(កំពង់ធំ)÷ នៅព្រឹកថ្ងៃទី០៦ ខែមីនា ឆ្នាំ២០២៤ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជា ខេត្តកំពង់ធំ រួមជាមួយថ្នាក់ដឹកនាំ នៃគណៈកម្មាធិការសមាគមអតីតយុទ្ធជនស្រុកសណ្តាន់ បាននាំយកថវិកាបេឡាមរណសង្គ្រោះចំនួន៤លានរៀល 
និងអំណោយស្បៀងអាហាររបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី រួមមានអង្ករចំនួន៥០ គីឡូក្រាម មីជាតិចំនួន ពីរកេស ទឹកត្រីសុីអុីវចំនួនចំនួន ពីរ យួរ និងត្រីខកំប៉ុងចំនួន ពីរយួរ ទៅប្រគល់ជូនក្រុមគ្រួសារសពអតីតយុទ្ធជនសោធននិវត្តឈ្មោះ ជុំ ជាតិ ឋានន្តរសក្ដិនាយចំណង់ អាយុ៦៦ ឆ្នាំ អតីតនៅអង្គភាពយោធាស្រុកសណ្តាន់ ខេត្តកំពង់ធំ។ 
លោកបានទទួលមរណភាពដោយរោគាពាធនៅពេលកន្លងទៅថ្មីៗនេះ នៅភូមិត្រឹប ឃុំងន ស្រុកសណ្តាន់ខេត្តកំពង់ធំ ។
ឧត្តមសេនីយ៍ទោ សោម ស៊ុន បានថ្លែងនូវការសោកស្ដាយចំពោះការបាត់បង់ជីវិត របស់លោកនាយចំណង់ ជុំ ជាតិ ជាអតីតយុទ្ធជន ដែលធ្លាប់មានគុណបំណាច់ចំពោះជាតិ មាតុភូមិ និងប្រជាជន ហើយសូមបួងសួងដល់វិញ្ញាណក្ខន្ឋលោក ជុំ ជាតិ បានទៅកាន់សុគតិភព កុំបីឃ្លៀងឃ្លាតឡើយ។
នៅក្នុងឱកាសនេះ ឧត្តមសេនីយ៍ទោ បានបញ្ជាក់ថា ក្រោមការដឹកនាំរបស់សម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងក្រោសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ព្រមទាំងឯកឧត្តម ទេសរដ្ឋមន្ត្រី នាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា។
លោកឧត្តមសេនីយ៍ទោ សោម ស៊ុន បានបន្តការខិតខំប្រឹងប្រែងគ្រប់បែបយ៉ាង ដើម្បីដោះស្រាយនូវរាល់ការលំបាករបស់បងប្អូនអតីតយុទ្ធជនយើងមានដូចជា ការបែងចែកដីធ្លី ការសាងសង់ផ្ទះសម្បែងជូនបងប្អូនអតីតយុទ្ធជន ដែលមានជីវភាពលំបាកខ្វះខាតពិតប្រាកដ និងការផ្ដល់នូវប័ណ្ណបេឡាជាតិសន្តិសុខសង្គម ជូនបងប្អូនអតីតយុទ្ធជន សម្រាប់ទៅព្យាបាលជំងឺនៅមន្ទីរពេទ្យរដ្ឋ ដោយរាជរដ្ឋាភិបាលជាអ្នកចេញថ្លៃព្យាបាលជូន ហើយពេលបងប្អូនអតីតយុទ្ធជនទទួលមរណភាពមានថវិកាបេឡាមរណសង្គ្រោះចំនួន ៤,០០០,០០០ រៀល សម្រាប់សម្រួលដល់ក្រុមគ្រួសារសពក្នុងការធ្វើបុណ្យជូនបងប្អូនអតីតយុទ្ធជនយេីងឲ្យបានសមរម្យ និងឱ្យទាន់ពេលវេលា។
អត្ថបទតំបន់សឹករងកំពង់ធំ
