ក្រុមសាខាវិមានចតុមុខ បានបំបាក់ក្រុមសាខាទួលគោក ក្នុងលទ្ឋផល១០ទល់នឹង១ ដោយទទួលបាន៣ពិន្ទុបន្ថែមទៀត នៃការប្រកួតបាល់ទាត់ដណ្តើមពានរង្វាន់ធនាគារអេស៊ីលីដា ប្រចាំឆ្នាំ២០១៤ វគ្គក្នុងពូល នាព្រឹកថ្ងៃទី៥ ខែកក្កដា ឆ្នាំ២០១៤ ។ នៅក្នុងមួយប្រកួតនេះ ក្រុមសាខាវិមានចតុមុខ មានប្រៀប
និងកំលាំងបច្ចេកទេសលេង គ្របសង្កត់យ៉ាងលើសលប់ ក្នុងការបញ្ចូនឬទាត់បាល់ទៅរកទីគូប្រកួត ដោយគេអាចរកគ្រាប់បាល់បានជាបន្តបន្ទាប់ដល់ទៅ១០គ្រាប់ គឺតង់ទី១ ៤គ្រាប់ និងតង់ទី២ ៦គ្រាប់ ហើយបានឡើងទៅលេងនៅវគ្គបន្ត រីឯក្រុមសាខាទួលគោក មានឱកាសតិចតួចបំផុតក្នុងការគ្រប់គ្រងបាល់ ហើយអាចរកគ្រាប់បាល់បានសងវិញ តែ១គ្រាប់ប៉ុណ្ណោះ ធ្វើឱ្យគេធ្លាក់ចេញពីការប្រកួតនេះ ។
រីឯក្រុមសាខាស្រុកគងពិសី ក៏ធ្លាក់ចេញពីការប្រកួតនេះដូចគ្នា ដោយគេមានត្រឹមតែ៨ពិន្ទុ ហើយត្រូវការឈ្នះ តែបែរជាស្មើរជាមួយនឹងក្រុមការិយាល័យគ្រុបស៊ី ដែលមានលើសគេ១ពិន្ទុ ។ ក្នុងមួយប្រកួតនេះ ក្រុមទាំង២បានខិតខំប្រឹងប្រែងយកឈ្នះរៀងៗខ្លួន ដោយបានវាយសំរុកដាក់គ្នាទៅវិញទៅមក ប៉ុន្តែមិនមានក្រុមណាអាចសុតបញ្ចូលទីគូប្រកួតនោះទេ បញ្ចប់ការប្រកួតទាំង២តង់ ៩០នាទី លទ្ឋផលគឺស្មើរគ្នា០ទល់នឹង០ ធ្វើឱ្យក្រុមការិយាល័យគ្រុបស៊ីលើស១ពិន្ទុ ឡើងទៅវគ្គបន្ត ។
ចំណែកនៅលើទីលានសកលវិទ្យាល័យមេគង្គកម្ពុជាឯណោះវិញ គឺក្រុមសាខាមានជ័យ ឈ្នះក្រុមសាខាស្រុកអង្គស្នួល ៥ទល់នឹង១ ក្រុមការិយាល័យកណ្តាលគ្រុបអេ ឈ្នះក្រុមសាខក្រុងតាខ្មៅខេត្តកណ្តាល៤ទល់នឹង១ និងក្រុមសាខាម៉ៅសេទុង ឈ្នះក្រុមសាខាទី២ឬស្សីកែវ ១១ទល់នឹង១ ។ សូមបញ្ជាក់ថា ការប្រកួតបាល់ទាត់ដណ្តើមពានរង្វាន់ក្របខណ្ឌធនាគារអេស៊ីលីដា ភីអិលស៊ី ទូទាំងប្រទេសប្រចាំឆ្នាំ២០១៤ មាន
ក្រុមចូលរួមចំនួនសរុប៥៦ក្រុម ចែកចេញជា៨ពូល គឺរាជធានីភ្នំពេញ ៤ពូល និងតាមបណ្តាខេត្ត៤ពូល រួចជ្រើសរើសយក២ក្រុមនៅក្នុងពូលនីមួយៗឡើងទៅជួបគ្នាវគ្គបន្ត រីឯទីលានប្រកួតនៅរាជធានីភ្នំពេញ មាន៣កន្លែង គឺទីលានសកលវិទ្យាល័យមេគង្គកម្ពុជា ទីលានដុនបូសកូ និងទីលានខេមរា រីឯបណ្តាខេត្ត ទីតាំងអាស្រ័យទៅតាមការយល់ស្របគ្នារវាងក្រុមនីមួយៗ ។