សៀមរាប ៖ យុវជនម្នាក់នេះមានឈ្មោះ សួស សារ៉ាន់ អាយុ២២ឆ្នាំត្រូវបានកម្លាំងនគរបាលប៉ុស្តិ៍រដ្ឋបាលសង្កាត់ស្លក្រាមក្រុងសៀមរាបធ្វើការចាប់ឃាត់ខ្លួនបញ្ជូនមកឲ្យកម្លាំងនគរបាលនាយការិយាល័យនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបដើម្បីធ្វើការតាមដានស្រាវជ្រាវបន្តបន្ទាប់ពីកម្លាំងនគរបាលប៉ុស្តិ៍រដ្ឋបាលសង្កាត់ស្លក្រាមបានចុះប្រតិបត្តិការត្រួតពិនិត្យអាវុធជាតិផ្ទុះនៅពេលយប់
កាលពីថ្ងៃទី៦ខែមីនាឆ្នាំ២០១៤កន្លងទៅនេះរួចឆេកឆែរកឃើញគ្រឿងញៀនខុសច្បាប់ប្រភេទម្សៅមេតំហ្វេតាមីន១កញ្ចប់ដែលនៅជាប់និងខ្លួនយុវជនម្នាក់នេះទើបកម្លាំងនគរបាលប៉ុស្តិ៍រដ្ឋបាលសង្កាត់ស្លក្រាមក្រុងសៀមរាបធ្វើការប្រគល់យុវជននេះទៅឲ្យអង្គភាពជំនាញតែម្តង។
លោកវរសេនីយ៍ត្រី អ៊ុំ សាអាត នាយការិយាល័យនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានឲ្យដឹងថាបន្ទាប់ពីនគរបាលជំនាញរបស់លោកបានធ្វើការសួរនាំនិងបានធ្វើការឆេកឆែខ្លួនប្រាណរបស់យុវជនសង្ស័យនេះហើយសមត្ថកិច្ចយើងបានរកឃើញគ្រឿងញៀនខុសច្បាប់ប្រភេទម្សៅមេតំហ្វេតាមីន១កញ្ចប់ទៀតដែលនៅក្នុងកាបូបលុយរបស់គេទើបក្រោយមកយុវជនជាជនសង្ស័យម្នាក់នេះបានឆ្លើយសារភាពថាកន្លងមកខ្លួនធ្លាប់បានប្រើប្រាស់និងរក្សាទុកនៅសារធាតុញៀនទាំងអស់នេះពិតប្រាកដមែន។
លោកវរសេនីយ៍ត្រី អ៊ុំ សាអាត បានបញ្ជាក់ថាសម្រាប់គ្រឿងញៀនខុសច្បាប់ប្រភេទម្សៅមេតំហ្វេតាមីនដែលសមត្ថកិច្ចយើងធ្វើការដកហូតបានពីជនសង្ស័យម្នាក់នេះគឺចំនួន២កញ្ចប់ស្មើនិង ០,៣ ក្រាម បច្ចុប្បន្នជននេះត្រូវបានសមត្ថកិច្ចក៏សាងសុំណុំរឿងបញ្ជូនខ្លួនព្រមទាំងវត្ថុតាងទៅកាន់សាលាដំបូងខេត្តសៀមរាបហើយកាលពីថ្ងៃសៅរ៍ទី០៨ខែមីនាឆ្នាំ២០១៤ដើម្បីចំណាត់ការទៅតាមនិតិវិធីបន្ត ៕
អត្ថបទដោយ លោក ខេង ខេមរា រូបភាព លោក ម៉េន បូរិទ្ធ