ខេត្តស្ទឹងត្រែង៖ខណៈមិនទាន់មានការអនុញ្ញាត្តិឲ្យបើកដំណើរការនៃការលក់ដូរក្នុងផ្សារសាមគ្គីស្ទឹងត្រែងវិញនោះ ដោយសារស្ថានភាពនៃការឆ្លងរារាលដាពីជម្ងឺកូវី-១៩ ក្នុងខេត្តស្ទឹងត្រែង ហើយវាបានបន្តរាលដាល ហាក់ពុំមានថមថយនោះ ។ ដោយមើលឃើញពីការលំបាករបស់បងប្អូនប្រជាពលរដ្ឋ ជាអាជីវករលក់បន្លែបង្ការត្រីសាច់ជាដើមនោះ គណៈកម្មការផ្សារក៏បានសម្រេចអនុញ្ញាត្តិផ្តល់ទីតាំងលើផ្លូវបេតុងជាប់នឹងផ្សារសាមគ្គី ឲ្យបងប្អូនអាជីវករបានលក់ដូរជួយសម្រួលដល់ជីវភាពប្រចាំថ្ងៃ ក្នុងស្ថានភាពជម្ងឺកូវីដ-១៩កំពុងរាតត្បាត ហើយផ្សារសាមគ្គីទាំងមូល ត្រូវបានបិទផ្អាកដំណើរអស់រយះពេលជាច្រើនថ្ងៃមកហើយ គឺដើម្បីរក្សាសុវត្ថិភាពជូនបងប្អូនអាជីវករគេចផុតពីជម្ងឺរាតត្បាតលាក់មុខដ៏កាចសាហាវ ។ជាក់ស្តែងនៅព្រឹកថ្ងៃទី៥ ខែកក្កដា ឆ្នាំ២០២១នេះ ទីតាំងពាណិជ្ជកម្មដ៏សំខាន់ជាបេះដូងនៃក្រុងស្ទឹងត្រែង គឺផ្សារសាមគ្គីត្រូវបានអាជ្ញាធរ ក៏ដូចជាគណៈកម្មការផ្សារសាមគ្គី អនុញ្ញាត្តិឲ្យមានការលក់ដូរតាមផ្លូវបេតុងជុំវិញផ្សារ ដោយតម្រូវឲ្យអនុវត្តតាមវិធានការសុខាភិបាល ។បើតាមការបញ្ជាក់ពីលោក ម៉ែន គង់ អ្នកននាំពាក្យរដ្ឋបាលខេត្តបានឲ្យដឹងថាៈអ្នកលក់ដូរតាមទីសាធារណៈជុំវិញផ្សារសាមគ្គីស្ទឹងត្រែង ត្រូវបានអនុញ្ញាត្តិឲ្យលក់ តែត្រូវរក្សាគម្លាតពីគ្នា និងមានការរៀបចំសណ្ដាប់ធ្នាប់ត្រឹមត្រូវ ។ ដោយឡែកផ្សារសាមគ្គីទាំងស្រុងមិនទាន់បើកឲ្យដំណើរការលក់ដូរវិញនៅឡើយទេ ៕
