កំពង់ធំ=ការដ្ឋានបូមខ្សាច់មួយកន្លែងកំពុងតែបូមខ្សាច់ខុសទីតាំងដែលធ្វើអោយប្រជាពលរដ្នមានប្រតិកម្មយ៉ាងខ្លាំងរហូតបំរុងធ្វើការបិតផ្លូវមិនអោយអាជីកម្មបូមខ្សាច់ទាំងនោះធ្វើសកម្មភាពដឹកជញ្ចូនខ្សាច់ចេញបានព្រោះតែកន្លងមកដីច្រាំងត្រូវបានបាក់ជាបន្ដបន្ទាប់រហូតមកដល់ពេលនេះត្រូវបានអាជីវកម្មដាក់ម៉ាស៊ីនបូមខ្សាច់ថែមទៀតធ្វើអោយមានការព្រួយបារម្ភរឹតតែខ្លាំងដែលធ្វើអោយបាកដីចំណីផ្លូវរបស់ពួកគេ។
តាមប្រភពពត័មានបានអោយដឹងថាក្នុងអាជ្ញាប័ណ្ណអនុញាតិអោយធ្វើការបូមខ្សាច់នៅចំនុច អន្លង់គរ ក្នុងភូមិឈើទាល ឃុំសំបូរស្រុកប្រាសាទសំបូរបែបជាអាជីវកម្មមកដាក់ទីតាំងនៅចំនុចអន្លង់ចារឹក ក្នុងភូមិកំពង់ឈើទាល ឃុំ សំបូរ ស្រុកប្រាសាទសំបូរទៅវិញធ្វើអោយខុសទីតាំងចំងាយ១គីឡូមែត្រពីទីតាំងដែលអាជ្ញាប័ណ្ណអនុញាតិ។
ចំណែកម្ចាស់ដែលជាថៅកែបូមខ្សាច់នោះមានឈ្មោះ ហ៊យ សាវត រស់នៅក្នុងភូមិ ព្រៃព្រាល (ខ)ឃុំត្រពាំងឬស្សី ស្រុកកំពង់ស្វាយខេត្តកំពង់ធំ បានឆ្លើយថា គាត់មិនបានស្គាល់ភូមិសាស្ដ្រទីតាំងទាំងនេះទេ អាជ្ញាធរស្រុក និងឃុំជាអ្នកអនុញាតិអោយដាក់ទីតាំងនេះ ហើយអាជ្ញាប័ណ្ណលោកមាមសុពលភាព២ឆ្នាំ គិតពីថ្ងៃទី១៨ ខែកុម្ភះឆ្នាំ២០១៦ ដល់ថ្ងៃទី១៨ខែកុម្ភះ ឆ្នាំ២០១៨ ហើយក្នុងផែនដីតំរូវអោយបូមតែ២ហិចតា១អាប៉ុណ្ណោះ ពលរដ្នថាការឆ្លើយរបៀបនេះគឺឆ្លើយយករួចខ្លួនហើយទំលាក់កំហុសមកលើអ្នកដ៏ទៃ។
លោក ខៀវប៉ាងអភិបាលស្រុកប្រាសាទសំបូរបានឆ្លើយថាចាំសួរទៅមេឃុំសិន ក្រោយពីលោកឆ្លើយចាំសួរមេឃុំ អ្នកសារពត័មានព្យាយាមទំនាក់ទំនងតាមទូស័ព្ទ៥ដងតែលោកអភិបាលស្រុកពុំលើកទូស័ព្ទទេប្រហែលជាដឹងថាខ្លួនមានការចូលរួមចំណែកខុសក៏មិនដឹងឬក៏មិនហ៊ានបកស្រាយជុំវិញបញ្ហានេះទេ។
នឹប ចន្ថា ប្រធានមន្ទីររ៉ែថាមពល បានបញ្ចាក់អោយដឹងថាការបូមខ្សាច់នេះមានអាជ្ញាប័ណ្ណពីក្រសួង ដោយមានការ ឯកភាពពីអាជ្ញាធរខេត្ត ភូមិ ឃុំ ស្រុក និងប្រជាពលរដ្ន ដោយសិក្សាពីផលប៉ះពាលក្នុងភូមិសាស្ដ្រ ក្នុងផែនទីរួចរាល់ហើយ ប្រជាពលរដ្នសួរថាហេតុអីមិនដឹងពីផលប៉ះពាល៕ប៊ុន រិទ្ធី
