ខេត្តកំពត ជនសង្ស័យម្នាក់ ក្នុងចំណោមគ្នីគ្នា២នាក់ ត្រូវបានប្រជាពលរដ្ឋ ព្រួតគ្នាវាយស្ទើរស្លាប់ស្ទើររស់ ដោយជនសង្ស័យបានធ្វើសកម្មភាព កាច់សោរម៉ូតូរបស់ប្រជាពលរដ្ឋ នៅជិតស្ពានបន្ទាយមាស ខេត្តកំពត ។ ហេតុការណ៍ប្រជាពលរដ្ឋ វាយជនសង្ស័យខាងលើនេះ បានកើតឡើងនៅឃុំកំពែង ស្រុកគីរីវង់ ខេត្តតាកែវ កាលពីវេលាម៉ោង១០ព្រឹក ថ្ងៃទី០៥ ខែមិថុនា ឆ្នាំ២០១៤ ។
លោកអធិការស្រុកគីរីវង់ បានឱ្យដឹងថា ជនសង្ស័យដែលត្រូវប្រជាពលរដ្ឋ ព្រួតគ្នាវាយនោះមានឈ្មោះ ចាន់ សុភ័ក្ត ភេទប្រុស អាយុ៣៨ឆ្នាំ រស់នៅភូមិព្រៃផ្ទាំ ឃុំបន្ទាយមាសខាងកើត ស្រុកបន្ទាយមាស ខេត្តកំពត បានធ្វើសកម្មភាព ដោយជិះម៉ូតូម៉ាកហុងដា សេ១២៥ សេរីឆ្នាំ ២០១៤ ពាក់ស្លាកលេខ ភ្នំពេញ 1CK-2767 និងមានឌុបបក្សពួកម្នាក់ទៀតឈ្មោះ អា យួន ភេទប្រុស អាយុប្រហែល៣៩ឆ្នាំ មានទីលំនៅមិនពិតប្រាកដ មកធ្វើសកម្មភាពកាច់សោម៉ូតូ របស់ប្រជាពលរដ្ឋ នៅចំនុចខាងលើ រួចជិះរត់គេចខ្លួនបាត់ ។
ម៉ូតូដែលជនសង្ស័យលួចយកទៅនោះ ម៉ាកហុងដា សេ១២៥ សេរី២០១១ ពាក់ស្លាកលេខព្រះសីហនុ 1D-1384 ម្ចាស់ឈ្មោះ នៅ សារឹម រស់នៅភូមិឃុំកើតហេតុ ។ ពេលឃាត់ខ្លួនជនសង្ស័យឈ្មោះ ចាន់ សុភ័ក្ត ប៉ូលីសដកហូតបានកាំភ្លើងខ្លីម៉ាក កា៥៤ មួយដើម មានគ្រាប់៥គ្រាប់ ។ ជនសង្ស័យត្រូវបានប៉ូលីសខេត្តតាកែវ ប្រគលឱ្យទៅប៉ូលីសខេត្តកំពតហើយ កាលពីល្ងាចថ្ងៃដដែល ដើម្បីធ្វើការស្រាវជ្រាវបន្តរតាមនិតិវិធី ៕ 
