ខេត្តកំពតៈ ដើម្បីពង្រឹងការអនុវត្តកម្មវិធីនយោបាយនិងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល អោយមានប្រសិទ្ធភាព ទទួលបានលទ្ធផលផ្លែផ្កាពិតប្រាកដ និងឆ្លើយតបទៅនឹងបំណងប្រាថ្នារបស់ប្រជាពលរដ្ឋ។
រដ្ឋបាលខេត្តកំពត នៅព្រឹកថ្ងៃច័ន្ទ ៥រោចខែមាឃ ឆ្នាំរកានព្វស័ក ព.ស២៥៦១ត្រូវថ្ងៃទី០៥ខែកុម្ភៈឆ្នាំ២០១៨បានបើកកិច្ចប្រជុំបូកសរុបលទ្ធផល
ក្រុមការងារថ្នាក់ជាតិ ខេត្ត ចុះមូលដ្ឋានដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រ ចតុកោណដំណាក់កាលទី៣របស់រាជរដ្ឋាភិបាល។
កិច្ចប្រជុំនេះមានរយៈពេលពេញមួយព្រឹក ក្រោមអធិបតីភាព ឯកឧត្តមបណ្ឌិតទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួង ឧស្សាហកម្មនិងសិប្បកម្ម និងមានវត្តមានចូលរួម ពីសំណាក់ ឯកឧត្តម លោកជំទាវ សមាជិកក្រុមការងារថ្នាក់ជាតិ និងលោក-លោកស្រី ក្រុមការងារថ្នាក់ ខេត្ត ក្រុង ស្រុកផងដែរ។
ឯកឧត្តម ជាវ តាយ អភិបាល នៃគណៈអភិបាលខេត្ត បានធ្វើរបាយការណ៍រីកចម្រើននានារបស់រដ្ឋបាលខេត្តកំពតរយៈមួយឆ្នាំ ២០១៧កន្លងទៅគួរអោយមោទនៈ។ ពិសេសលើការងាររបស់ក្រុមការងារចុះមូលដ្ឋានថ្នាក់ជាតិ ខេត្ត និងក្រុង ស្រុក រយៈពេលមួយឆ្នាំ ២០១៧កន្លងទៅ នេះ មានចំនួន២០១លើក លើ៩៣ឃុំ សង្កាត់។ មានក្រុមការងារចូលរួមចំនួន ៣៥៩៥នាក់ និងមានប្រជាពលរដ្ឋចូលរួមចំនួន១៦.៦០០នាក់ ប្រមូលបានបញ្ហាសំណូមពរ ចំនួន៦២២ករណី។ ក្នុងនោះបានដោះស្រាយចំនួន ៣០៦ករណី កំពុងដោះស្រាយបានចំនួន១៧៦ករណី និងមិនទាន់ដោះស្រាយបានមានចំនួន១៤០ករណីគឺភាគច្រើន ជាសំណូមពរស្នើសុំសមិទ្ធផល ហេដ្ឋារចនាសម្ព័ន្ធដែលមានទំហំធំ។
កិច្ចប្រជុំក៏បានបន្តពិភាក្សា លើកយកនិងរកបទពិសោធន៍ល្អៗដើម្បីដាក់ទិសដៅបន្តការងារឆ្នាំ២០១៨អនុវត្តអោយបានកាន់តែមានប្រសិទ្ធភាពថែមទៀត។
មានប្រសាសន៍នាឱកាសនោះឯកឧត្តមបណ្ឌិតទេសរដ្ឋមន្ត្រីចម ប្រសិទ្ធ បានចាត់ទុក វេទិកាសាធារណៈ របស់រាជរដ្ឋាភិបាល នៅតែមានសារៈសំខាន់ ចាំបាច់បំផុតដដែល។ព្រោះថាតាមរយៈការបើកវេទិកាសាធារណៈនេះ គឺដើម្បីជាឱកាសសម្រាប់ក្រុម ការងារថ្នាក់ជាតិ ខេត្តនិងក្រុង ស្រុកក៏ដូចជារដ្ឋបាលខេត្តបានសហការគ្នា ចុះជាប់មូលដ្ឋាន ឃុំសង្កាត់ ជួបផ្ទាល់ជាមួយនឹង ប្រជាពលរដ្ឋ ដើម្បីក្ដាប់សភាពការណ៍ បញ្ហាប្រឈម និងកង្វល់ឬសំណូមពរនានារបស់ប្រជាពលរដ្ឋនៅតាមមូលដ្ឋាន ហើយរួមគ្នាដោះស្រាយដោយស្មារតីទទួលខុសត្រូវខ្ពស់។
ឯកឧត្តមបណ្ឌិតទេសរដ្ឋមន្ត្រី ក៏បានធ្វើការវាយតម្លៃខ្ពស់និងកោតសរសើរ ចំពោះលទ្ធផលក្រុមការងារ គ្រប់លំដាប់ថ្នាក់ ដែលបានខិតខំកន្លងមក និងបានសំណូមពរផ្ដាំផ្ញើអោយបន្តខិតខំជាប់ជាប្រចាំនិងទៀងទាត់រៀងរាល់ខែបន្ថែមទៀត។ ពិសេសការចុះដោះស្រាយមិនត្រូវតែចាំបាច់ពឹងផ្អែកតែលើជំនាញខ្សែបណ្ដោយ ឬខ្សែ ទទឹងឡើយ។ គឺការដោះស្រាយធ្វើយ៉ាងណាអោយមានប្រសិទ្ធភាព ទទួលបានលទ្ធផលផ្លែផ្កាពិតប្រាកដ និងឆ្លើយតបទៅនឹងបំណងប្រាថ្នារបស់ប្រជាពលរដ្ឋអោយអស់លទ្ធភាពជាក់ស្ដែង។ ពោលគឺកិច្ចការដែលទុក្ខលំបាក ប៉ះពាល់នឹងអារម្មណ៍ផ្លូវចិត្តនិងការងារមុខរបររបស់ប្រជាពលរដ្ឋផ្ទាល់តែម្ដង។
