ពោធិសាត់ ៖ ក្នុងអាណត្តិទី២របស់ខ្លួននៅសាលាក្រុងពោធិ៍សាត់ បន្ទាប់ពីបោះឆ្នោត និងរៀបចំរចនាសម្ព័ន្ធរួចមក ក្រុមប្រឹក្សាក្រុងពោធិ៍សាត់ បានបើកកិច្ច ប្រជុំ សាមញ្ញលើកទី១ ក្នុងអាណត្តិទី២របស់ខ្លួន ដើម្បីដំណើរការ ក្នុងការ អនុវត្តន៍ការងារបន្ត ពីអាណត្តិទី១បន្តទៀត ។
កិច្ចប្រជុំនេះបានធ្វើនៅសាលាក្រុងពោធិ៍សាត់ ក្រោមអធិបតីលោក សំរិទ្ធ អេង ប្រធានក្រុមប្រឹក្សា ក្រុងពោធិ៍សាត់ អភិបាលរងខេត្ត និងសមាជិកក្រុមប្រឹក្សាក្រុងទាំង១៤រូប, ប្រធានក្រុមប្រឹក្សាសង្កាត់ទាំង០៧ និងតំណាងអង្គការអនាគតកុមារ ។
លោកនាយករដ្ឋបាល សាលាក្រុងពោធិ៍សាត់ បានធ្វើសេចក្ដីរាយការណ៍ ដោយបញ្ជាក់ថា ក្នុងរយះពេល៥ឆ្នាំកន្លងទៅនេះ រដ្ឋបាលក្រុងបានរៀបចំកិច្ចប្រជុំសាមញ្ញ របស់ក្រុមប្រឹក្សាក្រុងអាណត្តិទី១ បានចំនួន៦០លើក,កិច្ចប្រជុំវិសាមញ្ញ៣១លើក និងកិច្ចប្រជុំគណកម្មាការនានា ចំនួន១៧លើក ដែលកិច្ចប្រជុំសាមញ្ញ និងវិសាមញ្ញ បានអនុម័តលើដីកា សេចក្ដីសម្រេច និងឯកសារផ្សេងៗ
ដើម្បីបំរើផលប្រយោជន៍ជូនប្រជាពលរដ្ឋ ។ ក្នុងនោះដែរ បានបំរើសេវាលើការងារបញ្ជាក់អត្រានុគោលដ្ឋាន ដូចជា សេចក្ដីចម្លងសំបុត្រកំណើត សំបុត្របញ្ជាក់អាពាហ៍ពិពាហ៍ និងសំបុត្រផ្សេងៗទៀត សរុប៤៩៩៧សន្លឹក ។ បានកសាងផែនការអភិវឌ្ព្យន៍ សំរាប់ឆ្នាំ២០១១¬¬/២០១៥,¬កម្មវិធីវិនិយោគ០៣ឆ្នាំ រំកិលសំរាប់ឆ្នាំ ២០១១/២០១៣,២០១២/២០១៤និង២០១៣/២០១៥ ។
ការិយាល័យច្រកចេញចូលតែមួយ បំរើសេវាជូនប្រជាពលរដ្ឋ បានចំនួន៩៨៣០សេវា ទទួលបានប្រាក់ចំណូល ១២០.៣០៦.៦០០រៀល បង់ចូលថវិការដ្ឋ ។ ការិយាល័យប្រជាពលរដ្ខ ទទួលបានពាក្យបណ្ដឹង ចំនួន៣៨៤ករណី ក្នុងនោះដោះស្រាយរួច ៦៦២ករណី នៅសល់២២ករណីទៀត ដែលកំពុងតែដោះស្រាយ ។ លោក សំរិទ្ធ អេង ប្រធានក្រុមប្រឹក្សា ក្រុងពោធិ៍សាត់ បានថ្លែងថា នេះគឺជាកិច្ចប្រជុំលើកដំបូង សំរាប់អាណត្តិទី២ របស់ក្រុមប្រឹក្សា ក្រុងពោធិ៍សាត់ បន្ទាប់ពីអាណត្តិទី១ បានបញ្ចប់ទៅ ។
ក្នុងអាណត្តិទី១កន្លងមក យើងបានរួមគ្នាអនុវត្តន៍ការងារ និងអភិវឌ្ព្យន៍ក្រុងពោធិ៍សាត់ ទទួលបានលទ្ធផលជាវិជ្ជមានគួរឲ្យកត់សំគាល់ ពិសេសដោយមានការគាំទ្រ ពីអង្គការអនាគតកុមារផងដែរ ។ ក្នុងអាណត្តិទី២ របស់ក្រុមប្រឹក្សានេះ យើងនឹងបន្តរួមគ្នា រកឲ្យឃើញនូវចំណុចខ្វះចន្លោះកន្លងមក ដើម្បីបន្តការអនុវត្តន៍ការងារ និងអភិវឌ្ព្យន៍ក្រុងពោធិ៍សាត់ ឲ្យកាន់តែរីកចំរើនថែមទៀត ដើម្បីឆ្លើយតប ទៅតាមសេចក្ដីត្រូវការ របស់ប្រជាពលរដ្ឋ ៕