ខ្សែប្រយុទ្ធសញ្ជាតិកូឡុំប៊ីកីឡាករ Radamel Falcao នឹងត្រូវអវត្តមានសម្រាប់ការប្រកួត World Cup នៅខែនេះ បន្ទាប់ពីរូបគេមិនជាប់ឈ្មោះក្នុងចំណោមកីឡាករទាំង២៣នាក់របស់លោក Jose Pekerman ។ Falcao គឺត្រូវខកខានមិនបានចូលលេងចាប់តាំងពីខែមករាមកម្ល៉េះដោយសាររបួសសរសៃរពួរជង្គង់ហើយ ខ្សែប្រយុទ្ធដ៏មុតស្រួចរបស់ក្លិប AS Monaco មួយនេះនឹងមិនអាចជាសះស្បើយទាន់ពេលសម្រាប់ការធ្វើដំណើរ ទៅប្រទេសប្រេស៊ីលនៅខែនេះនោះទេ ។
កីឡាករវ័យ២៨ឆ្នាំរូបនេះស៊ុតបញ្ចូលទីបាន៩គ្រាប់ក្នុងការប្រកួតវគ្គជម្រុះចំនួន១៣លើកបានជួយឲ្យប្រទេស របស់ខ្លួនឡើងទៅវគ្គ៣២ក្រុមចុងក្រោយនៃពានរង្វាន់ World Cup នៅប្រទេសប្រេស៊ីលនៅរដូវក្តៅនេះ ។ គួរបញ្ជាក់ថា កូឡុំប៊ីនឹងត្រូវប្រកួតដំបូងជាមួយប្រទេសក្រិកនៅថ្ងៃទី១៤ខែមិថុនា មុនពេលជួបជាមួយកូឌីវ័រ និងប្រទេសជប៉ុន ៕ 
