នៅសាលប្រជុំរដ្ឋបាលសាលាខេត្តសៀមរាប នាថ្ងៃទី០៧ ខែ សីហា ឆ្នាំ២០១៤ មានបើកនូវការផ្សព្វផ្សាយលិខិតបទដ្ឋានគតិយុត្តពាក់ព័ន្ធ នឹង ការគ្រប់គ្រងធនធានមនុស្ស និង ការផ្តល់សេវារដ្ឋបាល នៅថ្នាក់ក្រោមជាតិ ជូនដល់ថ្នាក់ដឹកនាំ មន្ទីរ ស្ថាប័ន អង្គភាព ក្រុមប្រឹក្សា អាជ្ញាធរក្រុង
ស្រុក នាយករដ្ឋបាល ប្រធានការិយាល័យ នៃទីចាត់ការទាំង៦ របស់រដ្ឋបាលសាលាខេត្ត ប្រធានមន្ទីរស្រុក និង មន្ត្រីរាជការមានការពាក់ព័ន្ធ ទូទាំង ខេត្តសៀមរាប ។ អង្គសិក្ខាសាលាផ្សព្វផ្សាយនេះ បានប្រព្រឹត្តទៅ ក្រោមវត្តមានរបស់ឯ.ឧ អ៊ឹង ហឿន ប្រធាន ស្តីទី ក្រុមប្រឹក្សាខេត្ត ឯកឧត្តម ស៊ិន រុន អភិបាលរងនៃគណៈអភិបាលខេត្ត ព្រមទាំងមានការអញ្ជើញចូលរួមពីសំណាក់ ឯកឧត្តម លោកជំទាវជាសមាជិកក្រុមប្រឹក្សាខេត្ត គណៈអភិបាលខេត្តផងដែរ ។
មានប្រសាសន៍បើកការផ្សព្វផ្សាយនោះ ឯ.ឧ ស៊ិន រុន បានបញ្ជាក់ ពីគោលបំណងនៃវគ្គផ្សព្វផ្សាយ ដើម្បី អនុវត្តនូវលិខិតបទដ្ឋានគតិយុត្តមួយចំនួន ដែលពាក់ព័ន្ធទៅនឹងការគ្រប់គ្រងធនធានមនុស្ស និង ការផ្តល់សេវារដ្ឋ បាលនៅថ្នាក់ក្រោមជាតិ លើអនុក្រិត្យ ស្តីពីការធ្វើប្រតិភូកម្មអំណាច ដល់រដ្ឋបាលថ្នាក់ក្រោមជាតិ ក្នុងការតែងតាំង ការផ្លាស់ប្តូរ និង បញ្ចប់ភារកិច្ចមន្ត្រីរាជការស៊ីវិល ដែលបំពេញការងារនៅថ្នាក់ក្រោមជាតិ និង សេចក្តីណែនាំ ស្តីពី នីតិវិធីនៃការតែងតាំង ការផ្លាស់ប្តូរ និង ការបញ្ចប់ភារកិច្ចមន្ត្រីរាជការស៊ីវិល ដែលបំពេញការងារនៅថ្នាក់ក្រោមជាតិ និង សេចក្តីណែនាំស្តីពីការរៀបចំល័ក្ខខ័ណ្ឌការងារសម្រាប់មន្ត្រី បុគ្គលិករដ្ឋបាលរាជធានី ខេត្ត ក្រុង ស្រុក ខណ្ឌ ។ ឯកឧត្តមបានបន្តទៀតថា អនុក្រិត្យស្តីពីការផ្តល់សេវារដ្ឋបាលនៅរដ្ឋបាលថ្នាក់ក្រោមជាតិ និង ប្រកាសអន្តរក្រសួង មហាផ្ទៃ និង ក្រសួងសេដ្ឋកិច្ចនិងហិរញ្ញវត្ថុ ស្តីពីការផ្តល់សេវារដ្ឋបាលនៅរដ្ឋបាលថ្នាក់ក្រោមជាតិ ព្រមទាំងផ្តល់នូវ ប្រាក់រង្វាន់លើកទឹកចិត្ត និង ការបែងចែកប្រាក់រង្វាន់លើកទឹកចិត្តជូនដល់រដ្ឋបាលថ្នាក់ក្រោមជាតិ ។ ឯ.ឧ ស៊ិន រុន ក៏បានគូសបញ្ជាក់ថា លិខិតបទដ្ឋានគតិយុត្តទាំងនេះ ត្រូវបានក្រសួងមហាផ្ទៃ សហការជាមួយក្រសួងមុខងារសាធា រណៈ និង លេខាធិការដ្ឋាន គ.ជ.អ.ប ណែនាំរដ្ឋបាលខេត្តត្រូវធ្វើការផ្សព្វផ្សាយបន្ត ដល់រដ្ឋបាលខេត្ត ក្រុង ស្រុក មន្ទីរ អង្គភាពជុំវិញខេត្ត ដើម្បីសហការអនុវត្តឲ្យមានប្រសិទ្ធភាពនូវលិខិតបទដ្ឋានគតិយុត្តនេះ ។ ឆ្លៀតឱកាសនោះ ដែរឯកឧត្តមក៏បានលើកឡើង ពីខ្លឹមសារសម្ខាន់ៗនៃលិខិតបទដ្ឋានគតិយុត្ត ក្នុងគោលបំណងដើម្បីធានាឲ្យការអនុវត្ត អនុក្រិត្យទាំងនោះ ប្រកបដោយប្រសិទ្ធភាពខ្ពស់ ។ ទោះបីជាសិទ្ធអំណាចត្រូវបានផ្តល់ជូនដល់រដ្ឋបាលថ្នាក់ក្រោម ជាតិក៏ដោយ តែការផ្តល់នេះមានទម្រង់ជាការធ្វើប្រតិភូកម្មតែប៉ុណ្ណោះ ដែលឲ្យក្រសួង ស្ថាប័នជាតិទទួលខុសត្រូវ ចំពោះការតែងតាំង ផ្លាស់ប្តូរ និង បញ្ចប់ភារកិច្ចមន្ត្រីក្រោមឱវាទ ។ ឯ.ឧ ស៊ិន រុន ក៏បានផ្តាំផ្ញើដល់សិក្ខកាម ឲ្យត្រូវ យកអស់ស្មារតីទទួលខុសត្រូវប្រកបដោយមនសិកាវិជ្ជាជីវៈខ្ពស់ ក្នុងការអនុវត្តនូវសិទ្ធិអំណាចប្រតិភូកម្ម ឲ្យបានត្រឹម ត្រូវតាមគោលការណ៍ នីតិវិធី បែបបទ ឧបនិស្ស័យ និង លក្ខណសម្បត្តិដែលបានកំណត់ ប្រកបដោយតម្លាភាព និង គណនេយ្យភាព សមធម៌ ប្រសិទ្ធភាពខ្ពស់ ។ ដោយអនុវត្តតាមគោលការណ៍ដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី ក្នុងការកំណត់កម្រៃសេវាសាធារណៈ សំដៅលុបបំបាត់ការយកកម្រៃសេវាមិនស្របច្បាប់ ដើម្បីធានាដល់ការផ្តល់សេវាប្រកបដោយតម្លាភាព សំដៅរួមគ្នាប្រយុទ្ធប្រឆាំងអំពើពុករលួយ ក្នុងការផ្តល់សេវាសាធារណៈនៅតាមក្រសួង ស្ថាប័ន ហើយនៅពេលបញ្ចប់ការផ្សព្វផ្សាយនេះ និង វិលត្រឡប់ទៅវិញត្រូវធ្វើការប្រជុំផ្សព្វផ្សាយបន្ត ជូនដល់អ្នកពាក់ព័ន្ធនៅមន្ទីរ អង្គភាពរដ្ឋបាលក្រុង ស្រុក ឃុំ សង្កាត់ និងត្រូវចាប់ផ្តើមអនុវត្តទៅតាមលិខិតបទ ដ្ឋាន ដែលបានធ្វើការផ្សព្វផ្សាយនេះ ៕