ខេត្តសៀមរាប៖ នៅចុងសប្តាហ៏ ខែសីហា ឆ្នាំ២០១៥នេះ គេឃើញមានការជួបជុំរបស់បងប្អូនប្រជាពលរដ្ឋមូលដ្ឋានជនបទនៃឃុំរុនតាឯក ក្នុងតំបន់ការពាររមណីយដ្ឋានអង្គរ ស្រុកបន្ទាយស្រី ខេត្តសៀមរាប ជាមួយនឹងចាស់ព្រឹទ្ធាចារ្យ ព្រមទាំងមានការនិមន្តចូលរួមពី
សំណាក់ព្រះសង្ឃផងដែរ ក្រោមទិដ្ឋភាពដ៏សាមញ្ញមួយនៃការរៀបចំពិធីបើកការដ្ឋានសាងសង់មណ្ឌលសុខភាពមួយកន្លែង ជាមួយនឹងគម្រោងថវិកា 69,000 $ ដែលក្នុងនោះ រួមមានមូលនិធិសប្បុរសធម៌នៃជនរួមជាតិស្វីស តាមរយៈលោក សាលា អង់រីកូ ចំនួន 65,000 $ និង ថវិកាបដិភាគស្ម័គ្រចិត្តរបស់ប្រជាពលរដ្ឋប្រមាណ 4,000 $ បន្ថែមទៀត ។
នេះ ! បើតាមការឲ្យដឹងរបស់លោក ថាប់ សារ៉ន ប្រធានក្រុមប្រឹក្សាស្រុកបន្ទាយស្រី ដែលបានថ្លែងប្រាប់ប្រជាជន នៅក្នុងឱកាសបើកការដ្ឋាននោះ ។ លោក ថាប់ សារ៉ន ក៏បានឲ្យដឹងបន្ថែមទៀតដែរថា ៖ នៅក្នុងចំណោមបណ្តាឃុំទាំង៦ របស់ស្រុកបន្ទាយស្រី ឃុំរុនតាឯក គឺជាឃុំប្អូនពៅគេ ដែលបានទទួលការសាងសង់មណ្ឌលសុខភាព និងមានន័យថា ក្រោយពីការសាងសង់មណ្ឌលសុខភាពមួយនេះរួចរាល់ជាស្ថាពរ ស្រុកបន្ទាយស្រី មានមណ្ឌលសុខភាពគ្រប់ឃុំហើយ តាមផែនការកំណត់របស់រាជរដ្ឋាភិបាល ។ លោកបានបន្តបញ្ជាក់ទៀតថា ការកសាងបង្កើតមណ្ឌលសុខភាពឃុំរុនតាឯកនេះ គឺត្រូវបានការគាំទ្រពីសំណាក់អាជ្ញាធរជាតិអប្សរា និងមានកិច្ចសហការជួយជ្រោមជ្រែងពីសំណាក់មន្ទីរសុខាភិបាលខេត្តសៀមរាប ផងដែរ ។ មណ្ឌលសុខភាពទាំង៦របស់ស្រុកបន្ទាយស្រី ចំនួន២កន្លែងជាអំណោយរបស់អង្គការភ្លែនកម្ពុជា ចំនួន៣កន្លែងទៀត កសាងឡើងដោយមូលនិធិសង្គម និងមួយកន្លែងចុងក្រោយនេះ គឺជាអំណោយរបស់មូលនិធិសប្បុរសធម៌ នៃជនរួមជាតិស្វីស តាមរយៈ លោក សាលា អង់រីកូ ។
លោក សាញ់ សុធារ៉ា ដែលជាទីប្រឹក្សារបស់លោក សាលា អង់រីកូ បានថ្លែងនូវការកោតសរសើរចំពោះលោក សូរ សុន អភិបាលស្រុកបន្ទាយស្រី ដែលបានជួយចលនាស្ម័គ្រចិត្តនៃប្រជាពលរដ្ឋឲ្យមានការចូលរួមបដិភាគ ដោះស្រាយការរកទីតាំង ការចាក់ដី ការធើ្វរបងជាដើម ក្នុងស្មារតីសាមគ្គីភាព ដើម្បីបង្កើតឡើង នូវសមិទ្ធផលរួមមួយ ប្រយោជន៍បានផ្តល់សេវាសុខាភិបាលសាធារណៈនៅមូលដ្ឋាន ។ លោកថា វាពិតជាមានអត្ថន័យដ៏ជ្រាលជ្រៅខ្លាំងណាស់ សម្រាប់ការចាប់បដិសន្ធិ មណ្ឌលសុខភាពមួយនេះ ។
លោក សាញ់ សុធារ៉ា បានបង្ហាញថា ៖ មូលនិធិសប្បុរសធម៌នៃជនរួមជាតិស្វីស ដែលបានផ្តល់ឲ្យតាមរយៈ លោក សាលា អង់រីកូ សម្រាប់ការសាងសង់មណ្ឌលសុខភាពនៅឃុំរុនតាឯកនេះ វាគឺជាចំណែកមួយ នៅក្នុងគម្រោងមូលនិធិសប្បុរសធម៌នៃជនរួមជាតិស្វីស ប្រមាណជា 255,000 $ ដែលលោក សាលា អង់រីកូ បានអំពាវនាវស្វែងរកសម្រាប់ឆ្នាំ២០១៥ ក្នុងការផ្តល់ជួយដល់ខេត្តសៀមរាប និងឧត្តរមានជ័យ ក្នុងនោះសមិទ្ធផលដែលបានកសាងរួច និងបានដាក់ឲ្យដំណើរការរួមមាន អាគារសិក្សា ៣ខ្នង ស្មើនឹង ១៤បន្ទប់ ! មណ្ឌលសុខភាពរុនតាឯក កំពុងដំណើរការសាងសង់ និងអាគារពេទ្យចំនួន២អាគារទៀត កំពុងត្រៀមដំណើរការសាងសង់ គឺអាគារសមធម៌ សម្រាប់ទទួលសេវាព្យាបាលជម្ងឺគ្រួសារប្រជាពលរដ្ឋក្រីក្រនៅមន្ទីរពេទ្យបង្អែកសូទ្រនិគម ខេត្តសៀមរាប និង អាគារសម្ភព រោគស្ត្រី ១ខ្នងទៀត ជាគម្រោងសាងសង់នៅខេត្តឧត្តរមានជ័យ ។
ជាមួយការបើកការដ្ឋាននេះ លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បាននិយាយបញ្ជាក់តាមទូរស័ព្ទ ថា ៖ ការដ្ឋានសាងសង់មណ្ឌលសុខភាពឃុំរុនតាឯក គឺជាការធ្វើដំណើរមួយជំហានទៀត នៃការអនុវត្តផែនការកសាងមណ្ឌលសុខភាព ( ១ឃុំ ត្រូវមានមណ្ឌលសុខភាពចំនួន១កន្លែង ) ឆ្ពោះទៅរកគោលនយោបាយផ្តល់សេវាសុខភាពសាធារណៈ មានប្រសិទ្ធភាពជូនប្រជាពលរដ្ឋ ។ លោកបានប្រាប់ឲ្យដឹងទៀតថា ក្រោយពីការកសាងមណ្ឌលសុខភាពនេះរួច ខេត្តសៀមរាបមានមណ្ឌលសុខភាពចំនួន ៩០ឃុំ / ១០០ឃុំ ហើយនៅក្នុងចំណោមមណ្ឌលសុខភាពដែលបានកសាងរួចហើយចំនួន ៩០ ឃុំ គឺមានមណ្ឌលសុខភាពចំនួន ១៤កន្លែង ដែលជាអំណោយរបស់មូនិធិសប្បុរសធម៌នៃជនរួមជាតិស្វីស តាមរយៈ លោក សាលា អង់រីកូ ។
លោកប្រធានមន្ទីរសុខាភិបាល បានថ្លែងនូវចំណាប់ប់អារម្មណ៍ថា ៖ វាមានប្រយោជន៍ច្រើនណាស់ សម្រាប់ការបង្កើតឡើងនូវមណ្ឌលសុខភាពគ្រប់កន្លែងនៅមូលដ្ឋានឃុំ ពិសេសគឺបណ្តាឃុំជនបទ ហើយអ្វីដែលយើងចាប់យកបានមុនគេ គឺការកាត់បបន្ថយ ការសម្រាលកូននៃមាតាតាមផ្ទះ ដោយឆ្មបបូរាណ គ្មានជំនាញ មិនបានឆ្លងកាត់ការបណ្តុះបណ្តាលត្រឹមត្រូវ ដែលបណ្តាលឲ្យមានអត្រាគ្រោះថ្នាក់ខ្ពស់បំផុត ទាំងសុខភាព ជីវិតរបស់ម្តាយ និង ទារក ៕ 
