កំពង់ឆ្នាំង៖យុវជននិងនារី៣នាក់ជាអ្នកចែកចាយថ្នាំញៀន រួមជាមួយវត្ថុតាងថ្នាំញៀនម៉ាទឹកកក៤កញ្ចប់ធំ និងម៉ូតូ៣គ្រឿង ត្រូវបានសមត្ថកិច្ចចំរុះសហការគ្នាឡោមពទ្ធ័ចាប់បាន នៅពេលពួកគេកំពុងចែកចាយថ្នាំញៀនក្នុងផ្ទះមួយកន្លែង។កិច្ចប្រតិបត្តិការណ៍បង្ក្រាបគ្រឿងញៀន ខាងលើនេះបានធ្វើ ឡើងនៅម៉ោង៩ព្រឹកថ្ងៃទី០៣ ខែតុលា ឆ្នាំ២០១៤នៅក្នុងភូមិលាជ ឃុំសេដ្ឋី ស្រុកសាមគ្គីមានជ័យ។
លោក គឹម សារ៉េត អនុប្រធានការិយាល័យកណ្តាលប្រឆាំងបទល្មើស នៃស្នងការនគបាលខេត្ត ជាអ្នកដឹកនាំបង្ក្រាបបទល្មើសខាងលើនេះបានអោយដឹងថា៖ កម្លាំងសមត្ថកិច្ចចំរុះសហការគ្នាបង្ក្រាបគ្រឿងញៀននេះរួមមាន មន្ត្រីការិយាលយ័កណ្តាលប្រឆាំងបទល្មើស មន្ត្រីអធិការនគបាលស្រុកសាមគ្គឺមានជ័យ មន្ត្រីនគរបាលប៉ុស្តិមូលដ្ឋាននិងអាជ្ញាធរឃុំ បានបែងចែកកម្លាំគ្នាធ្វើការឡោមពទ្ធ័ទីតាំងផ្ទះមួយកន្លែងនៅក្នុងភូមិខាងលើ។
លទ្ធផលបង្ក្រាបចាប់បានយុវជន២នាក់ និងនារីម្នាក់គឺ៖ ១ឈ្មោះ ឈុន រ៉ា ភេទប្រុស អាយុ២៦ឆ្នាំ ជាម្ចាស់ផ្ទះ ២ឈ្មោះ រី វ៉ាន់ ភេទប្រុស អាយុ២៤ឆ្នាំ អ្នកទាំង២រស់នៅក្នុងភូមិបឹងលាជ ឃុំសេដ្ឋី ស្រុកសាមគ្គឺមានជយ័ ៣ឈ្មោះ សឿន ទេវី ភេទស្រី អាយុ១៨ឆ្នាំ រស់នៅក្នុងភូមិចិនដាំម្លូ ឃុំវាំងចាស់ ស្រុកឧត្តុង្គ ខេត្តកំពង់ស្ពឺ។
វត្ថុតាងដែលសមត្ថកិច្ចដកហូតបានរួមមាន៖ ថ្នាំញៀនប្រភេទម៉ាទឹកកក៤កញ្ចប់ធំ ម៉ូតូ៣គ្រឿង ម៉ាកសេ១២៥ពណ៌ខ្មៅមួយគ្រឿង ពាក់ស្លាកលេខភ្នំពេញ 1CG 6259 និងម៉ូតូ២គ្រឿងផ្សេងទៀតគ្មានស្លាកលេខ ដាវ១ដើម សម្ភារះសំរាប់បំរើដល់ការជក់ថ្នាំញៀនមួយចំនួនធំ និងជញ្ជីង១។នៅចំពោះមុខសមត្ថកិច្ចជនសង្សយ័ខាងលើបានសារភាពថា ថ្នាំញៀនរួមនិងវត្ថុតាងខាងលើពិតជារបស់ពួគគេបាននាំយកមកធ្វើការចែកចាយនៅចំណុចផ្ទះខាងលើនេះពិតប្រាកដមែន។
ជនសង្ស័យទាំង៣នាក់រួមនិងវត្ថុតាង ត្រូវបានសមត្ថកិច្ចក្នុងអធិការដ្ឋាននគរបាលស្រុកសាមគ្គីមានជ័យកសាងសំណុំរឿងតាមផ្លូវច្បាប់ និងបញ្ជូនមកកាន់ស្នងការដ្ឋាននគរបាលខេត្តតាមនិតិវិធី ហើយនាយការិយាល័យនគរបាលប្រឆាំងគ្រឿងញៀនខេត្ត បានចាត់ការបន្តតាមនិតិវិធីបញ្ជូនជនសង្ស័យទាំង៣នាក់និងវត្ថុតាង ទៅកាន់សាលាដំបូងខេត្ត ដើម្បីជំនុំជំរះផ្តន្ទាទោសតាមបញ្ញត្តិនៃច្បាប់ស្តីពីគ្រឿងញៀន៕
