ខេត្តកំពង់ធំ៖ ផ្លូវចាក់កៅស៊ូមួយខ្សែលេខ២៦៤ មានប្រវែង១០គីឡូម៉ែត្រនិងទទឹង៦ម៉ែត្រ ដោយតភ្ជាប់ពីផ្លូវជាតិលេខ៦ ត្រង់ផ្សារតាំងគោក ឃុំសូយោង ស្រុកបារាយណ៏ ខេត្តកំពង់ធំ ឆ្ពោះទៅកាន់ផ្លូវជាតិលេខ៧១ត្រង់ចំនុចភូមិបុស្ស ថ្លាន់ ឃុំស្វាយទាប ស្រុកចំការលើ ខេត្តកំពង់ចាម ហើយផ្លូវចាក់កៅស៊ូ(DBST)១ខ្សែនេះបានស្ថាបនារួចជាស្ថាព័រ នៅក្នុងខែមិថុនាឆ្នាំ២០១៤។
ឯកឧត្តមម៉ៅឡាំង ប្រធានមន្ទីរសាធារណការខេត្តកំពង់ធំបានឲ្យដឹងថា គម្រោងស្ថាបនាផ្លូវលេខ២៦៤នេះបានកសាងនិងស្ថាបនាឡើងចំនួនពីរដំណាក់កាល ហើយដំណាក់កាលទី១ នៅក្នុងឆ្នាំ២០១២និងឆ្នាំ២០១៣ បានស្ថាបនារួចចំងាយ៦គីឡូម៉ែត្រ និងដំណាក់ទី២ចាប់ពីឆ្នាំ២០១៣ដល់ឆ្នាំ២០១៤ នេះគឺបានស្ថាបនាបន្ថែមទៀតបានចំងាយ៣៤៣០ម៉ែត្រ ហើយផ្លូវ
នេះជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុនសែន និងវិទ្យាល័យហ៊ុនសែនស្រះបន្ទាយ ក្រោមគម្រោងនិងអនុវត្តដោយមន្ទីរសាធារណការខេត្តកំពង់ធំ។ ឯកឧត្តមប្រធានមន្ទីរបានបន្តរថា ផ្លូវចាក់កៅស៊ូ១ខ្សែនេះមានសារសំខាន់សំរាប់ពលរដ្ឋរស់នៅក្នុងបារាយណ៏ ខេត្តកំពង់ធំនិងប្រជាពលរដ្ឋនៅស្រុកចំការលើ ខេត្តកំពង់ចាម ហើយជាពិសេសនោះវាជាសសៃរឈាមសំរាប់ផ្តល់សេវ៉ា ក្នុងការដឹកជញ្ជូនដំណាំកសិកម្មនិងផលិតផលផ្សេងៗដល់ប្រជាពលរដ្ឋទូទៅ។