កំពង់ធំៈ នៅព្រឹកថ្ងៃ២២/៣/២០១៧ ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់សឹករងកំពង់ធំ បានដឹកនាំ សហការី រួមជាមួយអាជ្ញាធរដែនដីនិងប្រជាពលរដ្ឋ បានចុះសំណេះសំណាល និងសួរសុខទុក្ខ ប្រជាពលរដ្ឋមួយគ្រួសារដែលរងគ្រោះដោយសារអគ្គីភ័យលេបត្របាក់ផ្ទះ ឆេះអស់រលីងគ្មានសល់ នៅសល់តែខោអាវមួយចង្កេះជាប់នឹងខ្លួន។
ហេតុការដែលបង្ករឲ្យមានការឆេះផ្ទះនេះ បានកើតឡើងនៅវេលាម៉ោង ៩,១៥នាទីព្រឹកថ្ងៃទី២១ខែមិនាឆ្នាំ២០១៧ ដែលមានផ្ទះទំហំ៦ម៉ែត្រx៧ម៉ែត្រ ធ្វើអំពីឈើ ប្រកស័ង្ខសី ម្ចាស់ផ្ទះមានឈ្មោះ ថា ត្រេ អាយុ៤១ឆ្នាំនិង ភរិយាឈ្មោះសឿន ពៅ អាយុ៤៣ឆ្នាំ មានកូនបីនាក់នៅក្នុងបន្ទុក នៅថ្ងៃកើតហេតុភរិយាគាត់មិននៅផ្ទះ ទៅរកត្រីសម្រាប់ធ្វើម្ហូប ចំណែកស្វាម៉ីពិការភ្នែកទាំងសងខាង រស់នៅភូមិត្រពាំងថ្ម ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
តាមការឲ្យដឹងពីឯកឧត្តម ឧត្តមសេនីយ៍ត្រី សោម ស៊ុន បានឲ្យដឹងថា ហេតុការណ៍ដែលបណ្តាលឲ្យ អគ្គិភ័យឆាបឆេះ អស់ផ្ទះមួយខ្នងនេះ ដែលបណ្តាលមកពី ការដុតធូបចោលក្នុងថ្ងៃសិល្ប៍ ទើបបណ្តាលឲ្យធូបបាក់ធ្លាកមកលើចំណីភ្លើងទើបឆេះគ្មានសល់ ទ្រព្យសម្បត្តិអ្វីទាំងអស់ នៅសល់តែសម្លៀកបំពាក់មួយចង្កេះប៉ុណ្ណោះ ទើបបានផ្តល់ជូននូវអង្ករចំនួន២៥គីឡូក្រាម មីយើងមួយកេស ទឹកត្រីទឹកស៊ីអ៊ីវពីរយួរ មុងជ្រលក់ថ្នាំចំនួនពីរ ក្រម៉ាពីរ ថវិកាចំនួន១០០.០០០៛ និងថ្នាំពេទ្យមួយចំនួន ។
ក្នុងនោះឯកឧត្តម សោម ស៊ុន បានផ្តាំផ្ញើរដល់បងប្អូនឯទៀត ត្រូវមានការប្រុងប្រយ័ត្នខ្ពស់ មុនចាក់ចេញពីផ្ទះ ពន្លត់ភ្លើងចង្រ្កាន ភ្លើងធូប ភ្លើងទាន ជាពិសេសក្នុងអំឡុងរដូវបុណ្យទាន ចៀសវាងកើតអគ្គីភ័យកើតឡើង នាំឲ្យខូចខាតបាត់បងទ្រព្យសម្បត្តិដែលខំសន្សំមក។
ដោយ ប៊ុន រដ្ឋា
