ភ្នំពេញ ៖ កាលពីវេលាម៉ោង៧ និង៣០នាទីព្រឹក ថ្ងៃទី៦ ខែមីនា ឆ្នាំ២០១៥ នេះក្រុមអ្នករត់រ៉ឺម៉កម៉ូតូប្រមាណជិត១០០នាក់បានលើកគ្នាមកមុខអធិការដ្ឋានខណ្ឌទួលគោកស្ថិតនៅតាមផ្លូវលេខ២៦១ សង្កាត់បឹងសាឡាង ខណ្ឌទួលគោក បន្ទាប់ពី សមាជិកក្រុមគេម្នាក់បានរងរបួសក្នុងការវាយតប់គ្នានៅផ្សារ៧មករាកាលពីយប់មិញ។
បើតាមអ្នករត់រ៉ឺម៉កម៉ូតូដែលលើកគ្នាមកមុខអធិការដ្ឋានខណ្ឌបានឱ្យដឹងថា ពួកគេលើកគ្នាមកនេះគឺដើម្បីទាមទារឱ្យអធិការដ្ឋានខណ្ឌទួលគោកជួយដោះស្រាយសងជំងឺចិត្ត និងថ្លៃព្យាបាលឱ្យសមាជិកក្រុមរបស់គេដែលរងរបួស ដោយទាមទារជំងឺចិត្តចំនួន៥.០០០ដុល្លារ។
តាមនគរបាលខណ្ឌទួលគោកបានឱ្យដឹងថា កាលពីវេលាម៉ោង១០ និង៣០នាទីយប់ ថ្ងៃទី៥ មីនា ២០១៥ នៅចំណុចផ្សារ៧មករា មានទំនាស់វាយតប់គ្នាកើតឡើងផ្តើមចេញពីប្រពន្ធជាអ្នកលក់ឥវ៉ាន់ចាប់ហួយទាស់គ្នារឿងក្មេងៗមកលេងមុខតូបលក់ដូរ ហៅប្តីមកជួយអន្តរាគមន៍ផ្ទុះហិង្សាវាយតប់គ្នាបណ្តាលឱ្យរងរបួសទាំងសងខាង ភ្លាមៗនោះសមត្ថកិច្ចបានឃាត់ខ្លួនបុរសម្នាក់ឈ្មោះអ៊ុន ចិត្រា ភេទប្រុស អាយុ២៦ឆ្នាំ មានទីលំនៅផ្ទះលេខ៧៦ សង្កាត់បឹងកក់ទី២ យកមកសាកសួរ។
នៅចំពោះមុខសមត្ថកិច្ចបុរសឈ្មោះអ៊ុន ចិត្រា បានឱ្យដឹងថា មុនពេលកើតហេតុប្រពន្ធរបស់ខ្លួនបានឈ្លោះគ្នាជាមួយប្រពន្ធបុរសឈ្មោះចិត្ត សុភាព អាយុ៣៣ឆ្នាំ មានទីលំនៅផ្ទះលេខ១ ផ្លូវ៦១២ សង្កាត់បឹងកក់ទី២ ដែលជាសមាជិកក្រុមអ្នករត់រ៉ឺម៉កម៉ូតូ ពីរឿងក្មេងៗមកលេងមុខតូបលក់ដូរ ហើយខ្លួនបានចូលទៅឃាត់ ស្រាប់តែឈ្មោះសុភាព និងបក្សពួក៣នាក់ទៀតជិះរថយន្តមួយគ្រឿងមកវាយខ្លួន ខ្លួនក៏វាយតបវិញបណ្តាលឱ្យរបួសទាំងសងខាងតែម្តងគួរបញ្ជាក់ថា ឈ្មោះចិត្ត សុភាព មិនមែនជាអ្នករត់រ៉ឺម៉កម៉ូតូទេ តែបានចូលជាសមាជិកសមាគមរ៉ឺម៉កម៉ូតូ៕