បាត់ដំបង: ជនសង្ស័យម្នាក់ដែលជាមុខសញ្ញាលក់ និងចែកចាយគ្រឿងញៀនយ៉ាងសកម្ម ត្រូវបានសមត្ថកិច្ចជំនាញនៃស្នងការដ្ឋាននគរបាលខេត្ត ឃាត់ខ្លួនបានកាលពីថ្ងៃទី15-5-15 វេលាម៉ោង4,30នាទីល្ងាច ត្រង់ចំនុចភូមិព្រៃទទឹង ឃុំអូរតាគី ស្រុកថ្មគោល ខេត្តបាត់ដំបង ខណ:ដែលជននេះកំពុងធ្វើសកម្មភាពលក់ និងចែកចាយគ្រឿងញៀនជាក់ស្តែង។
លោកស៊ាន សុណាល់ នាយការិយាល័យស្តីទី នៃការិយាល័យនគរបាលប្រឆាំងគ្រឿងញៀន
បានបញ្ជាក់ថា ក្រោយពីទទួលបានព័ត៌មានលើករណីលក់ ចែកចាយគ្រឿងញៀនខុសច្បាប់រួចមកលោកបានចាត់កំលាំងអោយចេញប្រតិបត្តិការទៅកាន់ចំនុចខាងលើ ក៏បានប្រទះឃើញមុខសញ្ញាកំពុងធ្វើសកម្មភាពជាក់ស្តែងក្នុងការលក់ និងចែកចាយគ្រឿងញៀននៅនឹងផ្ទះរបស់គេផ្ទាល់។បន្ទាប់ពីបានសុំគោលការទៅលោកព្រះរាជអាជ្ញារួចមក កំលាំងជំនាញបានចូលទៅឃាត់ខ្លួនជនសង្ស័យរូបនេះនាំមកកាន់ការិយាល័យដើម្បីសាកសួរ ព្រមទាំងបានប្រមូលនូវវត្ថុតាងមួយចំនួនដែលពាក់ព័ន្ធនឹងបទល្មើសដូចជា គ្រឿងញៀនប្រភេទម៉ាទឹកកកចំនួន10កូនថង់តូចស្មើនឹងទម្ងន់1,52ក្រាម អាវុធច្នៃសម្រាប់បាញ់កណ្តុរចំនួនពីរដើម ទូរស័ព្ទដៃមួយគ្រឿង និងឧបករណ៍សម្រាប់សេពគ្រឿងញៀនមួយចំនួន។
លោកនាយការិយាល័យស្តីទីបានបន្ថែមថា ជនសង្ស័យរូបនេះមានឈ្មោះឈឿន ចំរីុ
ភេទប្រុស អាយុ23ឆ្នាំ មានអាស័យដ្ឋានស្ថិតនៅត្រង់ចំនុចប្រតិបត្តិការខាងលើ ដោយគេបានសារភាពថា គេទើបនឹងចាប់ផ្តើមរកស៊ីនូវមុខរបរនេះនៅពេលថ្មីៗនេះឯង ហើយក៏ត្រូវសមត្ថកិច្ចឃាត់ខ្លួនបាន។ទោះបីជាគេមិនបានសារភាពអោយបានក្បោះក្បាយក៏ដោយ ក៏សមត្ថកិច្ចបានកំណត់យ៉ាងច្បាស់ថាគឺជាមុខសញ្ញា់ក៏ និងចែកចាយគ្រឿងញៀនខុសច្បាប់ជាយូរមកហើយ ដែលកំលាំងបានតាមប្រមាញ់ស្ទើររាល់ថ្ងៃប៉ុន្តែមិនមានឱកាសក្នុងការឃាត់ខ្លួនតែប៉ុណ្ណោះ។បច្ចុប្បន្នជនសង្ស័យត្រូវបានការិយាល័យជំនាញរៀបចំបញ្ជូនខ្លួនរួមទាំងវត្ថុតាងទៅកាន់សាលាដំបូងហើយ៕
