ខេត្តរតនគិរីៈ ជ្រលងសម្ពាធទាប បង្កអោយផ្ទៃមេឃអួរអាប់ ធ្វើអោយមានភ្លៀងធ្លាក់យ៉ាងកំហុកជាច្រើនថ្ងៃជាប់ៗគ្នា ហើយក៏បានធ្វើអោយទឹកទន្លេសេកុង សេសាន្ត និងស្រែពក មានសន្ទុះជន់ឡើងខ្ពស់គួរអោយគត់សំគាល់ តែទោះជាយ៉ាងណាក៏ឥទិ្ធពលនេះមិនទាន់មានការយាយីណាមួយដល់ប្រជាកសិករនូវផលដំណាំកសិកម្ម និងសត្វពាហនៈរបស់ពួកគាត់ធ្ងន់ធ្ងរនៅឡើយដែរ។
ប្រជាពលរដ្ឋដែលរស់នៅតាមដងទន្លេមានចំនួន៤ស្រុក ស្រុកវ៉ើនសៃ ស្រុកតាវែង ស្រុកអណ្តូងមាស និងស្រុកលំផាត់ ខេត្តរតនគិរី ដែលកំពុងប្រឈមមុខ និងព្រួយបារម្មណ៍ចំពោះទឹកជំនន់។ បើតាមការអះអាងរបស់លោកយូ ឡា ប្រធានមន្ទីរធនធានទឹក និងឧតុនិយមខេត្ត បានអោយដឹងតាមទូរស័ព្ទនៅរសៀលថ្ងៃទី០១ ខែសីហា ឆ្នាំ២០១៤នេះថា កាលពីព្រឹកមិញនេះលោកបានរួមដំណើរជាមួយលោកអភិបាលខេត្តរង លី វិន្ទ ចុះទៅស្រុកលំផាត់ និងបានប្រជុំជាមួយលោកអភិបាលស្រុកដោយមានការចូលរួមពីកងកម្លាំងប្រដាប់អាវុធទាំង៣ប្រភេទ ដើម្បីបង្កើនការប្រុងប្រយ័ត្នអោយបានខ្ពស់ ដូចជាការត្រៀមលក្ខណៈទុកជាមុននូវស្បៀងអាហា ជួយដល់ប្រជាពលរដ្ឋដែលជួបផលប៉ះពាល់។
លោកបានបន្តទៀតថា បើគិតមកត្រឹមថ្ងៃទី០១ ខែសីហា ឆ្នាំ២០១៤នេះ ស្ថានភាពទឹកទន្លេស្រែពកក្នុងស្រុកលំផាត់បាតហក់ឡើងមានកំពស់១១ម៉ែត្រ៦០ ដែលស្ថានភាពនេះត្រូវអាជ្ញាធរចាត់ទុកថា មានការកើនឡើងជាប្រក្រតីហើយប្រសិនកើនឡើងដល់១២ម៉ែត្រ លោកនិងធ្វើសេចក្តីប្រកាសអាសន្នជាបន្ទាន់។ ចំណែកលោកសយ សូណា ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានអោយដឹងតាមទូរស័ព្ទកំពស់ទឹកទន្លេនៅកន្លះម៉ែត្រទៀតទើបធ្វើសេចក្តីប្រកាសអាសន្ន រីឯតំបន់ខ្លះនៅក្នុងស្រុកលំផាត់ ដែលសព្វប្រជាពលរដ្ឋថ្ងៃរស់នៅតាមដងអូរ ត្រូវជួបផលប៉ះពាល់ដោយជំនន់ទឹកភ្លៀង ដូចជាឃុំឡាំងមួយ ដែលប្រជាពលរដ្ឋរស់នៅតាមដងអូរទទឹងដោយជន់លិចផ្ទះសំប្បែង និងផលដំណាំមួយចំនួនតូច។
ជុំវិញបញ្ហាខាងលើលោក គង់ ស្រ៊ុន អភិបាលស្រុកលំផាត់បានអោយដឹងតាមទូរស័ព្ទនៅព្រឹកថ្ងៃទី០១ខែសីហា នេះថាចំនួនភូមិឃុំដែលរងការប៉ះពាល់ដោយសារទឹកជំនន់គឺមានឃុំជ័យឧត្តម ឃុំកាឡែងនិងឃុំសេដា ក្នុងស្រុកលំផាត់ ហើយភូមិដែលដាច់ស្រយាលជាងគេគឺភូមិកែងសាន់ ស្ថិតក្នុងឃុំសេដាស្រុកលំផាត់ ដែលមានប្រជាពលរដ្ឋចាប់ពី២០ទៅ៣០គ្រួសារ ហើយមានចំងាយពីផ្លូវជាតិប្រមាណ៤០ទៅ៥០គីឡូម៉ែត្រ ដែលត្រូវប្រឈមមុខខ្លាំងជាងគេ តែបច្ចុប្បន្នលោកបានត្រៀមលក្ខណៈដូចជាទូកជាច្រើនគ្រឿងដើម្បីជម្លៀសពួកគាត់កាន់ទីទួលសុវត្ថិភាព៕