពីជនសង្ស័យឈ្មោះ ខែម សិលា បានឲ្យដឹងថា៖ ដោយខ្លួនមានជីវភាពក្រីក្រ ពុំមានចំការធ្វើនិងគេ ព្រមទាំងចាញ់បោកឈ្មួញទិញឈើគ្រញួងម្នាក់ ឈ្មោះ វុធ អាយុប្រហែល៤០ឆ្នាំ មិនស្គាល់អាស័យដ្ឋានពិតប្រាកដ រស់នៅក្នុងខេត្តប៉ៃលិន ដោយឲ្យខ្លួនរកឈើលក់ឲ្យគេក្នុងតម្លៃ១គឺឡូ ១ម៉ឺនរៀល ទៅ២ម៉ឺនរៀលនោះ ទើបពូកគេបង្ខំចិត្តរកឈើគ្រញួងលក់ឲ្យពូកឈ្មួញ ។
ប្រភពបន្តថា៖ ពួកគេយកឈើមកលក់ខ្លួនឯង ដោយធ្វើដំណើរទៅរកក្នុងទឹកដីថៃ ៤-៥ថ្ងៃទើបមកម្តង មានគ្នាចំនួន១០នាក់ ហើយក្នុងម្នាក់រកបានពី២០-៣០គីឡូក្រាម ក្នុងមួយជើង , ក្នុងពេលកើតហេតុនេះទើបយកលាក់ក្នុងទឹកស្រះបានចំនួនពីរជើងប៉ុណ្ណោះ ។
លោកអនុសេនីយ៏ទោ វង្ស ដាន មេបញ្ជារការងការពារព្រំដែន លេខ៥៣៥ ចំណុះកងពល៥៣ បានមានប្រសាសន៏ឲ្យដឹងថា៖ ដោយមានបញ្ជារពី លោក ទី សុខា ប្រធានក្រុមការងារទំនាក់ទំនងព្រំដែនកម្ពុជាថៃ លោកបានរៀបចំកម្លាំងចំរុះមានទាហាន ប៉ូលីស ប៉េអិម សរុបចំនួន១៦នាក់ ចុះដល់កន្លែងជនសង្ស័យ ដែលកំពុងយកឈើ ចេញពីក្នុងស្រះ ក្បែរជើងភ្នំខៀវ សិ្ថតក្នុងភូមិថ្មី សង្កាត់ទូលល្វា ក្រុង-ខេត្តប៉ៃលិន ។
លោកមេបញ្ជារការងបន្តទៀតថា៖ ក្នុងពេលចុះប្រតិបត្តិការណ៏ កម្លាំងចំរុះឃាត់ខ្លួនបានកម្មករចំនួន២នាក់ ព្រមទាំងឈើគ្រញួងចំនួន១៩ដុំ ដែលលាក់ក្នុងស្រះ នោះ ។ បច្ចុប្បន្នជនសង្ស័យត្រួវបានឃាត់ខ្លួន នៅស្នាក់ការចំរុះ ក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ព្រមទាំងរៀបចំសំណុំរឿងបញ្ជូនទៅតុលាការ ដើម្បីចាត់ការតាមនិតិវិធី ៕
