ស្ទឹងត្រែង៖ហាងខារ៉ាអូខេស្រីម៉ៅ់ ដ៏ពេញនិយមសម្រាប់យុវវ័យ និងសិស្សានុសិស្ស ពាក់ព័ន្ធនិងករណីគ្រឿងញៀន ត្រូវបានកម្លាំងអាវុធហត្ថខេត្តចុះបង្ក្រាបកាលពីយប់ថ្ងៃ២៤ខែសីហាឆ្នាំ២០១៤ និងបានឃាត់ខ្លួនអ្នកចែកចាយនិងជួញដូរគ្រឿងញៀន ចំនួន៧នាក់រួមនិងសម្ភារៈជាច្រើនទៀតនោះ មកដល់ថ្ងៃទី២៦សីហានេះ តុលាការមិនទាន់ចាត់វិធានការនៅឡើយ។
ប្រជាពលរដ្ខដែលមានលំនៅឋានជិតហាងខារ៉ាអូខេស្រីម៉ៅបាននិយាយថាហាងខារ៉ាអូខេមួយនេះ ត្រូវបានគេស្គាល់ថាថៅកែ ឈ្មោះ គឿនដែលមានទីតាំងស្ថិតនៅក្នុងភូមិកណ្តាល សង្កាត់ ក្រុងស្ទឹងត្រែង។ខារ៉ាអូខេមួយនេះត្រូវបានគេនិយាយថា អ្នកមកច្រៀងភាគច្រើនជាយុវវ័យ សិស្សានុសិស្ស មករៀនគេចសាលានាំគ្នាមកចូលខារ៉ាអូខេ ប្រើប្រាស់គ្រឿងញៀន ដោយឪពុកម្តាយមិនបានដឹង។ ប្រភពបានបន្តទៀតថាខារ៉ាអូខេស្រីម៉ៅត្រូវបានគេបើកដំណើរការរាប់ឆ្នាំមកហើយ ទោះជាគេដឹងថាខារ៉ាអូខេនេះ មានយុវវ័យ សិស្សានុសិស្ស និងខ្លះទៀតជាអនិតិជនចូលមកក៏ដោយ ក៏គេមិនឃើញអាជ្ញាធរ ឬសមត្ថកិច្ច ពាក់ព័ន្ធណាអើពើ ចាត់វិធានការនៅឡើយ។ទើបមកថ្ងៃខាងលើ ត្រូវបានកំលាំងអាវុធហត្ត ធ្វើការចុះឡោមព័ទ្ធ ឆែកឆេរ និងបានធ្វើការឃាត់ខ្លួនជនសង្ស័យចំនួន៧នាក់ រួមនិងថ្នាំញៀនប្រភេទមេតំហ្វេតាមីន(WY) ចំនួន៤៧ ជាប្រភេទថ្នាំឆ្កួតនិងដែលបង្កឱ្យយុវវ័យ បាត់សតិ ខូចអនាគត។
ប្រភពបន្តថាពាក់ព័ន្ធនិងករណីបង្ក្រាបគ្រឿងញៀនចំនួន៤កន្លែង ផ្ទះចំនួន៣កន្លែនិងហាងខារ៉ាអូខេមួយកន្លែង និងបានធ្វើការរឹបអូសវត្ថុតាងថ្នាំញៀន៣៤៥០គ្រាប់ និងបានឃាត់ខ្លួនជនសង្ស័យចំនួន១៦នាក់ ជាអ្នកចែកចាយនិងជួញដូរគ្រឿងញៀនខុសច្បាប់។រហូតមកដល់ថ្ងៃទី២៦សីហានេះជនសង្ស័យទាំង១៦នាក់ កំពុងស្ថិតក្រោមការសាសួរពីសមត្ថកិច្ចនៅឡើយ។តែក៏មានលេចឮថា មានអ្នកខ្លះកំពុងរត់ការទៅតុលាការដើម្បីរួចផុតពីការចោទប្រកាន់។ចំណែកផ្ទះដែលធ្វើការឆែកឆេររកឃើញគ្រឿងញៀន៣៤០៤គ្រាប់ ត្រូវបានឃាត់ម្ចាស់ផ្ទះ ចាក់សោរបិទរក្សាទុកជាបណ្តោះអាសន្ន។តែដោយឡែកហាងខារ៉ាអូខេជាកន្លែងប្រើប្រាស់ចែកចាយនិងជួញដូរគ្រឿងញៀន បង្កឱ្យយុវវ័យ សិស្សានុសិស្ស ជាច្រើនភ្លេចការសិក្សានោះ ក្រោយពីបង្ក្រាបមកដល់នៅថ្ងៃទី២៦សីហានេះ នៅបើកដំណើរការយ៉ាងរំភើយ ហាក់បីដូចគ្មានអ្វីកើតឡើង។
ពាក់ព័ន្ធនិងការបង្ក្រាបគ្រឿងញៀននៅហាងខារ៉ាអូខេស្រីម៉ៅ អ្នកយកព័ត៍មានបានទូរស័ព្ទទៅលោកគឿន ម្ចាស់ហាងខារ៉ាអូខេ គេបានឆ្លើយយ៉ាងខ្លីថា មិនបាច់ចេះទេ សមត្ថកិច្ចគេចេះធ្វើការហើយ ខ្ញុំគ្មានពេលនិយាយទេ ហើយក៏បិទទូរស័ព្ទទៅ ករណីម្ចាស់ហាងនិយាយយ៉ាងឡូយបែបនេះ ហាក់បីដូចមានខ្នងបង្អែកនៅពីក្រោយខ្នង។ ទាក់ទងទៅនិងហាងខារ៉ាអូខេពាក់ព័ន្ធនិងការបង្ក្រាបគ្រឿងញៀន ហើយរហូតមកដល់ថ្ងៃនេះ ហាងខារ៉ាអូខេ នៅតែដំណើរការ កម្ពុជាថ្មីបានទូរស័ព្ទទៅកាន់លោកព្រះរាជអាជ្ញាប៉ែន សារ៉ាត់សាលាដំបូងខេត្ត សុំការបំភ្លឺលោកបានបញ្ចាក់ថារឿងនេះ លោកមិនទាន់មានចំណាត់ការ ដោយសាររឿងមិនទាន់ដល់ដៃលោកនៅឡើយ រងចាំនគរបាលយុត្តិធមិ៍បញ្ជូនមកសិន រឿងបិទហាងខារ៉ាអូខេជាបណ្តោះអាសន្ននោះ រងចាំធ្វើការស៊ើបអង្កេតសិន៕