ការិយល័យយន្តការផ្តល់សេវាសង្គម សម្រាប់កម្មវិធីគាំពារសង្គម មុខរបរ និង ការងារ ការអនុវត្តសាកល្បងនៅ ស្រុកអង្គរជុំ និង ស្រុកស្រីស្នំ ខេត្តសៀមរាប ត្រូវបានបើកដាក់ឲ្យដំណើរការបម្រើប្រជាពលរដ្ឋជាផ្លូវការ ក្រោមអធិបតី ភាពរបស់ ឯ.ឧ ងី ច័ន្ទ្រផល រដ្ឋលេខាធិការ
ក្រសួងមហាផ្ទៃ និង ជាអនុប្រធានក្រុមប្រឹក្សាអភិវឌ្ឍន៍វិស័យកសិកម្ម និង ជនបទ នៅរដ្ឋបាលស្រុកអង្គរជុំ កាលពីថ្ងៃទី១១ ខែមិថុនា ឆ្នាំ២០១៤ ដោយមានការអញ្ជើញចូលរួមពីសំណាក់ឯកឧត្តម និង អស់លោក លោកស្រីជាសមាជិកក្រុមប្រឹក្សាខេត្ត គណៈអភិបាលខេត្ត តំណាងអង្គការអាយឡូ អាជ្ញាធរ ស្រុកទាំងពីរ និង ឃុំ ព្រមទាំងសិស្សានុសិស្ស លោកគ្រូអ្នកកគ្រូ និង ប្រជាពលរដ្ឋផងដែរ ។
បន្ទាប់ពីកិច្ចស្វាគមន៍របស់លោកអភិបាលស្តីទីស្រុកអង្គរជុំ និង ចំណាប់អារម្មណ៍របស់លោក Maurisio Bussi តំណាងអង្គការអាយឡូ បានលើកឡើងពីអត្ថប្រយោជន៍ នៃការបង្កើតការិយាល័យ យន្តការផ្តល់សេវាសង្គម សម្រាប់ កម្មវិធីគាំពារសង្គម មុខរបរ និង ការងារ ការអនុវត្តសាកល្បងនៅ ស្រុកអង្គរជុំ និង ស្រុកស្រីស្នំ ខេត្តសៀមរាប ក្នុង ការបម្រើជូនដល់ប្រជាបលរដ្ឋមូលដ្ឋាន ក្នុងការស្វែងរកសេវាកម្មសង្គម មុខរបរ និងការងារ ជាមួយស្ថាប័នអ្នកផ្តល់សេវានានា ដើម្បីឲ្យប្រជាពលរដ្ឋក្រីក្រ និង ងាយរងគ្រោះ ព្រមទាំងគាំទ្រសង្គមដែលជាមូលដ្ឋានគ្រឹះ នៃសង្គមមនុស្ស ក្នុងការធានានូវសិទ្ធិមនុស្សគ្រប់រូប ដោយប្រជាពលរដ្ឋទទួលបានការថែទាំសុខភាព និង កុមារគ្រប់រូបទទួលបាន ប្រាក់ចំណូល និង ការអប់រំសិក្សា ហើយប្រជាពលរដ្ឋទទួលបានប្រាក់ចំណូល សម្ខាន់នៅពេលមានជម្ងឺ គ្មានការងារធ្វើ និង ចាស់ជរាទទួលបានប្រាក់ឧបត្ថម្ភទៀតផង ។
មានប្រសាសន៍នោះក្នុងនាមឯ.ឧ ឃឹម ប៊ុនសុង អភិបាលនៃគណៈអភិបាលខេត្ត ឯ.ឧ ម៉ៅ វុឌ្ឍី អភិបាលរង នៃ គណៈអភិបាលខេត្តសៀមរាប ក៏បានគូសបញ្ជាក់ថា យន្តការផ្តល់សេវាសង្គមនេះ ជាកន្លែងចំណតមួយនៅថ្នាក់ ស្រុក និង ឃុំ ដែលមានការិយាល័យរបស់ ក្នុងគោលបំណងសម្របសម្រួលការប្រើប្រាស់ទាំងសេវា គាំពារសង្គម មុខ របរ និង ការ ងារ ស្ថិតក្នុងស្ថាប័នរបស់រដ្ឋាភិបាល និង ប្រតិបត្តិដោយអាជ្ញាធរថ្នាក់ក្រោមជាតិ ។ ម្យ៉ាងទៀតជាយន្តការ មួយជួយឲ្យមានស្ថេរភាព ក្នុងការអនុវត្តកិច្ចការ និង ជួយពង្រឹងប្រតិភូអំណាច និង ផ្តល់សិទ្ធិអំណាចដល់អាជ្ញាធរ ថ្នាក់ក្រោមជាតិឲ្យកាន់ តែមានប្រសិទ្ធភាព ក្នុងការបំពេញតួនាទី និង ការប្រើប្រាស់សមត្ថភាពរបស់ខ្លួន សម្រាប់កិច្ច ការសម្របសម្រួល កម្មវិធីគាំពារសង្គម មុខរបរ និង ការងារ ជាមួយស្ថាប័នពាក់ព័ន្ធ ដើម្បីឆ្លើយតបនឹងតម្រូវការរបស់ ប្រជាពលរដ្ឋក្នុងមូលដ្ឋាន នៅក្នុងស្រុកទាំងពីរ ចំនួន៤ឃុំ ក្នុងនោះស្រុកអង្គរជុំ ចំនួន២ឃុំ និង ស្រុកស្រីស្នំ ចំនួន២ឃុំផងដែរ ។
មានប្រសាសន៍សំណេះសំណាលនោះដែរឯ.ឧ ងី ច័ន្ទ្រផល ក៏បានលើកឡើងពីយុទ្ធសាស្ត្រចតុកោណ ដំណាក់កាលទី៣ អាណត្តិទី៥ បានដាក់នូវគោលដៅយុទ្ធសាស្ត្រ៤ និង វិស័យអាទិភាព៤ ដើម្បីឆ្លុះបញ្ចាំងពីការ អនុវត្តរយៈពេល៥ឆ្នាំទៅមុខ គឺបន្តពង្រឹងសមត្ថភាព អភិបាលកិច្ចនៃស្ថាប័នរដ្ឋ ទាំងថ្នាក់ក្រោមជាតិ ដើម្បីធានាឲ្យ បាននូវប្រសិទ្ធភាព និង ភាពស័ក្តិសិទ្ធិនៃសេវាសាធារណៈ សំដៅបម្រើជូនប្រជាពលរដ្ឋឲ្យកាន់តែប្រសើរ ព្រមទាំង វិស័យអាទិភាព ក្នុងការពង្រឹងអភិបាលកិច្ច សមត្ថភាពស្ថាប័នរដ្ឋ សំដៅបង្កើនប្រសិទ្ធភាព នៃសេវាសាធារណៈ និង ការកែលម្អបរិយាកាសវិនិយោគ ។ ឯកឧត្តមក៏បានគូសបញ្ជាក់ថា ទិសដៅចំពោះមុខ នៃការប្រើប្រាស់យន្តការ និង រចនាសម្ព័ន្ធនៃការិយាល័យច្រកចេញចូលតែមួយ បានផ្សាភ្ជាប់ការផ្តល់យន្តការសេវារដ្ឋបាល ជាមួយការផ្តល់សេវា ជា កញ្ចប់ជូនប្រជាពលរដ្ឋ សម្ខាន់លើសេវាគាំពារសង្គម សេវាកម្មពាក់ព័ន្ធទៅនឹងការរកការងារ ធ្វើនៅតាមស្រុក ក្រុង ។ ឯ.ឧ ងី ច័ន្ទ្រផល ក៏បានបន្តទៀតថា ការជម្រុញតួនាទីរដ្ឋបាលមូលដ្ឋាន ក្នុងការអនុវត្តកម្មវិធីគាំពារសង្គម ដែលជា កត្តាគន្លឹះ ក្នុងការធានា កម្មវិធី ឬ អន្តរគមន៍គាំពារសង្គម នឹងការអនុវត្តប្រកបដោយប្រសិទ្ធភាព និង លើកកម្ពស់ សមធម៌នៅថ្នាក់មូលដ្ឋាន ។ ម្យ៉ាងទៀតទិសដៅនៃកំណែទម្រង់វិមជ្ឈការ និង វិសហមជ្ឈការ គឺដើម្បីបង្កើត និង លើកកម្ពស់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ ហើយរាជរដ្ឋាភិបាលបានចាត់ទុកកិច្ចដំណើរ ការកំណែទម្រង់វិមជ្ឈការ និង វិសហមជ្ឈការ គឺជាមធ្យោបាយ ដ៏មានប្រសិទ្ធិភាព ក្នុងការបង្ខិតសេវាសាធារណៈឲ្យ កាន់តែនៅជិតប្រជាពលរដ្ឋ ។ ក្នុងនោះដែរឯកឧត្តមក៏បាន ថ្លែងអំណរគុណចំពោះការគាំទ្រឧបត្ថម្ភរបស់ អង្គការ ពលកម្មអន្តរជាតិ និង សាធារណរដ្ឋកូរ៉េ ក្នុងការជម្រុញឲ្យមានការអនុវត្តសាកល្បងនេះ ទៅតាមការគ្រោងទុក ព្រម ទាំងសំណូមពរសុំឲ្យបន្តការគាំទ្របន្ថែមទៀត ក្នុងដំណាក់កាលនៃការអនុវត្តសាកល្បង និង លទ្ធភាពនៃការពង្រីក វិសាលភាពទៅបណ្តាស្រុក ក្រុង ខណ្ឌផ្សេងៗទៀតផងដែរ ៕
