ខេត្តកំពង់ធំ៖ អភិបាលខេត្តកំពង់ធំ លោក ងួន រតនៈ ជម្រុញមន្ត្រីជំនាញគ្រប់លំដាប់ថ្នាក់ ខិតខំបន្តដោះស្រាយបញ្ហាប្រឈម ទុក្ខកង្វល់ និងសំណូមពររបស់ប្រជាពលរដ្ឋឲ្យបានឆាប់រហ័ស។
ការជម្រុញរបស់ លោកអភិបាលខេត្តកំពង់ធំ បានធ្វើឡើងនៅក្នុងកិច្ចប្រជុំសាមញ្ញលើកទី៥៤ របស់ក្រុមប្រឹក្សាខេត្តកំពង់ធំ អាណត្តិទី៣ ក្រោមអធិបតីភាព លោក ឈុន ឈន់ ប្រធានក្រុមប្រឹក្សាខេត្តកំពង់ធំ និងលោក ងួន រតនៈ អភិបាលខេត្តកំពង់ធំ ដោយមានការអញ្ជើញចូលរួមពី សមាជិកក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាលសាលាខេត្ត អភិបាលក្រុង ស្រុក កងកម្លាំងប្រដាប់អាវុធទាំងបីប្រភេទ មន្ទីរ អង្គភាពជុំវិញខេត្ត នាយកទីចាត់ការ អង្គភាពចំណុះ សាលាខេត្ត និងមន្រ្តីពាក់ព័ន្ធ នាព្រឹកថ្ងៃទី០៧ ខែធ្នូ ឆ្នាំ២០២៣ នៅសាលប្រជុំសាលាខេត្តកំពង់ធំ។
នៅក្នុងកិច្ចប្រជុំនេះ មានរបៀបវារៈសំខាន់ៗ ចំនួន ០៤ ដែលត្រូវលើកយកមកពិភ្សា គឺ៖ ១- ពិនិត្យ និងអនុម័តកំណត់ហេតុនៃកិច្ចប្រជុំសាមញ្ញលើកទី ៥៣ របស់ក្រុមប្រឹក្សាខេត្ត ,២- ពិនិត្យ និងអនុម័តរបាយការណ៍ ស្តីពី វេទិកាផ្សព្វផ្សាយ និងពិគ្រោះយោបល់របស់ ក្រុមប្រឹក្សាខេត្តកំពង់ធំអាណត្តិទី៣ ឆ្នាំ២០២៣ ,៣- ពិនិត្យ និងអនុម័ត របាយការណ៍ប្រចាំខែ វិច្ឆិកា ឆ្នាំ២០២៣ របស់រដ្ឋបាលខេត្ត និង៤- បញ្ហាផ្សេងៗ។
នៅក្នុងឱកាសនោះ អភិបាលខេត្តកំពង់ធំ លោក ងួន រតនៈ បានមានប្រសាសន៍ ជម្រុញមន្ត្រីជំនាញ សហការជាមួយអាជ្ញាធរមូលដ្ឋានគ្រប់លំដាប់ថ្នាក់ ខិតខំបន្តដោះស្រាយបញ្ហាប្រឈម និងទុក្ខកង្វល់របស់ប្រជាពលរដ្ឋ ដែលបាននិងកំពុងជួបប្រទះនៅតាមមូលដ្ឋាន ជាពិសេស សំណួរ និងសំណូមពរដែលបានលើកឡើង នៅក្នុងកម្មវិធីវេទិការផ្សព្វផ្សាយ ពិគ្រោះយោបល់របស់ក្រុមប្រឹក្សាខេត្តកំពង់ធំ ដែលមិនទាន់បានឆ្លើយបំភ្លឺអស់ ក៏ដូចជាមិនទាន់បានដោះស្រាយចប់នៅឡើយ។
លោកអភិបាលខេត្តកំពង់ធំ បន្តជម្រុញមន្ត្រីជំនាញ ពន្លឿនក្នុងការដោះស្រាយបញ្ហានានា និងសំណូមពរជាច្រើនទៀត ត្រូវត្រួតពិនិត្យទៅលើលទ្ធភាពរបស់អាជ្ញាធរខេត្ត និងម្យ៉ាងទៀត ក្នុងនាមអាជ្ញាធរដែនដី ត្រូវចុះមើលអោយដល់មូលដ្ឋានរបស់ខ្លួន ក្នុងការដោះស្រាយបញ្ហាទំនាស់ ក៏ដូចជាការបង្ការទប់ស្កាត់ ការរំលោភយកចំណីផ្លូវ ប្រឡាយ លូ ក៏ដូចអាងស្តុបទឹក ដើម្បីរក្សាសណ្តាប់ធ្នាប់សារណៈឲ្យបានល្អប្រសើរ៕ s/b
