កំពង់ឆ្នាំង៖ ផ្លូវធ្វើដំណើរលើខ្នងប្រឡាយមួយកន្លែង ដែលមានប្រវែងប្រមាណ១០០ម៉ែត្រ ត្រូវបានម្ចាស់ស្ថានីយ៍ប្រេងឈ្មោះ ឡាក់ ឡេង សាងសង់ដំបូលសំយ៉ាបនិងរបងនៅពីលើ ធ្វើអោយរាំងស្ទះការធ្វើដំណើរ។ករណីនេះត្រូវបានប្រជាពលរដ្ឋនៅក្នុងឃុំរលាប្អៀរប្រតិកម្ម និងបានលើកឡើងនៅក្នុងវេទិការសាធារណៈមួយ ដែលបានធ្វើឡើងនៅក្នុងវត្តត្រពាំងស្នោរ ស្ថិតក្នុងភូមិព្រៃខ្មែរ ឃុំរលាប្អៀរ ស្រុករលាប្អៀរ ស្នើសុំអោយអាជ្ញាធរ ស្រុកខេត្ត និង ក្រុមការងារថ្នាក់ជាតិ ជួយដោះស្រាយបើកផ្លូវនោះអោយប្រជាពលរដ្ឋធ្វើដំណើរជាសាធារណៈឡើងវិញ។ 
ស្ត្រីម្នាក់ជាតំណាងប្រជាពលរដ្ឋនៅក្នុងភូមិព្រៃខ្មែរ ឃុំរលាប្អៀរ បានលើកឡើងនៅក្នុងវេទិការសាធារណៈថា៖ផ្លូវលំលើខ្នងប្រឡាយប៉ែកខាងត្បូង ស្ថិតនៅក្នុងភូមិព្រៃខ្មែរ ជាប់ផ្លូវជាតិលេខ៥ ដែលមានទទឹងប្រវែង៤ម៉ែត្រ បណ្តោយប្រមាណ១០០ម៉ែត្រ ដែលជាផ្លូវលំសាធារណៈសំរាប់ប្រជាពលរដ្ឋធ្វើដំណើរជាច្រើនឆ្នាំមកហើយ ត្រូវបានម្ចាស់ស្ថានីយ៍ប្រេងឈ្មោះ ឡាក់ ឡេង រំលោភយកសាងសង់សំយ៉ាប ដំបូលពីលើ និងធ្វើរបងព័ទ្ធជិតនាំអោយរាំងស្ទះ ការធ្វើដំណើរជិត២ឆ្នាំមកហើយ មិនត្រូវបានអាជ្ញាធរ ឬសមត្ថកិច្ចពាក់ព័ន្ធណាមួយដោះស្រាយបើកផ្លូវនោះវិញឡើយ។
ពួកគាត់បានសំណូមពរដល់លោកជំ ទាវ ម៉ាត់ ម៉ារ៉ា ប្រធានក្រុមការងារថ្នាក់ជាតិចុះជួយស្រុករលាប្អៀរ និងលោកអភិបាលខេត្តកំពង់ឆ្នាំង មេត្តាជួយ ដោះស្រាយបើកផ្លូវនោះអោយប្រជាពលរដ្ឋធ្វើដំណើរជាសាធារណៈដូចដើមវិញផង។ ទាក់ទងក្នុងរឿងនេះលោក ពៅ ឈឿន មេឃុំរលាប្អៀរបំភ្លឺនៅក្នុងវេទិការសាធារណៈនោះថា៖លោក ឡាក់ ឡេង ម្ចាស់ស្ថានីយ៍ប្រេងបានជាជ្រុលធ្វើដំបូល និងរបងរាំងបិទផ្លូវនោះទៅហើយ ប៉ុន្តែលោក ឡាក់ ឡេង បានធ្វើកិច្ចសន្យាជាមួយអាជ្ញាធរឃុំថា លោកនឹងរុសរើសំយ៉ាបនិង របងចេញវិញនៅពេលរដ្ឋតំរូវការ(ចំឡើយរបស់លោកមេឃុំនៅពេលនោះ មិនបានធ្វើអោយប្រជាពលរដ្ឋពេញចិត្តនឹងលោកមេឃុំនោះឡើយ ព្រោះផ្លូវកំពុងដើរទៅមកត្រូវបានគេបិទជិត២ឆ្នាំហើយបែរជាឆ្លើយធូរខ្សុយ)។ 
ដោយឡែក លោក សួង សែ ប្រធានភូមិបាលស្រុករលាប្អៀរបានអោយដឹងដែរថា៖ ជំនាញរបស់ លោកបានអនុញ្ញាតិអោយសាងសង់ស្ថានីយ៍ប្រេងនេះ តែក្នុងរង្វង់ប្លង់ដីស្របច្បាប់របស់ឈ្មោះ ឡាក់ ឡេង តែប៉ុណ្ណោះ ចំណែកការសាងសង់ហួសប្លង់កំណត់ជំនាញរបស់លោកមិនអនុញ្ញាតិឡើយ។ពាក់ព័ន្ធ នឹងការសាងសង់សំយ៉ាប និងរបងបិទផ្លូវនៅលើខ្នងប្រឡាយ លោកគិតថាជាសមត្ថកិច្ចរបស់មន្ទីរធន ធានទឹកខេត្ត ឬមន្ទីរកសិកម្មខេត្ត ជាអ្នកដោះស្រាយ។រីឯការសាងសង់តូបលក់សាំងនៅមុខស្ថានីយ៍ប្រេង លើចិញ្ចើមផ្លូវជាតិ លេខ៥នោះ ជាសមត្ថកិច្ចរបស់មន្ទីរគមនាគមន៍ខេត្ត និងស្រុកជាអ្នកដោះស្រាយ។
ការបកស្រាយរបស់លោកមេឃុំ និងជំនាញពាក់ព័ន្ធខាងលើនេះ ធ្វើអោយប្រជាពលរដ្ឋងឿងឆ្ងល់ ថា៖ម្តេចម្នាក់ៗឆ្លើយដោះស្រាយយករួចតែខ្លួន មិនគិតផលប្រយោជន៍រាស្ត្រ និងរដ្ឋជាធំ ឬក៍គេទុកអោយសម្តេចតេជោ ហ៊ុន សែន នាយករដ្ឋមន្ត្រីជាអ្នកជួយដោះស្រាយឬ??។ក្នុងរឿងនេះត្រូវបានគេយល់ថា៖ប្រហែលជាមានភាពមិនប្រក្រតីណាមួយក្នុងរឿងខាងលើនេះ ទើបមន្ត្រីជំនាញពាក់ព័ន្ធនីមួយៗធ្វើមិនដឹង មិនឭ រឿងនេះគេរង់ចាំមើលថា តើលោកអភិបាលខេត្តកំពង់ឆ្នាំង និងប្រធានមន្ទីរពាក់ព័ន្ធទាំងអស់អាចដោះស្រាយបានដែរឬទេនូវសំណូមពរដែលជាទុក្ខកង្វល់របស់ប្រជាពលរដ្ឋឃុំរលាប្អៀរ៕
