ខេត្តប៉ៃលិន៖ ពលរដ្ឋទីទាល់ក្រចាស់ជរា និងជនពិការក្នុងស្រុកសាលាក្រៅ ត្រួវបានលោកជំទាវ បាន ស្រីមុំ អ្នកតំណាងរាស្ត្រមណ្ឌលបៃលិន និងក្រុមការងារ ចុះចែកអំណោយមនុស្សធម៌ជាអាវរងារ និងជួបសំណេះសណាលសួរសុខទុក្ខពីសុខភាព ខណៈពេលរដូវត្រជាត់ចូលមកដល់ ហើយអាកាស់ធាតុក្នុងខេត្តប៉ៃលិន ចុះត្រជាត់ខ្លាំង រហូតដល់១៣អង្សារសេ បើធៀបតាមបណ្តាខេត្តមួយចំនួនក្នុងប្រទេសកម្ពុជា ។ ដែលពិធីនេះ ត្រួវបានប្រព្រិត្តទៅនៅព្រឹកថ្ងៃទី០៩ ខែកុម្ភៈ ឆ្នាំ២០១៦ ស្ថិតក្នុងភូមិថ្នល់ទទឹង ឃុំអូរអណ្តូង និងភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ដោយមានប្រជាពលរដ្ឋចូលរួមចំនួន២០៥នាក់ ។
ប្រភពព័ត៌មានពីក្រុមការងារ បានឲ្យដឹងថា៖ ដោយមើលឃើញពីសុខមាលភាពប្រជាពលរដ្ឋ និងការប្រែប្រួលអាកាសធាតុផងនោះ ទើបនៅថ្ងៃនេះលោកជំទាវ បាន ស្រីមុំ អ្នកតំណាងរាស្ត្រគណបក្សប្រជាជនកម្ពុជា មណ្ឌលប៉ៃលិន ព្រមទាំងក្រុមការងារ បានអញ្ជើញជួបសំណេះសំណាល សួរសុខទុក្ខ ពុកម៉ែបងប្អូនប្រជាពលរដ្ឋចាស់ជរា និងជនពិការ ។ ប្រភពបន្តថា៖ នេះសរបញ្ជាក់ឲ្យឃើញថា លោកជំទាវ បាន ស្រីមុំ តែងតែយកចិត្តទុកដាក់អំពីបញ្ហាសុខភាពប្រជាពលរដ្ឋ ជាចំបង ,ប្រសិនបើយើងមានសុខភាពល្អ នោះនិងធ្វើឲ្យប្រទេសយើងរីកចំរីនផងដែរ ។ ចំណែកភូមិដែលមានប្រជាពលរដ្ឋមកចូលរួម ចំនួន១៣ភូមិ និង៣ឃុំ ក្នុងស្រុកសាលាក្រៅ ខេត្តប៉ៃលិន ។
ក្នុងឪកាសនោះ លោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន បានពាំនាំនូវការ ផ្តាំផ្ញើសួរសុខទុក្ខ និងក្តីបារម្មណ៍ ចំពោះពុកម៉ែបងប្អូនប្រជាពលរដ្ឋ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចទាំងពីរ តែងតែយកចិត្តទុកដាក់ ព្រមទាំងរួមសុខរួមទុក្ខជាមួយប្រជាពលរដ្ឋគ្រប់កាលៈទោសៈ និងសូមឲ្យបងប្អូនប្រជាពលរដ្ឋទាំងអស់ថែរក្សាសុខភាពឲ្យបានល្អគ្រប់ៗគ្នា ។ 
លោកជំទាវ បាន ស្រីមុំ មានប្រសាសន៏បន្តថា៖ ក្នុងនាមលោកជំទាវជាអ្នកតំណាងរាស្ត្រគណបក្សប្រជាជន មណ្ឌលប៉ៃលិន ដែលពេលនេះជារដូវត្រជាក់ ហើយខេត្តប៉ៃលិន ជាតំបន់ដែល មានព្រៃនិងភ្នំ មានអាកាសធាតុចុះត្រជាក់ខ្លាំង រហូតដល់១៣ ទៅ១៤ អង្សាសេ បើប្រៀបធៀបតាមបណ្តាខេត្តផ្សេងៗ ហេតុនេះ សូមបងប្អូនទាំងអស់មេត្តាថែរក្សាសុខភាពឲ្យបានល្អ ចំណែកក្នុងការរស់នៅត្រូវមានអនាម័យ មានការបរិភោគស្អាត ហើយប្រសិនមានជំងឺសូមអញ្ជើញទៅពិនិត្យ និងព្យាបាលជំងឺដោយឥតគិតថ្លៃ នៅការិយាល័យតំណាងរាស្ត្រ ។ លោកជំទាវមានប្រសាសន៏បន្តថា៖ នៅការិយាល័យតំណាងរាស្ត្រ មានកម្មវិធីមនុស្សធម៌ជាច្រើនសម្រាប់ជួយដល់ ស្ត្រី កុមារដែលមានជំងឺ ព្រមទាំងគ្រួសាររងគ្រោះដោយគ្រោះមហន្តរាយផ្សេងៗ និងជនចាស់ជរាក្រីក្រគ្មានទីពឹង ដោយមិនប្រកាន់និន្នាការនយោបាយ សាសនាអ្វីឡើយ ហើយទាំងនេះ គឺដោយមានការដឹកនាំដ៏ត្រឹមត្រូវ របស់គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្ត្រី បាននាំមកនូវសុខសន្តិភាព ស្ថេរភាពនយោបាយ និងការអភិវឌ្ឍន៍ទូទាំងប្រទេស ។ 
ជាមួយគ្នានេះដែរលោកជំទាវ បានជំនុញឲ្យបងប្អូនប្រជាពលរដ្ឋទាំងអស់ ដែលពុំទាន់មានអត្តសញ្ញាណប័ណ្ណសញ្ជាតិខ្មែរ សូមទៅធ្វើអត្តសញ្ញាណបណ្ណ័ឲ្យបានគ្រប់គ្នា ដែលមន្ត្រីអត្តសញ្ញាណប័ណ្ណកំពុងចុះធ្វើតាមភូមិ ឃុំរបស់បងប្អួន ដើម្បីងាយស្រួលសំគាល់អត្តសញ្ញាណ ជាពិសេសងាយស្រួលក្នុងការចូលរួមបោះឆ្នោតនាពេលខាងមុខ ។ អំណោយដែលផ្តល់ជួនប្រជាពលរដ្ឋនាពេលនោះ ម្នាក់ៗទទួលបាន អាវរងារ ០១ ដែលជាអំណោយរបស់ឯកឧត្តម អ៊ី ឈាន នាយករងខុទ្ទកាល័យសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន ដោយឡែកកុមារា កុមារី ទទួលបានខោរអាវ ងារ ១ សម្រាប់ ,នំ ,ស្ករគ្រាប់ និងថវិកា 3000 រៀលផងដែរ៕ 
