ខេត្តកំពង់ឆ្នាំង៖នៅក្នុងរដូវបិតនេសាទដែលជារដូវត្រីពងកូននេះ នៅក្នុងតំបន់អភិរក្សពូជត្រីចំណុចបឹងធំព្រែកថ្លាន់ ឃុំកំពង់ព្រះគគីរ ស្រុកបរិបូរណ៌ កើតមានបទល្មើសដាក់របាំងសាច់អួនចាប់ត្រីដោយខុសច្បា ប់ជាងមួយពាន់ម៉ែត្រ មិនត្រូវបានអាជ្ញាធរ និងជំនាញចុះបង្ក្រាបនោះឡើយ បទល្មើសនេះត្រូវបានអ្នកកាសែតមួយក្រុមស្រាវជ្រាវរកឃើញ នៅព្រឹកថ្ងៃទី០៩ ខែសីហា ឆ្នាំ២០១៥។ ប្រជានេសាទក្រៅតំបន់អភិរក្សបាននិយាយអោយដឹងថា៖នៅចំណុចខាងលើនេះពួកគាត់បានឃើញគេបើកកាណូតចេញចូលលើកយកត្រីជិត១ខែមកហើយ និងត្រូវបានគេដឹងថាជនល្មើសជាម្ចាស់របាំងខាងលើនេះគឺជាប្រជាពលរដ្ឋនៅភូមិប្រឡាយមាស ឃុំប្រឡាយមាស ស្រុកកំពង់លែង។
ដោយឡែកប្រជាពលរដ្ឋនៅក្នុងភូមិកោះតាម៉ូវ ឃុំកំពង់ព្រះគគីរ ក៏បានអោយដឹងដែរថា៖នៅចំណុចក្រាលកោះស្ទឹងពោធិ ក្នុងតំបន់អភិរក្សឃុំកំពង់ព្រះគគីរ ក៏មានបទល្មើសដាក់របាំងសាច់អួនចាប់ត្រីរាប់រយម៉ែត្រផងដែរ ដែលពុំមានអ្នកណាបង្ក្រាបឡើយ។
លោក សោម ភិរុណ នាយខណ្ឌ័រដ្ឋបាលជលផលកំពង់ឆ្នាំង បាននិយាយបញ្ជាក់អោយដឹងនៅល្ងាចថ្ងៃទី០៩ ខែសីហា ឆ្នាំ២០១៥ ថា៖លោកពុំធ្លាប់បានទទួលព័ត៌មានពីសង្កាត់នេសាទស្រុកបរិបូរណ៌ថាមានបទល្មើសក្នុងតំបន់អភិរក្ស នៅចំណុចទាំង២ខាងលើនេះឡើយ ករណីនេះលោកនិងបញ្ជារអោយមន្ត្រីខណ្ឌ័ និងមន្ត្រីសង្កាត់ចុះទៅបង្ក្រាបនៅថ្ងៃស្អែកនេះជាបន្ទាន់ ដោយមិនទុកអោយកើតមានបែបនេះនៅក្នុងតំបន់អភិរក្សតទៅទៀតនោះឡើយ។
ទាក់ទងនិងបទល្មើសខាងលើនេះលោក ម៉ូត សៀងហេង នាយសង្កាត់រដ្ឋបាលជលផលបរិបូរណ៌
បាននិយាយអោយដឹងដែរថា៖ចំណុចបឹងធំខាងលើនេះមិនស្ថិតនៅក្នុងតំបន់អភិរក្សនោះឡើយ ហើយលោកក៏មិនបានដឹងថាមានបទល្មើសនៅចំណុចនេះដែរ នៅព្រឹកថ្ងៃទី១០ ខែសីហា ឆ្នាំ២០១៥នេះ លោកនិងដឹកនាំកម្លាំងសមត្ថកិច្ចក្នុងសង្កាត់នេសាទ ចុះទៅពិនិត្យបើមានបទល្មើសនេះមែនលោកនឹងធ្វើការបង្ក្រាបអោយអស់ ទោះបីស្ថិតនៅក្រៅតំបន់អភិរក្សក៏ដោយ។ទាក់ទងនិងការចុះបង្ក្រាបបទល្មើសនេសាទនេះវិញ មន្ត្រីជលផលមួយចំនួនបានលួចខ្សឹបអោយដឹងថា៖ថ្នាក់លើមិនបានបើកផ្តល់របបប្រេងអោយតា
មខេត្តរយះពេល៥ខែមកហើយ ការចុះបង្ក្រាប់បទល្មើសកន្លងមកគឺត្រូវជំពាក់លុយថ្លៃប្រេងគេរាប់លានរៀល មិនដឹងថាពេលណាថ្នាក់លើបើកប្រេងរបបប្រចាំខែអោយតាមខណ្ឌ័ តាមខេត្តវិញនោះទេ។ ប្រជាពលរដ្ឋជាប្តី និងប្រពន្ធកំពុងលើកលបត្រីកញ្ចុះតាមរបាំងដើមត្រែង ដែលពួកគាត់បានដាក់ខ្លីៗជាប់ចំណុចបឹងធំ ព្រែកថ្លាន់ខាងលើនេះ បាននិយាយអោយដឹងថា៖ប្តីប្រពន្ធលោករស់នៅភូមិដំណាក់រាជ្យ ឃុំកំពង់ព្រះគគីរ បានមកធ្វើចំការនៅចំណុចនេះ និងក៏បានដឹងដែរថាចំណុចនេះគឺជាតំបន់អភិរក្សប៉ុន្តែពួកលោក គ្រាន់តែបោះរបាំងព្រួលត្រែងខ្លីៗដាក់លបត្រីកញ្ចុះយកហូបតែប៉ុណ្ណោះ តែពួកលោកក៏បានបង់ប្រាក់ចំនួន៥ម៉ឺនរៀលអោយលោកប្រធានសហគមន៍នេសាទឃុំកំពង់ព្រះគគីរដែរ ទើបដាក់របាំងព្រួលត្រែងចាប់ត្រីបាននៅចំណុចនេះ។ ក្រៅពីតំបន់អភិរក្សខាងលើនេះ នៅតាមតំបន់នេសាទមួយចំនួនក្នុងស្រុកបរិបូរណ៌ និងស្រុកកំពង់លែង នៅក្នុងរដូវបិតនេសាទនេះក៏មានបទល្មើសដាក់របាំងសាច់អួនចាប់ត្រីរាប់រយកន្លែងផងដែរ មិនត្រូវបានគេបង្ក្រាបនោះឡើយ មិនតែប៉ុណ្ណោះយើងឃើញមានកាណូតឈ្មួញចុះទិញត្រីតាមរបាំងបទល្មើសទាំងនោះជារៀងរាល់ថ្ងៃទៀតផង មិនត្រូវបានសមត្ថកិច្ចជំនាញទប់ស្កាត់ឡើយដែលជាហេតុ ធ្វើអោយបទល្មើសកាន់តែកើតច្រើនឡើងៗ៕