កំពង់ឆ្នាំង៖ លោកបណ្ឌិត ចេង ញ៉ាន់ អភិបាលរងខេត្ត និងលោក សោម ភិរុណ នាយខ័ណ្ឌរដ្ឋបាលជលផលកំពង់ឆ្នាំង នៅព្រឹកថ្ងៃទី១៣ ខែមករា ឆ្នាំ២០១៦ បានចុះពង្រឹងកម្លាំងចំរុះទាំងអស់ដែលបានឈរជើងការពារតំបន់ឡូតិអភិរក្សធនធានជលផលចំនួន៧កន្លែង នៅក្នុងខេត្តកំពង់ឆ្នាំង ក្នុងគោលបំណងថែរក្សាអោយបានមច្ឆាជាតិ នៅក្នុងដែនអភិរក្សអោយមាននិរន្តរភាព និងលុបបំបាត់នូវបទល្មើសគ្រប់ប្រភេទក្នុងតំបន់អភិរក្ស។ ការចុះពិនត្យ និងពង្រឹងកម្លាំង ក៍បានការដាក់សញ្ញាសំគាល់ដែនអភិរក្សផងដែរ នៅចំណុចឡូត៍អភិរក្សលេខ៤ ស្ថិតក្នុងភូមិជ្រោយបបុស សង្កាត់ផ្សារឆ្នាំង ក្រុងកំពង់ឆ្នាំង ដែលមានការចូលរួមពី មន្ត្រីខ័ណ្ឌរដ្ឋបាលជលផល និងកងកម្លាំងសមត្ថកិច្ចទាំង៣ប្រភេទ។
នៅក្នុងពេលចុះពិនិត្យ និងពង្រឹងកម្លាំងការពារនេះ លោកបណ្ឌិត ចេង ញ៉ាន់ អភិបាលរងខេត្តកំពង់ឆ្នាំងបានមានប្រសាសន៍ផ្តាំផ្ញើថា៖ យោងតាមអនុសាសន៍ដ៍ខ្ពង់ខ្ពស់របស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ក្នុងទិវាមច្ឆាជាតិកាលពីថ្ងៃទី០១ ខែកក្កដា ឆ្នាំ២០១៥ នៅស្រុកសាមគ្គីមានជ័យខេត្តកំពង់ឆ្នាំង គឺសម្តេចចង់អោយអ្នកមានកាតព្វកិច្ចទាំងអស់ រាប់ទាំងអាជ្ញាធរគ្រប់ជាន់ថ្នាក់ កងកម្លាំងប្រដាប់អាវុធទាំង៣ សមត្ថកិច្ចរដ្ឋបាលជលផល ប្រជាការពារ និងប្រជាពលរដ្ឋ ចូលរួមសហការទប់ស្កាត់បទល្មើសនេសាទទាំងឡាយដែលកើតមានក្នុងដែនអភិរក្ស និងរក្សាអោយបាននូវធនធានជលផលក្នុងតំបន់អភិរក្សគ្រប់កន្លែង ជាពិសេស គឺទប់ស្កាត់ការកាប់បំផ្លាញតំបន់ព្រៃលិចទឹកអោយបានគង់វង្ស។ លោកបណ្ឌិតបានបន្តថា ប្រសិនបើលោករកឃើញថា អ្នកដែលមានភារកិច្ចការពារដែនអភិរក្សបែរជាបង្កើតបទល្មើសក្នុងដែនអភិរក្សដែលខ្លួនទទួលខុសត្រូវនោះ នឹងត្រូវទទួលទោសតាមច្បាប់ និងមិនអនុគ្រោះអោយបានឡើយ។
លោក សោម ភិរុណ នាយខ័ណ្ឌរដ្ឋបាលជលផលបានថ្លែងថា៖ ខេត្តកំពង់ឆ្នាំងមានដែននេសាទលាតសន្ធឹងចាប់ពីក្បាលកោះលង្វែកស្រុកកំពង់ត្រឡាច រហូតដល់តំបន់ឆ្នុកទ្រូស្រុកបរិបូណ៌មានបណ្តោយប្រវែង១១០គម។ ក្រៅពីនេះភូមិសាស្ត្រនៃព្រៃលិចទឹកមានមានទំហំជិត៩ម៉ឺនហិកតាដែលជាដែនជំរកមច្ឆាជាតិដ៍សំខាន់។ ក្នុងនោះព្រៃលិចទឹកស្ថិតក្នុងតំបន់ការពារមានទំហំសរុបជាង៧ម៉ឺនហិកតា ដែលបច្ចុប្បន្នបានចែកជាតំបន់អភិរក្ស៧ឡូត៍ កន្លែងអភិរក្សជលផលរបស់សហគមន៍មាន៤១កន្លែង និងជម្រកត្រីសហគមន៍មាន២៣កន្លែង៕( 
