ភ្នំពេញ ៖ បុរសម្នាក់ដែលគេសង្ស័យថាជាអ្នកមានអំណាចម្នាក់បានបើករថយន្តទាំងស្ថានភាពស្រវឹងដេញបុកអ្នកយកព័ត៌មានរបស់កាសែតនគរវត្តម្នាក់ ដោយមិនដឹងមូលហេតុបង្កឱ្យមានការភ្ញាក់ផ្អើលដល់សមត្ថកិច្ចក្នុងខណ្ឌទួលគោក ចេញមកពិនិត្យហេតុការណ៍តែមិនបានជួយ
អន្តរាគមន៍ទេ បានត្រឹមតែឱបដៃឈរមើលហេតុការណ៍តែប៉ុណ្ណោះ ហាក់បីដូចជាខ្លាចអំណាចបុគ្គលដែលបើករថយន្តដេញបុកគេនោះ ។ ហេតុការណ៍នេះកើតឡើងកាលពីវេលាម៉ោង១០ និង៣០នាទី យប់ថ្ងៃទី៧ សីហា ២០១៤នៅតាមបណ្តោយផ្លូវម៉ៅសេទុង ស្ថិតក្នុងសង្កាត់ទឹកល្អក់២ ខណ្ឌទួលគោក ។ ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុបុរសម្នាក់ដែលជាភ្នាក់ងារយកព័ត៌មានរបស់កាសែតនគរវត្ត បានជិះម៉ូតូម៉ាកស៊ុយស៊ូគីនិច ពណ៌ផ្កាឈូក ពាក់ស្លាកលេខភ្នំពេញ1BU-5804 ដោយធ្វើដំណើរតាមផ្លូវម៉ៅសេទុង ហើយពេលកំពុងតែធ្វើដំណើរនោះស្រាប់តែមានរថយន្តCRV មួយគ្រឿងពណ៌ទឹកប្រាក់ ពាក់ស្លាកលេខភ្នំពេញ 2F-2073 ដែលគេដឹងថា បើកបរដោយបុរសម្នាក់បានបើករថយន្តក្នុងស្ថានភាពស្រវឹង ដេញបុកអ្នកយកព័ត៌មានរបស់កាសែតនគរវត្តម្នាក់ដោយមិនដឹងមូលហេតុ ដោយព្រួយបារម្ភពីសុវត្តិភាពអ្នកយកព័ត៌មានរូបនោះក៏បានទាក់ទងទៅសមត្ថកិច្ចតាមរយៈអាយឌី ដើម្បីឱ្យជួយអន្តរាគមន៍ និងបង្កការភ្ញាក់ផ្អើលដល់សមត្ថកិច្ចខណ្ឌទួលគោក និងក្រុមអ្នកយកព័ត៌មានមកពីស្ថាប័នផ្សេងៗទៀត ។ ខណៈរថយន្តបង្កខាងលើបើកដេញបុកអ្នកកាសែតដល់ចំណុចស្តុបទេពផន ក៏បានបើករថយន្តចូលទៅហាងម៉ាស្សាយីហោ ឡឺសូលី ស្ថិតនៅក្នុងសង្កាត់ទឹកល្អក់ទី១ ខណ្ឌទួលគោក។ បន្ទាប់មកគេឃើញប៉ូលិសអន្តរាគមន៍ និងប៉ូលិសប៉ុស្តិ៍នៅខណ្ឌទួលគោកប្រមាណ២០នាក់បានចុះមកដល់កន្លែងកើតហេតុ តែមិនបានជួយអន្តរាគមន៍នោះទេ បែជាឈរឱបដៃមើលហេតុការណ៍ ដែលសកម្មភាពនេះត្រូវបានអ្នកឃើញហេតុការណ៍នាំគ្នានិយាយថា ប្រហែលជាសមត្ថកិច្ចខ្លាចអំណាចបុគ្គលដែលបើករថយន្តបុកគេនោះហើយ ។ ទោះបីជាអ្នកកាសែតរងគ្រោះខាងលើសុំដាក់ពាក្យបណ្តឹងយ៉ាងណាក៏សមត្ថកិច្ចមិនព្រមទទួលយកពាក្យបណ្តឹងនោះដែរ ។