កំពង់ធំៈ ឯកឧត្តម សោម ស៊ុន អនុប្រធានក្រុមការងារចុះជួយស្រុកស្ទោង និងជាប្រធានក្រុមការងារចុះជួយ ឃុំបន្ទាយស្ទោង បានអញ្ជើញក្នុងពិធីសំណេះសំណាល ក្នុងវេទិការផ្សព្វផ្សាយការអភិវឌ្ឍន៍ការ និងភាពរីកចម្រើនក្រោមការដឹកនាំដោយគណបក្សប្រជាជនកម្ពុជា និងចែកប័ណ្ណសំគាល់ជូនដល់សមាជិកបក្សប្រជាជនកម្ពុជា ចំនួន២២៥។
ពិធីនេះត្រូវបានធ្វើឡើងនៅ ក្នុងបរិវេណវត្តចំបក់បញ្ញា ភូមិចំបក់បញ្ញា ឃុំបន្ទាយស្ទោង ស្រុកស្ទោង ខេត្តកំពង់ធំ ដោយមានឯកឧត្តម សោម ស៊ុន សមាជិកអច្រ្តៃគណបក្សប្រជាជនកម្ពុជាខេត្តកំពង់ធំ រួមទាំងក្រុម ការងារប្រធានបក្សឃុំ បក្សភូមិ និងមានការអញ្ជើញចូលរួមពីសំណាក់ សមាជិក សមាជិកាគណបក្សប្រជាជនកម្ពុជា ដែលបានមកពី៣ភូមិ ភូមិចំបក់បញ្ញា ភូមិបវែង និងភូមិដូនប៉ុក ស្ថិតនៅក្នុងឃុំបន្ទាយស្ទោង ស្រុកស្ទោង ខេត្តកំពង់ធំនៅ ព្រឹកថ្ងៃសៅរ៍ទី១៩ខែឧសភា ឆ្នាំ២០១៨។
គោលបំណងនៃការ ប្រារព្វពិធី សំណេះសំណាលក្នុងវេទិកាផ្សព្វផ្សាយសភាពការណ៍វិវត្តន៍ថ្មីៗ និងចែកជូននូវប័ណ្ណសំគាល់សមាជិកបក្ស គឺជាការបង្ខិតភាពយល់ចិត្តគ្នា បង្ខិតភាពស្និទ្ធស្នាល នឹងរឹតបន្តឹងសម្ព័ន្ឋភាព រវាងសមាជិកបក្ស និងក្រុមការងារបក្ស ដើម្បីលើកយកនូវចំណុចខ្សោយមកកែតំម្រូវ និងរកដំណោះស្រាយ ដើម្បីឈានទៅរកចំនុចខ្លាំង ក្នុងការដណ្តើមយកភាពយកជោគជ័យ ក្នុងពេលបោះឆ្នោតជ្រើសរើសតំណាង រាស្រ្តអណ្ណត្តិទី៦ នៅថ្ងៃទី២៩ ខែកក្កដា ឆ្នាំ ២០១៨ខាងមុខនេះ។
ឯកឧត្តម សោម ស៊ុន បានមានប្រសាសន៍ថា បច្ចុប្បន្នប្រជាពលរដ្ឋខ្មែរទីទាំងប្រទេស រស់នៅ ក្រោមដំបូលសន្តិភាព ដែលដឹកនាំប្រកបដោយកិត្តិបណ្ឌឹតរបស់សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានគណៈបក្សប្រជាជនកម្ពុជា និងបានផ្តាំផ្ញើរដល់សមាជិកបក្សទាំងអស់ នូវខ្លឹមសារ៣ចំនុច
១- កុំចាញ់ការឃោសនាបោកប្រាស់ ញុះញង់ ភូតកុហកមិនចេះអៀនខ្មាស់របស់ក្រុមជនអគតិមួយចំនួន ដែលនាំឲ្យគ្រោះថ្នាក់ដល់ខ្លួន និងក្រុមគ្រួសារ ។២-កុំប្រព្រឹត្តអ្វីដែលខុសទៅនិងច្បាប់ជាតិ និងច្បាប់បោះឆ្នោត។៣- សូមគោរពអញ្ជើញបងប្អូន និងក្រុមគ្រួសារទាំងអស់ ទៅបំពេញកាតព្វកិច្ចជាពលរដ្ឋល្អទៅបោះឆ្នោតឲ្យបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជា ដើម្បីសម្តេចហ៊ុន សែន បន្តធ្វើជានាយករដ្ឋមន្ត្រី ដើម្បីបន្តដឹកនាំនាវាកម្ពុជាក្រោមដំបូលនៃសន្តិភាព និងឆ្ពោះទៅកាន់ការអភិវឌ្ឍន៍បន្តទៅទៀត ។
ដោយ ប៊ុន រដ្ឋា
