(ប៉ៃលិន)៖ ល្ងាចថ្ងៃទី១៩ ខែឧសភា ឆ្នាំ២០២២ លោកជំទាវ បាន ស្រីមុំសមាជិក គណៈកម្មាធិការ កណ្តាល និង ជា ប្រធាន គណៈកម្មាធិការ គណបក្ស ប្រជាជន កម្ពុជា ខេត្ត បានអញ្ជើញជួបសំណេះសំណាលជាមួយសមាជិក សមាជិកា និងសកម្មជនគណបក្សភ្លើងទៀន ចំនួន៥៩នាក់ ដែលបានស្ម័គ្រចិត្តមករួមរស់ជីវភាពបក្ស ជាមួយគណបក្សប្រជាជនកម្ពុជា ក្នុងសង្កាត់ប៉ៃលិន ។
មានប្រសាសន៍សំណេះសំណាល និងផ្ដាំផ្ញើដល់សមាជិកថ្មីនាឱកាសនោះ លោកជំទាវ បាន ស្រីមុំ បានសម្ដែងមនោសញ្ចេតនារីករាយ និងស្វាគមន៍យ៉ាងកក់ក្តៅ ចំពោះសមាជិកថ្មីដែលបានស្ម័គ្រចិត្តសុំចូលជាសមាជិកគណបក្សប្រជាជនកម្ពុជា ដោយការមើលឃើញ និងជឿជាក់យ៉ាងមុតមាំថា មានតែសម្តេចតេជោ ហ៊ុន សែន ប្រធានគណបក្សប្រជាជនកម្ពុជាតែមួយគត់ ដែលមានសមត្ថភាពគ្រប់គ្រាន់ក្នុងការដឹកនាំប្រទេសមានសុខសន្តិភាព និងការរីកចម្រើន ដែលពុំមានគណបក្សណាអាចធ្វើបាន។លោកជំទាវ បានបន្តថា៖ការសុំចូលមករួមរស់ជាមួយគណបក្សប្រជាជន ពីគណបក្សដទៃ គឺបានបង្ហាញថា ការដឹកនាំរបស់គណបក្សប្រជាជនកម្ពុជា ជាគណបក្សចាស់ទុំ ដឹកនាំប្រទេសឆ្ពោះទៅរកការរីកចម្រេីន ក្នុងន័យ បម្រេីប្រជាជនដោយពិតប្រាកដ រួមរស់ដឹងសុខទុក្ខជាមួយប្រជាជនពិតប្រាកដ ។
គណបក្សប្រជាជនកម្ពុជាជាគណបក្សរបស់ប្រជាជន កើតឡើងស្ថិតស្ថេរនិងរីកចំរើនដោយសារប្រជាជន និងធ្វើអ្វីៗគ្រប់យ៉ាងដើម្បីផលប្រយោជន៏ដ៏ឧត្តង្គឧត្តមរបស់ប្រទេសជាតិនិងប្រជាជន ។
ជាមួយគ្នានេះដែរលោកជំទាវប្រធានបក្សខេត្ត ក៏បានស្នើដល់បងប្អូនសមាជិកថ្មី ឱ្យមានភាពស្មោះត្រង់ជាមួយគណបក្សប្រជាជនកម្ពុជា និងសូមទៅបោះឆ្នោតជូនគណបក្សប្រជាជនកម្ពុជាឱ្យបានគ្រប់ៗគ្នា ស្របតាមទិសស្លោក «សមាជិកគណបក្សម្នាក់ ជាសន្លឹកឆ្នោតគាំទ្រគណបក្ស១សន្លឹក» និងសូមចលនាសាច់ញាតិមិត្តភក្តិ បងប្អូនឱ្យទៅចូលរួមបោះឆ្នោតជូនគណបក្សប្រជាជនកម្ពុជា ដើម្បីគណបក្សដែលការពារសន្តិភាពនេះ មានលទ្ធភាពបន្តដឹកនាំកសាងអភិវឌ្ឍន៍មាតុភូមិក្នុងគន្លងសុខសន្តិភាព និងការរីកចម្រើនជាលំដាប់ ក្រោមការដឹកនាំដ៏ខ្ពង់ខ្ពស់ ប្រកបដោយកិត្តិបណ្ឌិត របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ៕អត្ថបទ ភ្នំខៀវ ប៉ៃលិន
