ខេត្តអាងយ៉ាង ប្រទេសវៀតណាម នៅក្នុងពិធីចុះហត្ថលេខា លើអនុស្សារណៈ នៃកិច្ចសហប្រតិបត្តិការ ស្ដីពីការអភិវឌ្ឍន៍ទីផ្សារ នៅច្រកទ្វារព្រំដែន អន្តរជាតិភ្នំដិន រវាងសភាពាណិជ្ជកម្មមណ្ឌល ខេត្តតាកែវ កំពត ជាមួយក្រុមហ៊ុនរៀលខូ ខេមបូឌា អិលធីឌី នៅសាលាខេត្តតាកែវ ។ តំណាងសភាពាណិជ្ជកម្មខេត្តទាំង៣ បានថ្លែងឲ្យដឹងថា បច្ចុប្បន្ន នេះ កន្លែងទីតាំងសាងសង់ផ្សារអន្តរជាតិ ដែលស្ថិតនៅឃុំភ្នំដិន ស្រុកគិរីវង់ ជាប់ព្រំដែនអន្តរជាតិភ្នំដិន កំពុងតែចាក់ដីបំពេញ ហើយក្នុងរយៈពេលប៉ុន្មាន៥ទៅ៦ខែ ខាងមុខនេះ ដំណើរការសាងសង់ផ្សារអន្តរជាតិមួយ នឹងចាប់ផ្ដើមសាងសង់ លើផ្ទៃដីប្រមាណ១២ហិកតា ដោយការវិនិយោគជំហានទី១ ក្នុងទំហំ ទឹកប្រាក់ចំនួន៧លានដុល្លារ ។
មន្ត្រីសភាពាណិជ្ជកម្មខាងលើ បានបន្តថា ផ្សារនេះគឺជាការវិនិយោគរួមគ្នា រវាងភាគីកម្ពុជា និងក្រុមហ៊ុនរៀលខូ ខេមបូឌា អិលធីឌី របស់សហរដ្ឋអាម៉េរិក ហើយពេលដែលផ្សារនេះ ចេញជារូបរាង វានឹងក្លាយជាកន្លែងផ្ទុកទំនិញ ឆ្លងកាត់ព្រំដែន រវាងប្រទេសកម្ពុជា និងវៀតណាម ហើយក៏ជាផ្សារសម្រាប់ឲ្យអតិថិជន ទាំងខ្មែរនិងវៀតណាម ចូលទិញទំនិញក្នុងផ្សារនេះ ច្រើនផងដែរ ព្រោះផ្សារនេះ គឺជាផ្សារអន្តរជាតិមួយដែលរួចពន្ធ។
ក្នុងពិធីចុះហត្ថលេខា លើអនុស្សារណៈគ្នា រវាងក្រុមហ៊ុនអាម៉េរិក និងសភាពាណិជ្ជកម្ម ខេត្តតាកែវ កំពត និងកែប លោក ឡាយ វណ្ណៈ អភិបាលខេត្តតាកែវ បានសម្តែងនូវការស្វាគមន៍ ដ៏កក់ក្ដៅរបស់លោក ចំពោះការវិនិយោគផ្សារអន្តរជាតិ នៅតំបន់ព្រំដែននេះ។ លោកបានថ្លែងថា ការវិនិយោគនេះ វាចំពេលដែលពលកខ្មែរយើង នៅក្នុងប្រទេសថៃ ត្រូវបានគេបញ្ជូនត្រឡប់មកវិញ ជាង ២២ម៉ឺននាក់ ដែលក្នុងនោះពលករនៅក្នុងខេត្តតាកែវ មានជាង១ម៉ឺននាក់ បានត្រឡប់មកស្រុកវិញ ហេតុដូច្នោះ ការវិនិយោគ នេះ វានឹងធ្វើឲ្យលំហូរការងារ សម្រាប់ប្រជាពលរដ្ឋខេត្តតាកែវ កាន់តែមានភាពប្រសើរឡើងថែមទៀត ជាក់ជាពុំខាន»។
សម្រាប់ឯកឧត្តម អភិបាលខេត្តតាកែវ ក្រៅពីបានលើកទឹកចិត្ត ចំពោះក្រុមអ្នកវិនិយោគ មកបណ្ដាក់ទុនបង្កើតផ្សារ នៅក្នុងខេត្តតាកែវ លោកក៏ជំរុញឲ្យក្រុមហ៊ុនអាម៉េរិកមួយនេះ សិក្សានូវសក្ដានុពល នៅក្នុងខេត្តនេះ ថាតើអាចវិនិយោគអ្វី បន្ថែមទៀត ដែលការវិនិយោគនេះ វានឹងផ្ដល់នូវកាលានុវត្តភាព ដល់ប្រជាពលរដ្ឋខេត្តតាកែវ ក្នុងការស្វែងរកកាងារធ្វើ ហើយវាក៏បានជួយកាត់បន្ថយភាពក្រីក្រ របស់ប្រជាពលរដ្ឋផងដែរ ៕