ខេត្តកំពង់ធំ៖ ជាខួបលើកទី ១០៣ ទិវានារីអន្តរជាតិឆ្នាំ ២០១៤ ក្រោមវិធានបទ សមភាព នៃការអប់រំមានសារៈសំខាន់ក្នុងកិច្ចអភិវឌ្ឍន៍ បានប្រារព្វធ្វើឡើង នៅក្នុងស្រុកស្ទោងយ៉ាងអធឹកអធ័ម ក្រោមអធិបតីភាព ឯកឧត្តម ណាំ ទុំ ប្រធានក្រុមប្រឹក្សាខេត្តកំពង់ធំ និង ឯកឧត្តម គង់ វិមាន អភិបាលរងខេត្តកំពង់ធំ ដែល មានមន្ត្រីរាជការ តាមបណ្តាឃុំ ចូលរួម នៅព្រឹកថ្ងៃទី ៧ ខែ មិនា ឆ្នាំ ២០១៤ បានផ្តោតទៅលើ សារៈសំខាន់ ទៅលើតួនាទី របស់ស្ត្រី ដែលកំពុងតែ ត្រូវបានសកលលោក យកចិត្តទុកដាក់ បំផុតនិងឲ្យតំលៃខ្ពស់ទៅ លើស្ត្រី ក្នុងតួនាទី អត់ធ្មត់ ពុះពារគ្រប់ឧបស័គ្គ ក្នុងការអប់រំ កូនចៅ និងបំរើការងារ នៅក្នុងសង្គម និងមាន តួនាទីជាច្រើនទៀតដែល បុរសមិនអាចធ្វើបាន តែស្ត្រីអាចធ្វើបាន ។
ជាក់ស្តែងទិវានារីអន្តរជាតិ ក៏ដូចជាទិវានារី នៅក្នុងប្រទេសកម្ពុជា ត្រូវបានប្រារព្វឡើងជារៀងរាល់ឆ្នាំ ក្រោម ការងារយកចិត្តទុកដាក់បំផុត ទៅលើកិច្ចការនារី ពីរាជរដ្ឋាភិបាល កម្ពុជា ដែលមានសម្តេចអគ្គមហាសេនា បតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចគត្តិព្រឹត្តបណ្ឌិត ប៊ុន រ៉ានី ហ៊ុន សែន ។
នៅក្នុងប្រវត្តិសាស្ត្រ ស្ត្រីគឺជាផ្នែកមួយដ៏សំខាន់ ដោយមិនអាចខ្វះបាន ក្នុងការរួមចំណែក ការពារនិងកសាង សង្គម ជាតិឲ្យបានល្អប្រសើរ និងបានបង្កើតឲ្យមានក្រសួងកិច្ចការនារី ដើម្បីការពារផលប្រយោជន៍ ស្ត្រីនិង កុមារ គ្រប់លំដាប់ថ្នាក់ បង្កើនឆន្ទះ និងស្មារតី ព្រោះស្ត្រីគឺជាឆ្អឹងខ្នង នៃសេដ្ឋកិច្ចសង្គមជាតិ និងជម្រុញឲ្យ ស្ត្រីរួមចំណែក ការងារក្នុងសង្គម តាមរយះប្រឡងជ្រើសរើស បំពេញក្របខណ្ទ នៅតាមក្រសួង ស្ថាប័ន មន្ទីរនានា និងយកចិត្តទុកដាក់ចំពោះស្ត្រីជាជនពិការ ។
បន្ទាប់ពី លោក ស្ត្រី មូល ឡម អភិបាលរងស្រុកស្ទោង បានអាននូវព្រះរាជសារ សម្តេចព្រះមហាក្សត្រី នរោត្តម មុនិនាជ សីហនុ ព្រះវររាជមាតាជាតិខ្មែរ រួចមក ឯកឧត្តម ណាំ ទុំ ប្រធានក្រុមប្រឹក្សា ខេត្តបានមាន ប្រសាសន៍ ផ្តាំផ្ញើរកោតសរសើរ ដល់ស្ត្រី ដែលមានតួរនាទីសំខាន់ ក្នុងការចិញ្ចឹមបីបាច់ថែរក្សា កូនចៅនិង អប់រំកូនចៅបានល្អ និងអាចធ្វើការគ្រប់ក្រសួង ស្ថាប័ន ដូចបុរសបាន ។
នៅក្នុងពិធី បានបើកឳកាសឲ្យ សិស្សានុសិស្ស និងស្ត្រីមានឳកាស តប និងឆ្លើយសំនួរ នូវចំណេះដឹងផ្សេងៗ ពាក់ព័ន្ឋទៅនឹងវិធានការ ទប់ ស្កាត់ភ័យអន្តរាយជុំវិញខ្លួនរបស់ស្ត្រីស្តីពីច្បាប់ផ្សេងៗ ដែលស្ត្រីមានសិទ្ធិក្នុងការទទួល នៃឳកាសចុងក្រោយ នៃពិធី ថ្នាក់ដឹកនាំ បានប្រគល់បាច់ផ្កា និងកាដូរ ជូនដល់ភរិយាជាទី ស្រឡាញ់ ដើម្បីជាគំរូល្អ បុរសល្អ និង ជាប្តីល្អ ជាម្លប់ជាជម្រកដល់ក្រុមគ្រួសារ ។ ដោយ ប៊ុន រដ្ឋា ។