ភ្នំពេញ៖ ដើម្បីដោះស្រាយបញ្ហាការកកស្ទះចរាចរណ៍នៅក្នុងរាជធានីភ្នំពេញ ឲ្យបានកាន់តែល្អប្រសើរ បន្ថែមទៀតនោះ អាជ្ញាធររាជធានីភ្នំពេញ និងអង្គការJICAជប៉ុន បានឯកភាពគ្នា ធ្វើការថ្លាស់ប្ដូរប្រព័ន្ធភ្លើងសញ្ញាចរាចរណ៍ថ្មី ចំនួន១០០កន្លែង ដែលជាជំនួយឥតសំណងរបស់ប្រទេសជប៉ុន និងគ្រោងសាងសង់ស្ពានអាកាសចំនួន២កន្លែងទៀតនៅពេលខាមុខនេះ ។
នៅក្នុងពិធីចុះហត្ថលេខា រវាងសាលារាជធានីភ្នំពេញ នឹងអង្គការJICAជប៉ុន កាលពីរសៀលថ្ងៃទី១១ ខែមិថុនា ឆ្នាំ២០១៤ នៅសាលារាជធានីភ្នំពេញ ស្ដីពីកំណតហេតុគម្រោងអភវឌ្ឍន៍ប្រព័ន្ធ គ្រប់គ្រងចរាចរណ៍ក្នុង រាជធានីភ្នំពេញលោកប៉ា សុជាតិវង្ស និងលោកSHigeki Miyake ប្រធានប្រតិភូJICAជប៉ុន នៃគម្រោងសិក្សាមូលដ្ឋានលោកប៉ា សុជាតិវង្ស អភិបាលរាជធានីភ្នំពេញ បានបញ្ជាក់ថា៖ អនុវត្ដតាមផែនការមេការងារ ដឹកជញ្ជូន តាំងពីឆ្នាំ២០០១មក សាលារាជធានីភ្នំពេញ បានខិតខំជួសជុល កែលំអផ្លូវថ្នល់បំពាក់ភ្លើងសញ្ញាចរាចរណ៍ និងភ្លើងបំភ្លឺសាធារណៈតាមផ្លូវថ្នល់ និងសួនច្បារទាំងក្នុងខណ្ឌកណ្ដាលទីក្រុង និងជាយក្រុង ទៅតាមផែនការ មេដែលបានកំណត់។
ដោយសារកំណើន សេដ្ឋកិច្ច និងជីវភាពរស់នៅរបស់ប្រជាពលរដ្ឋ ដែលកាន់តែប្រសើរឡើង រាជធានីភ្នំពេញ បាននិងកំពុងប្រឈម នឹងការកកស្ទះចរាចរណ៍ និងកើនឡើង នៃគ្រោះថ្នាក់ ចរាចរណ៍ដោយសារកំនើនយានយន្ដ ។ បច្ចុប្បន្ន ចំនួនយានយន្ដ ដែលបានចុះបញ្ជីក្នុងរាជធានីភ្នំពេញមានរថយន្ដចំនួន ប្រមាណ៣១ម៉ឺនគ្រឿង និងទោចក្រយានយន្ដ ប្រមាណ១លាន ១សែនគ្រឿង ។ ដោយសារវិសាលភាពរាជធា នីភ្នំពេញបច្ចុប្បន្ន ប្រមាណ៦៧៨គីឡូម៉ែត្រការ៉េ ដែលមានខណ្ឌចំនួន១២ និងមានប្រជាពលរដ្ឋរស់នៅ ចំនួន ២លាននាក់ ។
ដោយហេតុនេះហើយ បានជាអាជ្ញាធររាជធានីភ្នំពេញ និងអង្គការ JICA ជប៉ុន បានឯកភភាព គ្នាចុះហត្ថលេខា លើកំណត់ហេតុមួយ ស្ដីពីសិក្សាគម្រោងសាងសង់ ប្រព័ន្ធគ្រប់គ្រងចរាចរណ៍ឲ្យកាន់តែល្អប្រសើរឡើងបន្ថែមទៀត ។ នេះជាមធ្យោបាយមួយដ៏ខាន់ជួយរំដោះចរាចរណ៍នៅរាជធានីភ្នំពេញ ដែលកំពុងតែប្រឈមខ្លាំងលើបញ្ហាកក់ស្ទះចរាចរណ៍ស្ទើជារៀងរាល់ថ្ងៃ។ ប្រសិនបើយើងមិន ដោះស្រាយទាន់ចាប់ពីពេលនេះទៅទេ នោះវានឹងបង្កការរំខានកាន់តែធ្ងន់ធ្ងន់ដល់ជីវភាពរស់នៅរបស់ប្រជាពលរដ្ឋ និងសោភណ្ឌរបស់ទីក្រុងរិតតែខ្លាំង។
សូមបញ្ជាក់ថា៖ កាលពី ខែកុម្ភៈ សាលាក្រុងបាន ដាក់ឲ្យដំណើរការរថយន្តប៊ឺសក្រុងចំនួន១០គ្រឿង ដើម្បីបំរើសេវាដឹកជញ្ជូនសាធារណៈជូនប្រជាពលរដ្ឋរស់នៅក្នុងក្រុងបានយ៉ាងច្រើន ដែលជាដំណោះស្រាយយ៉ាងសមស្របបំផុតចំពោះបញ្ហាកក់ស្ទះចរាចរណ៍ នៅក្នុងរាជធានីភ្នំពេញ នៅលើមហាវិថីព្រះមុន្នីវង្ស គម្រោងដាក់ឲ្យដំណើរការសេវារថយន្តក្រុងនេះ ក្នុងគោលដៅជំរុញឲ្យប្រជាពលរដ្ឋផ្លាស់ប្តូរឥរិយាបថមកប្រើប្រាស់មធ្យោបាយដឹកជញ្ជូនសាធារណៈវិញ ខណៈដែលអ្នកក្រុងភ្នំពេញស្ទើរ១០០ភាគរយ បានប្រើប្រាស់មធ្យោបាយផ្ទាល់ខ្លួន ដែលនាំមានការកក់ស្ទះចរាចរណ៍នៅតាមមហាវិថីសំខាន់ៗជារៀងរាល់ថ្ងៃ។
លោកSHigeki Miyake ប្រធានប្រតិភូJICAជប៉ុន នៃគម្រោងសិក្សាមូលដ្ឋាន បានបញ្ជាក់ថា៖ គម្រោងនេះនឹងក្លាយជាគំរូមួយដើម្បីបញ្ជសការកកស្ទះចរាចរណ៍នៅរាជធានីភ្នំពេញនាពេលបច្ចុប្បន្ន។ លោកជឿជាក់ថា បន្ទាប់ពីយើងធ្វើការជួសជុល កែលម្អប្រព័ន្ធគ្រប់គ្រងសញ្ញាចរាចរណ៍ក្នុងរាជធានីភ្នំពេញរួច រាល់ហើយនោះចំនួនគ្រោះថ្នាក់ចរាចរណ៍ និង ត្រូវបានកាត់បន្ថយ រីឯដំណើរការរថយន្ដក្រុងក៍មានភាពរលូនជាមុន ដែលអាចទាក់ទាញប្រជាជន ឲ្យងាកមកប្រើប្រាស់លើមធ្យោបាយ ដឹកជញ្ជូន ជាសាធារណៈ ក៍ដូច ជាការទាក់ទាញ ក្រុមហ៊ុនឯកជនឲ្យមកវិនិយោគរថយន្ដក្រុងនេះផងដែរ ៕ ដោយ៖ សំរិត