សៀមរាប ៖នៅ ថ្ងៃសុក្រទី០៥ ខែកញ្ញា ឆ្នាំ២០១៤ កន្លងទៅវិទ្យាស្ថាន វ៉ាន់ដា សាខាខេត្តសៀមរាប បានដឹកនាំនិស្សិតជំនាន់ទី២ទៅ ទស្សនកិច្ចសិក្សានៅរោងចក្រផលិតទឹករ៉ែធម្មជាតិ អូ គូលែន ស្ថិតនៅភូមិត្បែងកើត ឃុំត្បែង ស្រុកបន្ទាយស្រីខេត្តសៀមរាប។ ហើយនេះគឺជាលើកទី២ហើយដែលគណៈគ្រប់គ្រង វិទ្យាស្ថាន វ៉ាន់ដា សាខាខេត្តសៀមរាប បានដឹកនាំនិស្សិតទៅបំពេញទស្សនកិច្ចសិក្សានៅក្រុមហ៊ុន Kulara Water Co., Ltd ។ទស្សនកិច្ចសិក្សាលើកទី២នេះមានការចូលរួមពីសំណាក់និស្សិតជំនាន់ទី២ សិក្សាពេលព្រឹក និងពេលរសៀល ព្រមជាមួយបុគ្គលិក សាស្ត្រាចារ្យ មួយចំនួនផងដែរ។ 
គណៈគ្រប់គ្រងវិទ្យាស្ថាន បានបញ្ជាក់ថានិស្សិតពីមួយជំនាន់ទៅមួយជំនាន់ ត្រូវបានផ្ដល់ឱកាសឲ្យចុះកម្មសិក្សា សិក្សាស្វែងយល់អំពីការអនុវត្តន៍ការងារជាក់ស្ដែងនៅតាមបណ្ដាក្រុមហ៊ុន និងតាមស្ថាប័នផ្សេងៗ ដើម្បីបន្ថែមចំណេះដឹងមួយកម្រិតទៀតទៅលើការសិក្សាទ្រឹស្ដីនៅក្នុងវិទ្យាស្ថាន។ ការសិក្សាតែលើទ្រឹស្ដីមិនគ្រប់គ្រាន់នោះទេ ហេតុនេះហើយគណៈគ្រប់គ្រងវិទ្យាស្ថាន វ៉ាន់ដា សាខាខេត្តសៀមរាប បានរៀបចំទស្សនកិច្ចសិក្សាក្រោមប្រធានបទ ការគ្រប់គ្រងខ្សែសង្វាក់ផលិតកម្ម របស់រោងចក្រផលិតទឹករ៉ែធម្មជាតិ អូ គូលែន ដើម្បីឲ្យនិស្សិតយល់កាន់តែច្បាស់អំពីវិធីសាស្ត្រក្នុងការស្វែងរក និងការគ្រប់គ្រង ។
សាស្ត្រាចារ្យជំនាញគណនេយ្យថ្លៃដើមនិងសាស្ត្រាចារ្យមួយចំនួនទៀតក៏បានចូល រួមដឹកនាំនិស្សិតជាមួយគណៈគ្រប់គ្រងវិទ្យាស្ថាន ចូលរួមស្ដាប់បទបង្ហាញរបស់ភាគីរោងចក្រ ស្ដីពីការគ្រប់គ្រងខ្សែសង្វាក់ផលិតកម្ម និងដំណើរការផលិតកម្មទាំងមូលផងដែរ។ និស្សិតដែលទៅចូលរួមទស្សនកិច្ច សិក្សានេះត្រូវប្រមូលឯកសារដើម្បីរៀបចំកិច្ចការស្រាវជ្រាវ សម្រាប់មុខវិជ្ជាគណនេយ្យថ្លៃដើម ហើយនិស្សិតដឹកនាំដោយសាស្ត្រាចារ្យត្រូវជួបសម្ភាសន៍ និងប្រមូលឯកសារពីផ្នែកផលិតកម្ម និងផ្នែកពាក់ព័ន្ធផ្សេងៗទៀតរបស់រោងចក្រពាក់ព័ន្ធជាមួយថ្លៃដើមនៃការផលិតថាតើក្នុងមួយ ខួបផលិតកម្ម ត្រូវប្រើប្រាស់វត្ថុធាតុដើមផ្ទាល់, កំលាំងពលកម្មផ្ទាល់ និងចំណាយផលិតកម្មប្រយោល? ដោយឡែកបច្ចុប្បន្ននិស្សិត
វិទ្យាស្ថាន វ៉ាន់ដា មានចំនួនច្រើន ហើយខាងរោងចក្របានកំណត់ចំនួនក្នុងកម្រិតមួយជាក់លាក់ក្នុងការចូលបំពេញទស្សនកិច្ចសិក្សាមួយលើកៗដូចនេះ គណៈគ្រប់គ្រងវិទ្យាស្ថានបានសម្រេចដឹកនាំ និស្សិតជំនាន់២ មកបំពេញទស្សនកិច្ចសិក្សាជាពីរលើកគឺលើកទី១នៅថ្ងៃសុក្រទី០៥ ខែកញ្ញា ឆ្នាំ២០១៤ និង មួយលើកទៀតសម្រាប់និស្សិតសិក្សាពេលយប់ និងពេលចុងសប្តាហ៍ឲ្យបំពេញទស្សនកិច្ចសិក្សានៅថ្ងៃសុក្រទី០៣ ខែតុលា ឆ្នាំ២០១៤។
វិទ្យាស្ថាន វ៉ាន់ដា សាខាខេត្តសៀមរាបត្រូវបានបង្កើតឡើងកាលពីថ្ងៃទី២៨ ខែមិថុនា ឆ្នាំ២០១២ តាមប្រកាសលេខ ២៦៣០ អយក.ប្រក របស់ ក្រសួងអប់រំយុវជន និងកីឡានៃព្រះរាជាណា ចក្រកម្ពុជា ហើយត្រូវបានគណៈកម្មាធិការទទួលស្គាល់គុណភាពអប់រំនៃកម្ពុជា វាយតម្លៃផ្ដល់ការទទួលស្គាល់គុណភាពអប់រំពេញសិទ្ធ លើដំណើរការបណ្ដុះបណ្ដាលថ្នាក់ឆ្នាំសិក្សាមូលដ្ឋានកាលពីថ្ងៃទី១៣ ខែកញ្ញា ឆ្នាំ២០១៣។ វិទ្យាស្ថានបានបណ្ដុះបណ្ដាលនិស្សិតពីរជំនាន់រួចមកហើយដែលមានចំនួនសរុបជិត ៦៣០ នាក់។ដោយ ខេង ខេមរា
