កំពង់ឆ្នាំង៖មនុស្ស៣នាក់ជាជីដូននិងចៅបានរងបួសធ្ងន់ ដោយសារសត្វឪម៉ាល់មួយសំបុកព្រួតគ្នាទិច ក្នុងពេលដែលជនរងគ្រោះជិះម៉ូតូឆ្លងកាត់ត្រូវក្មេងៗមួយក្រុមគប់សំបុកឪម៉ាល់នោះលេង។ហេតុការណ៍នេះបានកើតឡើងនៅវេលាម៉ោង២និង៣០នាទី រសៀលថ្ងៃទី២៤ ខែកញ្ញា ឆ្នាំ២០១៤ នៅលើផ្លូវលំក្នុងចំណុចអូររលួស ភូមិអញ្ចាញរូង ឃុំអញ្ចាញរូងស្រុកបរិបូរណ៌ ។
សមត្ថកិច្ចនគរបាលប៉ុស្តិមូលដ្ឋានបាននិយាយអោយដឹងថា៖ជនរគ្រោះទាំង៣នាក់នោះមាន ១ឈ្មោះ ហែម មាណ អាយុ៧០ឆ្នាំជាជីដូន ២ឈ្មោះ គៀន ភាព អាយុ១៩ឆ្នាំភេទប្រុសជាចៅប្រុស ៣ឈ្មោះ តុន ឡាវ អាយុ២៣ឆ្នាំជាចៅស្រី ពួកគាត់ភូមិថ្លុកជ្រៅ ឃុំអញ្ចាញរូង ស្រុកបរិបូរណ៌។
មុនពេលកើតហេតុជនរងគ្រោះទាំង៣នាក់ បានជិះម៉ូតូ១គ្រឿង នាំគ្នាដើររកក្របីដែលបាត់ លុះដល់ចំណុចកើហេតុ ក៏ត្រូវបានសត្វឪម៉ាល់មួយសំបុកដែលហើរពេញផ្លូវ ដោយសារក្មេងក្នុងភូមិ១ក្រុមកប់វាលេង ទិចពួកគាត់ទាំង៣នាក់ក្នុងម្នាក់ៗរាប់សិបមេ ធ្វើអោពួកគាត់ឈឺពើតចុកចាប់យ៉ាងខ្លាំងរហូតដល់សន្លប់។ក្រោយពេលកើតហេតុអ្នកស្រុកក្នុងភូមិបានហៅរថយន្តពេទ្យស្រុកបរិបូរណ៌មកដឹកជនរងគ្រោះ ទៅកាន់មន្ទីរពេទ្យស្រុកបរិបូណ៌ដើម្បីអោយក្រុមគ្រូពេទ្យជួយសង្គ្រោះ។ ដោយសារស្ថានភាពអ្នករបួសមានសភាពធ្ងន់ធ្ងរ ជនរងគ្រោះទាំង៣នាក់ត្រូវបានគ្រូពេទ្យ ដឹកបញ្ជូនមកកាន់មន្ទីរពេទ្យខេត្តកំពង់ឆ្នាំងដើម្បីអោយគ្រូពេទ្យខេត្តជួយសង្គ្រោះបន្តទៀត។
នៅព្រឹកថ្ងៃទី២៥ ខែកញ្ញា ឆ្នាំ២០១៤ ជនរងគ្រោះទាំង៣នាក់មានអាការៈធូរស្រាលបន្តិចវិញហើយបន្ទាប់ពីបានក្រុកគ្រូពេទ្យខេត្តបានព្យាលបាលចាក់ស៊ីរ៉ូម និងថ្នាំបន្សាបជាតិពិសរួចមក។ករណីគ្រោះថ្នាក់នេះគឺដោយសារក្រុមក្មេងខិលខូច ដែលយកល្បែងគរោះថ្នាក់មកលេងសើចកំសាន្តមិនគិតគូរពីសុវត្តិភាពអ្នកធ្វើដំណើរឆ្លងកាត់ ទើបង្កអោយជនរងគ្រោះមានគ្រោះថ្នាក់ធ្ងន់ធ្ងរបែបនេះ។
លោកគ្រូពេទ្យខេត្តបានអោយដឹងថា គ្រោះថ្នាក់ដោយសារសត្វឪម៉ាល់ទិចតែងកើតមានជារៀងរាល់ឆ្នាំមិនដែលខានឡើយ ហើយនរងគ្រោះមួយចំនួនក៏បានមានគ្រោះថ្នាក់រហូតដល់ស្លាប់ក៏មានដែរ ដោយសារសត្វឪម៉ាល់ទិចរាប់រយមេបែកសរសៃរឈាមក្នុងខួរក្បាល។លោកគ្រូពេទ្យសុំអំពាវនាវថា បើមានជនរងគ្រោះដោយសារសត្វឪម៉ាល់តិចឬពស់ចឹក ឬសត្វមានពិសខាំ សូមឆាប់បញ្ជូនជនរងគ្រោះមកមន្ទីរពេទ្យខេត្តអោយបានទាន់ពេលវេលាទើបគ្រូពេទ្យអាចជួយសង្គ្រោះជីវិតបានទាន់ពេល៕