បាងកក៖ លោកប្រាយុធ ចាន់អូចា ដឹកនាំមេបញ្ជាការគ្រប់ស្ថាប័ន នៃកងកម្លាំងប្រដាប់អាវុធរួមមានទាំងកងទ័ពជើងទឹក និងជើងអាកាសផង ថ្លែងតាមទូរទស្សន៍កាលពីរសៀលថ្ងៃព្រហស្បតិ៍នេះថាពីការធ្វើរដ្ឋប្រហារ ចល័តកម្លាំង និងបិទព្រំដែន ដោយសារស្ថានការណ៍មានភាពអសន្តិសុខ (Thai Army Commander-in-Chief Gen Prayuth Chan-ocha on Thursday declared a coup)។ តាមប្រមុខមេទ័ពដែលប្រែក្រឡាស់សម្តី១៨០អង្សារូបនេះ បាននិយាយថា រដ្ឋប្រហារនេះដោយសារស្ថានការណ៍មានភាពអសន្តិសុខ អាចឈានទៅរកការបង្ហូរឈាម ដែលបង្កផលប៉ះពាល់ដល់សន្តិសុខជាតិ និងសុវត្ថិភាពជីវិត ទ្រព្យសម្បត្តិ ប្រជាពលរដ្ឋ ។
ការធ្វើដូច្នេះដើម្បីរក្សាសណ្តាប់ធ្នាប់ប្រទេស បង្កើតឲ្យមានការផ្សះផ្សា និងសាមគ្គីជាតិ រហូតដល់មានការកំណែទម្រង់នយោបាយ សេដ្ឋកិច្ច សង្គម ដែលគ្រប់ភាគីអាចទទួលយកបាន។ គណៈកម្មការសន្តិសុខជាតិ ដែលមានសមាជិកចូលរួមពីកងទ័ពជើងគោក អគ្គបញ្ជាការកងទ័ពថៃ កងទ័ពជើងទឹក និងអាកាស រួមទាំងអគ្គស្នងការនគរបាលជាតិ មានសំឡេងជាឯកច្ឆន្ទ ប្រកាសកាន់កាប់អំណាចគ្រប់គ្រងដោយយោធាទាំងស្រុង នៅវេលាម៉ោង ១៦ និង៣០នាទីតទៅ។
លោកប្រាយុធ ចាន់អូចា និយាយថា ៖ "In order for the country to return to normal quickly, the National Peace Keeping Committee comprised of the army, the Thai armed forces, the Royal Air Force and the police need to seize power as of May 22 at 4.30 pm," ។ បន្ទាប់ពី ប្រកាសគ្រប់គ្រងប្រទេសថៃទាំងមូលនៅល្ងាចថ្ងៃព្រហស្បតិ៍នេះ ក្រុមយោធាថៃបានប្រកាសដាក់បម្រាមគោចរនៅទូទាំងប្រទេសចន្លោះពីម៉ោង ១០យប់ ដល់ម៉ោង៥ភ្លឺ (Thailand's military imposed a nationwide curfew from 10 pm (1500 GMT) to 5 am (2200 GMT) after the coup,)។
មធ្យោបាយសាធារណៈដូចជា រទេះភ្លើងក្នុងក្រុងត្រូវបិទមិនអោយដំណើរការនៅម៉ោង៩យប់។ បណ្តាញសារព័ត៌មានវិទ្យុ និងទូរទស្សន៍ត្រូវផ្អាកដំណើរការដូចគ្នា។ បណ្តាច្រកតាមព្រំដែនមួយចំនួនជាមួយកម្ពុជាក៏ត្រូវបិទផងដែរ។ ទោះបីជាយ៉ាងណា គណៈកម្មការសន្តិសុខជាតិ អំពាវនាវទៅកាន់ប្រជាពលរដ្ឋថៃទាំងអស់ បន្តរស់នៅ និងប្រកបរបរចិញ្ចឹមជីវិតជាធម្មតា។ មន្ត្រីរាជការបន្តការងារជាប្រក្រតី ខណៈ មន្ត្រីទូត អគ្គកុងស៊ុល អង្គការអន្តរជាតិ រួមទាំងជនបរទេសស្នាក់នៅ ក្នុងប្រទេសថៃ ស្នាក់នៅ និងបន្តការងារដូចធម្មតា។ ប៉ុន្តែសម្រាប់អ្នកនយោបាយ អ្នកពាក់ព័ន្ធដែលបានចូលរួមដោះស្រាយតាមការអំពាវនាវរបស់ ប្រមុខមេទ័ព ចាន់អូចា តាំងពីម្សិលមិញ រហូតដល់រសៀលថ្ងៃព្រហស្បតិ៍នេះ ត្រូវឃាត់ខ្លួនទាំង អស់ ហើយក្រុងបាងកកត្រួតត្រាដោយកងកម្លាំងកងទ័ព ប្រដាប់ដោយអាវុធ យុទ្ធភណ្ឌ និងកាន់កាប់ទីតាំងសំខាន់ៗរួចជាស្រេច៕ 
