ខេត្តប៉ៃលិន៖ ស្ត្រីម្នាក់បានផឹកថ្នាំពុលបាញ់ស្មៅ ប្រភេទទឹកខៀវ អស់ចំនួន៣កូនកែវស្រា ប៉ងធ្វើអត្តឃាត ព្រោះតែខឹងប្តីផឹកស្រាស្រវឹង វ៉ាយធ្វើបាបរាល់ថ្ងៃ មិនដែលលះ ត្រួវបានបងប្អួនដឹកតាមម៉ូតូយកមកសង្គ្រោះនៅមន្ទីរពេទ្យបង្អែកខេត្តប៉ៃលិនភ្លាមៗ ។ ហេតុការណ៏ស្ត្រីផឹកថ្នាំពុលព្រោះតែខឹងប្តី វ៉ាយធ្វើបាបនេះ បានកើតឡើងកាលពីវេលាម៉ោង៨និង៣០នាទីយប់ ថ្ងៃទី២៧ ខែមិនា ឆ្នាំ២០១៥ ស្ថិតនៅផ្ទះស្ត្រីរងគ្រោះ ក្នុងភូមិអូរអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ស្ត្រីរងគ្រោះឈ្មោះ សន សារីម អាយុ៤៩ឆ្នាំ ជាកសិករ (ផឹកថ្នាំពុលចំនួន៣កូនកែវស្រា) ។ ចំណែកប្តីដែលប្រមឹកខួបឈ្មោះ ព្រាប លឿង អាយុ៥២ឆ្នាំ ជាកសិករ ទាំងពីរនាក់រស់នៅភូមិអូរអិល ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីបងប្អួនស្ត្រីរងគ្រោះ បានឲ្យដឹងថា៖ មុនពេលកើតហេតុគេឃើញ បុរសជាប្តីមកពីលេងកីឡា ហើយផឹកស្រាស្រវឹង រអូរទាំ ទារកលុយពីស្ត្រីរងគ្រោះ តែស្ត្រីរងគ្រោះមិនឲ្យ ក៏ដេញចាប់វ៉ៃរហូតដល់សន្លប់ ដើម្បីយកលុយ តែត្រូវបានអ្នកជិតខាងជួយទាន់ ហើយបុរសជាប្តីបម្រុងបើកម៉ូតូកិនស្ត្រីរងគ្រោះទៀត កុំបានបងប្អូនជួយ កុំអីស្ត្រីរងគ្រោះស្លាប់បាត់ទៅហើយ ។ ប្រភពព័ត៌មានបន្តទៀតថា៖ ក្រោយមកស្រាប់តែឃើញស្ត្រីរងគ្រោះរត់ឡើងទៅលើផ្ទះ យកថ្នាំពុលប្រភេទទឹកខៀវ(ថ្នាំបាញ់ស្មៅ) មកផឹកចំនួន៣កូនកែវស្រា ពេលនោះបុរសជាប្តីក៏រត់ឡើងមកលើផ្ទះដែរ ឃើញស្ត្រីរងគ្រោះកំពុងចាក់ថ្នាំពុល ចូលកែវទៀត ក៏ខឹងហើយយកជើងទាត់កន្តុងថ្នាំពុល ធ្លាក់មកក្រោម ។ ប្រភពព័ត៌មានបន្តថា៖ ពេលនោះបងប្អួនដែលនៅខាងក្រោម ឃើញធ្លាក់កន្តុងថ្នាំពុល ក៏មានការភ្ញាក់ផ្អើល ស្ទុះឡើងទៅមើល ក៏ឃើញស្ត្រីរងគ្រោះ មានអាការៈក្អួតចង្អោរ ស្លេកស្លាំង ព្រមទាំងធុំក្លិនថ្នាំពុលក្នុងមាត់ ក៏នាំគ្នាដឹកស្ត្រីរងគ្រោះមកកាន់មន្ទីរពេទ្យបង្អែកខេត្តប៉ៃលិនផងដែរ ។
ប្រភពព័ត៌មានពី លោក អ៊ុក ទូច ជាអនុប្រធានសមាគមន៏ដំឡូងមីភូមិអូរអិល បានឲ្យដឹងថា៖ តាមដែលលោកដឹងគ្រួសារមួយនេះ បានគ្នាជាង១០ឆ្នាំមកហើយ មានកូនចំនួន៦នាក់ ក្នុងនោះស្រី៣នាក់ ជាទូទៅគ្រួសារនេះ តែងតែមានអំពើហិង្សា សឹងជារៀងរាល់ថ្ងៃ ដោយបុរសជាប្តីឈ្មោះ ព្រាប លឿង តែងតែធ្វើបាប ស្ត្រីជាប្រពន្ធឈ្មោះ សន សារឹម ជារហូត ។ ប្រភពបន្តថា៖ ពេលបុរសជាប្តី មកពីលេងកីឡា ឬមកពីផ្ទះមិត្តភ័ក្ត តែងតែស្រវឹង រហូត ហើយពេលស្រវឹងម្តងៗ រអូរទាំ ជេរបញ្ជោរ វ៉ៃធ្វើបាបប្រពន្ធ មិនដែលលះថ្ងៃ រហូតដល់មានស្នាមរបួសដល់កូនៗទៀតផង ។ នៅថ្ងៃកើតហេតុក៏មិនខុសគ្នាដែរ គឺបុរសជាប្តីស្រវឹងស្រា វ៉ៃធ្វើបាបប្រពន្ធ ពេលនោះស្ត្រីរងគ្រោះខឹង ក៏ទៅយកថ្នាំពុលមកផឹក ដើម្បីបញ្ចប់ជីវិត តែសំណាងល្អ បានបងប្អូន ក្រុមគ្រួសារឃើញទាន់ ក៏ដឹកទៅសង្គ្រោះនៅមន្ទីរពេទ្យភ្លាមៗ ។
បច្ចុប្បន្នក្រុមគ្រូពេទ្យ កំពុងលើកស្ត្រីរងគ្រោះ មកលាងក្រពះ ដើម្បីលាងឲ្យអស់ជាតិពុលក្នុងក្រពះ ក្រោយពីគ្រូពេទ្យលាងក្រពះរួច ក៏ឲ្យស្ត្រីរងគ្រោះសម្រាកព្យាបាលនៅមន្ទីរពេទ្យ ដើម្បីតាមដានមើលស្ថានភាពស្ត្រីរងគ្រោះបន្តទៀត ៕