យុវជនមួយក្រុមមានគ្នាប្រមាណជិត១០នាក់ មានម៉ូតូ៤គ្រឿងបានជិះប្រដេញ គ្នាតាម ផ្លូវសាធារណៈ ក្នុងល្បឿនយ៉ាងលឿន ជ្រេពេញផ្លូវក៏ជ្រុលទៅបុករថយន្តសេរីទំនើបមួយគ្រឿង បណ្តាលឱ្យរងការខូចខាត តែម្ចាស់រថយន្តចិត្តធម៌មិនរករឿង ។ ហេតុការណ៍នេះបានកើត
ឡើងកាលពីវេលាម៉ោង៩នឹង១៥នាទីយប់ថ្ងៃទី ១៤ ខែឧសភា ឆ្នាំ២០១៥ ខាងលិចរង្វង់មូលសម្តេចជួនណាត ស្ថិតក្នុងសង្កាត់ចតុមុខ ខណ្ឌដូនពេញ ។
ប្រភពពត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញយុវជនមួយក្រុមមានគ្នាប្រមាណជិត១០នាក់ មានម៉ូតូ៤គ្រឿងបានជិះប្រដេញគ្នាតាមផ្លូវសាធារណៈ ក្នុងល្បឿនយ៉ាងលឿនជ្រេពេញផ្លូវ ព្រះសីហនុ ទិសដៅពីជើងទៅត្បូងខណះមកដល់ចំណុចកើតហេតុ ម៉ូតូឌ្រីមសេ១២៥ សេរីឆ្នាំ ២០១៥ ពាក់ស្លាកលេខភ្នំពេញ1CV-9112គេចមិនផុតក៏ជ្រុលទៅបុករថយន្តសេរីទំនើបមួយគ្រឿង ម៉ាក Alphard V6 ពាក់ស្លាកលេខ 2AV-0007 បណ្តាលឱ្យរងការខូចខាតផ្នែកខាងមុខ ។
ប្រភពដដែលបន្តថាក្រោយកើតហេតុយុវជនដែលជាអ្នកជិះម៉ូតូបុករថយន្តនោះ បានសុំអភ័យទោសពីម្ចាស់រថយន្ត ហើយម្ចាស់រថយន្តមានចិត្តធម៌ក៏បានមិនរករឿងអ្វីនោះដែរ ព្រោះគ្រាន់តែខូចខាតរថយន្តបន្តិចបន្តួចតែប៉ុណ្ណោះ និងមិនចង់រំខានដល់សមត្ថកិច្ចផងដែរ ៕
