ខេត្តបន្ទាយមានជ័យ៖កំលាំងមូលដ្ឋានកងរាជអាវុធហត្ថក្រុងប៉ោយប៉ែតដឹកនាំដោយលោក អនុសេនីយ៍ ទោ សរសុភត្រា មេបញ្ជាការរងនិងជាប្រធានស្នាក់ការមូលដ្ឋានកងរាជអាវុធហត្ថក្រុងប៉ោយប៉ែត នៅវេលាម៉ោង១ថ្ងៃនៅថ្ងៃទី២១ខែមករា ឆ្នាំ២០១៦ ចុះល្បាតនៅចំណុចសំណង់ហ្គូតឡាក់ ក្នុងភូមិប្រជាធម្ម សង្កាត់ផ្សាកណ្ដាល ក្រុងប៉ោយប៉ែត ខេត្តបន្ទាយមានជ័យ ធ្វើការឃាត់ ខ្លួនបានជនសង្ស័យចំនួន២នាក់ដែលកំពុងនាំគ្នាលួចប្រើប្រាស់គ្រឿងញៀននិងដកហូតបានវត្ថុតាងគ្រឿងញៀនមេតំហ្វេតាមីនទឹកកក១ថង់តូចស្មើនិង០.២០ក្រាម ទូរស័ព្ទដៃចំនួន១គ្រ៉ឿងបំពង់សំរាប់ជក់មួយ ចំនួនធំហើយបញ្ជូនមកទីបញ្ជាការកងរាជអាវុធហត្ថខេត្ត។
លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យបានឲ្យដឹងថាជនសង្ស័យទាំង២នាក់មានឈ្មោះ១/តាន់ គឹមឡូវ ភេទ ប្រុស អាយុ២៣ឆ្នាំ មុខរបរជាកម្មកររស់នៅក្នុងភូមិប្រជាធម្ម សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ២/ឈ្មោះសុភាន វ៉ាន់ដា ហៅ(អាខៀវ)ភេទប្រុស អាយុ១៧ឆ្នាំ មុខរបរជាកម្មករ រស់នៅក្នុងភូមិ ប្រជាធម្ម សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
លោកឧត្ដមសេនីយ៍ត្រី ឱ បូរិន្ទ បានបញ្ជាក់ទៀតថាក្រោយពីអាវុធហត្ថសាកសួរួចមកជនសង្ស័យទាំង២នាក់បានឆ្លើយសារភាពថាខ្លួនទាំង២នាក់ពិតជាបានទិញគ្រឿងញៀមយកជក់ពិតប្រាកដមែន។ដោយមានវត្ថុតាងនិងមានចម្លើយសារភាពផងនោះជនសង្ស័យទាំង២នាក់នោះត្រូវបានអាវុធហត្ថកសាងសំណុំរឿងបញ្ជូនទៅតុលាការដើម្បីដាក់ទោសទៅតានផ្លូវច្បាប់៕ដោយ:ឃិន គន្ធា
