សៀមរាប៖ កម្លាំងរដ្ឋបាលព្រៃឈើខេត្តសៀមរាប បានចុះត្រួតពិនិត្យមើលច្បាប់ទម្លាប់នៅតាមរោងសិប្បកម្មកែច្នៃ និង ដេប៉ូលក់ឈើនៅក្នុងក្រុងសៀមរាប បន្ទាប់ពីមានលេចឭព័ត៌មានថា ដេប៉ូនិងរោងសិប្បកម្ម មួយចំនួននៅមិនទាន់គោរពទៅតាមច្បាប់ដែលបានកំណត់ឲ្យ និង គាប់ជួនកម្លាំងរដ្ឋបាលព្រៃឈើដល់ពេលដែលត្រូវចុះត្រួតពិនិត្យផងនោះ។
ប្រភពព័ត៌មានបានឲ្យដឹងថា ជារៀងរាល់ថ្ងៃគេតែងតែឃើញមានរថយន្តតូច ធំ សម្រុកដឹកឈើចូលមកលក់នៅក្នុងក្រុងសៀមរាប ដែលមានមួយចំនួនធំជាឈើរបស់ក្រុមហ៊ុនសម្បទានសេដ្ឋកិច្ច ហើយគេអះអាងថាមានច្បាប់ទម្លាប់ត្រឹមត្រូវ ប៉ុន្តែទោះជាយ៉ាងណាក៏គេនៅតែសង្កេតឃើញថាមានឈ្មួញឈើមួយចំនួនបានឆ្លៀតឱកាសបន្លំភ្នែកសមត្ថកិច្ចលួចដឹកឈើចូលទាំងយប់ទាំងថ្ងៃ ទើបគេឃើញរយៈពេលប៉ុន្មានថ្ងៃនេះមានកម្លាំងរដ្ឋបាលព្រៃឈើជាច្រើននាក់បាននាំគ្នាចុះមកត្រួតពិនិត្យតាមរោងសិប្បកម្ម កែច្នៃ និង ដេប៉ូ ជាក់ស្តែងតែម្តង ដើម្បីជំរៈមន្ទិលសង្ស័យទាំងឡាយនោះ។ 
លោក ទា គឹមសុទ្ធនាយខណ្ឌរដ្ឋបាលព្រៃឈើខេត្តសៀមរាបបានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី២០ខែសីហានេះថា ដោយមានការអនុញ្ញាតិពីអជ្ញាធរខេត្តឲ្យជំនាញ រដ្ឋបាលព្រៃឈើខេត្តសៀមរាប ចុះត្រួតពិនិត្យមើលនៅតាមដេប៉ូ និង រោងសិប្បកម្មកែច្នៃក្នុង ក្រុងសៀមរាបដែលមានភាពមិនប្រក្រតី ឲ្យគោរពតាមច្បាប់ទម្លាប់ត្រឹមត្រូវឡើងវិញ។ លោកបន្តថា ជាធម្មតាវាតែងតែមានដេប៉ូ និង រោងសិប្បកម្មមួយចំនួនដែលទើប នឹង បង្កើតថ្មីមិនទាន់មានច្បាប់ទម្លាប់ ដូច្នេះជំនាញរដ្ឋបាលព្រៃឈើមានតួនាទីចុះទៅណែនាំពួក គាត់ដល់កន្លែងតែម្តង ដើម្បីឲ្យពួកគាត់បានយល់ពីច្បាប់។ 
លោកបន្ថែមទៀតថា ទោះជាយ៉ាង ណានៅតាមដេប៉ូឈើក្នុងខេត្តសៀមរាប បើតាមលោកដឹងសុទ្ធសឹងតែមានច្បាប់ទម្លាប់ ហើយមានប៉េសេគ្រប់ចំនួនត្រឹមត្រូវទៅតាមច្បាប់ដែលពួកគេស្នើសុំ។ លោកបញ្ជាក់ទៀតថា កម្លាំង រដ្ឋបាលព្រៃឈើខត្តសៀមរាបនិងបន្តចុះស្រង់ស្ថិតិរហូតគ្រប់ដេប៉ូ និង រោងសិប្បកម្មកែច្នៃ នៅក្នុងក្រុងសៀមរាប និង តាមបណ្តាស្រុកទាំងអស់ផងដែរ៕
