ខេត្តកំពង់ធំៈ ប្រជាពលរដ្ឋ ស្ថិតនៅក្នុងខេត្តកំពង់ធំ ដែលរស់នៅតាមបណ្តោយផ្លូវជាតិលេខ ៦ កំពុងតែមមាញឹកក្នុងការប្រមូលផលសត្វចង្រិត ដោយមធ្យោបាយដាក់អំពូលភ្លើង ទាក់ទាញសត្វល្អិត មិនតែប៉ុណ្ណោះ មុខរបរដាក់ចង្រិត បានរកចំណូលច្រើនគួរសម។
ជារៀងរាល់ថ្ងៃ បងប្អូនប្រជាពលរដ្ឋ តែងតែដាក់អំពូលពណ៌ ដើម្បីចាប់សត្វចង្រិត ជាហូរហែរ ដែលអាចរកឃើញដោយងាយ គឺនៅតាមបណ្តាវាលស្រែ ក្បែរៗថ្នល់ជាតិ ខ្លះដាក់ចង្រិតជាលក្ខណៈគ្រួសារ ខ្លះដាក់ជា លក្ខណៈអជីវកម្ម ដែលមុខរបរដាក់ចង្រិតនេះ អាចប្រមូលផលបានក្នុងមួយយប់ពី៧០ម៉ឺន ទៅ៨០ម៉ឺនក្នុងមួយយប់ តាមតែអាកាសធាតុ ។
ទិដ្ឋភាពនៃភ្លើងដាក់សត្វចង្រិត បានបង្ហាញនូវភ្លើងពណ៌ ព្រោងព្រាត ប្រៀបបានទៅនឹងភ្លើងបុណ្យ ដែលជា ទិដ្ឋភាពគួរអោយគយគន់ តែកាពិតគឺជាភ្លើងធ្នាក់ចាប់សត្វល្អិតសោះ នៅពេលខ្លះបានធ្វើឲ្យភ្ញៀវជាតិ និង អន្តរជាតិឈប់រថយន្ត ដើម្បីថតរូបភាពទុកជាអនុស្សាវរីយ៍ ក្នុងទិដ្ឋភាពដោយកម្រនេះ។
លោក ពូ ម្នាក់រស់នៅភូមិ សានគរ ឃុំ សានគរ ស្រុកកំពង់ស្វាយ ខេត្តកំពង់ធំ បានឲ្យដឹងថា ការដាក់សត្វ ចង្រិតនេះ គឺជាពេលវេលាល្អនៅចុងខែ ឧសភា រហូតដល់ខែ៨ ភ្លៀងខ្លាំង ក្នុងមួយយប់អាចចាប់បានសត្វ ចង្រិតពី៣០គីឡូទៅ ១០០គីឡូក្រាមក្នុងអំពូល ២០ និងមានឈ្មួញបើករថយន្តប្រមូលទិញដល់ទីកន្លែង ទាល់ភ្លឺ និងលក់បានក្នុង១គីឡូក្រាម ១៣០០០រៀល ទៅ១៤០០០រៀល ។
តាមការឲ្យដឹងពីឈ្មួញដើរទិញសត្វចង្រិត បានឲ្យដឹងថា មុខរបរនេះ ពិតជាប្រមូលផលបានល្អ និងមិនមាន ផលប៉ះពាល់និងការងារផ្ទាល់ខ្លួន គឺគ្រាន់តែចំណាយពេលវេលានៅពេលយប់ ដាក់អំពូលនៅជិតៗផ្ទះក៏អាច រកចំណូលបានដែរ ឲ្យតែរពិសដៃ ផ្ទៃឆ្អែត ឈ្មួញបានបន្តថា ក្រោយពីប្រមូលទិញបានសត្វចង្រិតបានហើយ គឺត្រូវបានដឹកទៅលក់នៅប៉ោយប៉ែត នៅពេលខ្លះត្រូវបានដឹកយកទៅលក់នៅ ភ្នំពេញវិញ ។
សូមបញ្ជាក់ផងដែរថា សត្វចង្រិតឥឡូវមិនធម្មតា ត្រូវបានគេចាត់ទុកជាមុខម្ហូបពិសេស សម្រាប់ក្នុងពិធីក្លែម ជួបជុំក្នុងកម្មវិធីផ្សេងៗ ជាពិសេសនៅក្នុងបរិយាកាស ខារ៉ាអូខេ មុខម្ហូបនេះក្នុងមួយចានឈានដល់ ១០ដុល្លា ឯណោះ និងជាចំណងចំណូលចិត្តរបស់ អថិតិជនផងដែរ ។
ដោយឡែកអាជ្ញាធរខេត្តកំពង់ធំ ដែលមាន ឯកឧត្តម គង់ វិមាន អភិបាលរងខេត្តកំពង់ធំ បានជម្រុញនិងគាំទ្រ ឲ្យបងប្អូនប្រជាពលរដ្ឋ រកចំណូលដោយការសត្វចង្រិតនេះ ឲ្យបានច្រើន និងមានការប្រមូលទិញ ពីភាគីថៃរាប់រយតោន ដោយថ្មីមកនេះ សភាពាណិជ្ជកម្មថៃ បានចុះកិច្ចព្រមព្រៀង ជាមួយសភាពាណិជ្ជកម្ម កំពង់ធំ ដើម្បីនាំចេញចង្រិត ដោយភាគីថៃ និងសាងសង់ ឃ្លាំងក្លាសសេរ នៅស្រុកអន្លង់វែង ដើម្បីចាំ ប្រមូលទិញចង្រិត ពីខេត្តកំពង់ធំ សៀមរាប ឧត្តមានជ័យ ។
ដោយឡែកតាមប្រភពពត៌មាន បានឲ្យដឹងថា សត្វចង្រិតនេះ មិនគ្រាន់តែយកទៅធ្វើជាអាហារ សម្រាប់ពិសារក្នុងពិធីអ្វីមួយនោះទេ គឺត្រូវបានគេច្នៃប្រឌិតធ្វើជា អាហារកំប៉ុងនាំចេញទៅក្រៅប្រទេសទៀតផង ទើបបានជាទីផ្សាសត្វចង្រិតឡើងថ្លៃជាងសាច់ជ្រូក សាច់មាន់ក្នុងមួយគីឡូដល់ទៅ ២៥០០០រៀល ខណៈពេលសាច់ជ្រូកសាច់មាន់មានតំលៃត្រឹមតែ ១៦០០០ទៅ ១៧០០០រៀលប៉ុណ្ណោះ។