កំពង់ឆ្នាំង៖ សមត្ថកិច្ចគ្រប់អង្គភាព និងអាជ្ញាធរភូមិឃុំស្រុកប្រមាណជិត៩០នាក់ នៅក្នុង ស្រុកជលគីរី បានចូរួមស្តាប់ការផ្សព្វផ្សាយច្បាប់ក្រមនីតិវិធីព្រហ្មទណ្ឌ និងក្រមព្រហ្មទណ្ឌ ដែលមាន លោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកំពង់ឆ្នាំងជាគ្រូឧទ្ទេសនាមក្នុងការផ្សព្វផ្សាយច្បាប់។ការផ្សព្វផ្សាយច្បាប់នេះបានធ្វើពេញមួយថ្ងៃទី០៤ ខែកុម្ភៈ ឆ្នាំ២០១៥ នៅក្នុងសាលាស្រុកជលគីរី ខេត្តកំពង់ឆ្នាំង។
លោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកំពង់ឆ្នាំងបានអោយដឹងថា៖នៅក្នុងកិច្ចប្រជុំផ្សព្វផ្សាយក្រមនីតិវិធីព្រហ្មទណ្ឌ និងក្រមព្រហ្មទណ្ឌនេះមានសមាសភាពចូលរួមពីគណៈអភិបាល នាយករដ្ឋបាល នាយករង ការិយាល័យជុំវិញស្រុក មន្ត្រីសាលាស្រុក កងកំលាំងប្រដាប់អាវុធទាំង៣ក្នុងស្រុក មេឃុំ ជំទប់ មេភូមិទាំង៥ឃុំ និងអ្នកដែលពាក់ព័ន្ធមួយចំនួនទៀតសរុបប្រមាណជិត៩០នាក់។
ក្នុងកិច្ចប្រជុំផ្សព្វផ្សាយនេះគឺក្នុងគោលបំណងអោយសមត្ថកិច្ច អាជ្ញាធរ និងអ្នកពាក់ព័ន្ធទាំងអស់យល់កាន់តែច្បាស់នូវការអនុវត្តន៍ក្រមនីតិវិធីព្រហ្មទណ្ឌ និងក្រមព្រហ្មទណ្ឌ ជាមួយស្ថាប័នអយ្យការ ក្នុងការកសាងសំណុំរឿងដើម្បីដាក់បន្ទុកដល់ជនសង្ស័យ, ការ បញ្ជូនដីកាកោះហៅ ឬដីកានាំខ្លួនអោយត្រឹមត្រូវតាមលក្ខណៈច្បាប់ និងទាន់ពេលវេ លាដល់សាម៉ីជន,និងពន្យល់អោយកាន់តែយល់ច្បាស់បន្ថែមទៀតនូវច្បាប់ស្តីពីជលផល ច្បាប់ព្រៃឈើ ច្បាប់ចរាចរណ៍ ច្បាប់រៀបអាពាហ៍ពិពាហ៍។ ជាពិសេសបង្ខិតច្បាប់អោយ កាន់តែជិតទៅដល់ប្រជាពលរដ្ឋគ្រប់រូបនៅតាមមូលដ្ឋាន អោយគាត់យល់ដឹងតាមរយៈ អាជ្ញាធរមូលដ្ឋាន និងសមត្ថកិច្ច ដើម្បីអនុវត្តអោយបានល្អនូវគោលនយោបាយភូមិឃុំ មានសុវត្ថិភាពទាំង៩ចំណុចរបស់ប្រមុខរាជរដ្ឋាភិបាល។
លោកបានបញ្ជាក់បន្ថែមថា៖ការធ្វើលិខិតសេវាសាធារណៈគឺជាការងាដ៏ចាំបាច់បំផុតដល់ប្រជាពលរដ្ឋ ដូចនេះទាមទារអោយសមត្ថកិច្ច និងអាជ្ញាធរមូលដ្ឋានត្រូវតែយល់ អោយច្បាស់ពីច្បាប់ ដើម្បីជៀសវាងបានក្នុងការអនុវត្តទៅមានបញ្ហាប្រឈមទៅថ្ងៃ ក្រោយនាំ អោយសមត្ថកិច្ច អាជ្ញាធរ និងប្រជាពលរដ្ឋក្នុងមូលដ្ឋានជួបនៅការលំបាក។
នៅក្នុងកិច្ចប្រជុំផ្សព្វផ្សាយក្រមនីតិវិធីព្រហ្មទណ្ឌ និងក្រមព្រហ្មទណ្ឌរយៈពេលពេញមួយថ្ងៃនេះ សមត្ថកិច្ច និងអាជ្ញាធរភូមិ ឃុំ ស្រុក មានចំណាប់អារម្មណ៍យ៉ាងខ្លាំងនិងបានលើកឡើងនូវសំណួរជាច្រើនដែលពួកគាត់មិនទាន់យល់ច្បាស់ ដើម្បីអោយតំណាង អយ្យការពន្យល់ពីច្បាប់និងបទពិសោធន៍នានា ក្នុងការធ្វើកិច្ចការងារទាំងអស់នោះអោយ ត្រឹមត្រូវស្របតាមលក្ខណៈច្បាប់របស់ជាតិ៕
