ខេត្តកំពង់ឆ្នាំង៖ ក្នុងរយះពេល៩ខែ ឆ្នាំ២០១៤ នេះ មនុស្សចំនួន ៧៦នាក់បានស្លាប់ដោយគ្រោះថ្នាក់ចរាចរណ៍ នេះជាការលើកឡើងរបស់លោក អៀរ ប៊ុនធឿន នាយការិយាល័យចរាចរណ៏ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង ខណៈដែលលោកត្រូវបានអញ្ជើញជាវាគ្មិន ធ្វើបទបង្ហាញអំពីច្បាប់ចរាចរណ៏ផ្លូវ គោក ដល់សិក្ខាកាមដែលមាននាយ នាយរង និងពលទាហាន ចំនួន៧៧នាក់របស់តំបន់ប្រតិបត្តិការសឹករងកំពង់ឆ្នាំង នៅសាលប្រជុំរបស់ អង្គភាពខាងលើនៅពីព្រឹក ថ្ងៃទី២៦ ខែសីហា ឆ្នាំ២០១៤ ។
លោក នាយការិយាល័យខាងលើនេះបាននិយាយអោយដឹងថា៖ ដោយមានការអញ្ជើញពីលោក មេបញ្ជាការ តំបន់ប្រតិបត្តិការសឹករងខេត្ត លោកឧត្តមសេនីយត្រី ប្រាក់ វុទ្ឋី ស្នងការនគរបាលខេត្ត បានចាត់តាំងអោយ លោកទៅធ្វើបទបង្ហាញ ស្តីអំពីកត្តាដែលនាំអោយមានគ្រោះថ្នាក់ចរាចរណ៏ដល់អង្គភាព ខាងលើនេះ ដោយផ្តោតជាសំខាន់លើខ្លឹមសារទូទៅ អំពីស្ថានភាពគ្រោះថ្នាក់ចរាចរណ៏ អំពីស្លាកសញ្ញាគ្រោះថ្នាក់ និងបទបញ្ញាត្តិក្នុងមាត្រាមួយចំនួនពាក់ពន្ឋ័និងទោសទណ្ឌ័ ដល់អ្នកបង្ករអោយមានគ្រោះថ្នាក់ចរាចរណ៏ ។
លោកក៏បានលើកឡើងពីគ្រោះថ្នាក់ចរាចរណ៏ រយៈពេល៩ខែក្នុងឆ្នាំ២០១៤ ផងដែរដល់សិក្ខាកាម ទាំងអស់ ក្នុងនោះបានកើតឡើងចំនួន ១៦៦លើក ( ឆ្នាំចាស់១៤៤លើក) ក្នុងនោះបានសម្លាប់មនុស្ស ចំនួន៧៦នាក់(ឆ្នាំចាស់ ៦៥នាក់) រងរបួសមនុស្ស ៣៣០នាក់ (ឆ្នាំចាស់២៨៤នាក់) គឺបានបញ្ចាក់ថាៈបាន កើនឡើងជារាងរាល់ថ្ងៃ គួរព្រួយបារម្មណ៏ ។ ដោយហេតុនេះហើយ ទើបលោកនាយនគរបាលការិយាល័យផ្លូវគោករបស់ស្នងការដ្ឋាននគរបា លខេត្តបានយកចិត្តទុកដាក់ជាសំខាន់ លើបញ្ហាគ្រោះថ្នាក់ចរាចរណ៏នេះ ដោយបានចុះប្រជុំផ្សព្វផ្សាយ ច្បាប់ ចរាចរណ៏ ដល់ប្រជាពលរដ្ឋ មន្ត្រីរាជការ សិក្សានុសិស្ស ដើម្បីអោយចូលរួម គោរពច្បាប់ចរាចរណ៏ទាំងអស់គ្នា ។
មុននឹងបញ្ចប់ ក្នុងសិក្ខាសាលានេះ ក៏មានដាក់ជាសំណួរចម្លើយដល់សិក្ខាម ស្តីអំពីកត្តា ដែលនាំអោយមានគ្រោះថ្នាក់ចរាចរណ៏ផងដែរ។ លោកនាយការិយាល័យ ក៏បានផ្តាំផ្ញើរដល់សិក្ខាកាមទាំងអស់ សូមបើកបរមានសុជីវធម៏ ពិសេស បើស្រវឹងសូមកុំបើកបរជាដើម នៅចុងបញ្ចប់ លោកក៏បានចែកផ្ទាំងរូបភាពដែលផ្តល់ដោយ នាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិ ដល់នាយ នាយរង និងពលទាហានជាសិក្ខាមផងដែរ ដើម្បីទុកបង្ហាញមិត្តភ័ក្រ និងក្រុមគ្រួសារស្វែងយល់ អំពីច្បាប់ចរារណ៍៕