ខេត្តកំពង់ធំ ៖ ឯកឧត្តម គង់ វិមាន អភិបាលរងខេត្តកំពង់ធំ ដឹកនាំកំលាំង តំបន់ប្រតិបត្តិការសឹករងកំពង់ធំ កំលាំងកងរាជអាវុធហត្ថខេត្តកំពង់ធំ និងស្នងការង ព្រមទាំងក្រុមគ្រូពេទ្យ ព្រមទាំងរថយន្ត៥គ្រឿង បានអញ្ជើញចុះមកច្រកព្រំដែនអន្តរជាតិ ប៉ោយប៉ែត កាលពីរសៀលថ្ងៃទី ១៦ ខែ មិថុនា ឆ្នាំ ២០១៤ ។
ខណៈពេលដែលគណៈប្រតិភូខេត្តកំពង់ធំ បានទៅដល់ប៉ោយប៉ែត នៅវេលាម៉ោង ៧.៣០នាទីយប់ ឯកឧត្តម បានអញ្ជើញទៅសួរសុខទុក្ខពលករខ្មែរ និងសមត្ថកិច្ច ដែលកំពុងតែការពារសុវត្តិភាព ពលករខ្មែរ ដែលកំពុងតែធ្វើមាតុភូមិនិវត្ត ក្រោយពីរដ្ឋាភិបាលថៃ បានប្រកាសបោសសំអាតពលករ ចំណាក់ស្រុកដោយ ខុសច្បាប់ ដើម្បីរៀបចំសណ្តាប់ធ្នាប់សង្គមនិងសន្តិសុខឡើងវិញ ខណៈនោះឯកឧត្តម គង់ វិមាន
បានធ្វើការ ទំនាក់ទំនងជាមួយគណៈកម្មការ រៀបចំការដឹកជញ្ជូនពលករវិលត្រឡប់មកស្រុកកំណើត ព្រមទាំងបានរៀប ចំរថយន្តឲ្យបងប្អូន ដែលមានបំណង់វិលត្រឡប់ទៅស្រុកកំណើត និងបានធ្វើដំណើរឆ្ពោះទៅ កំពង់ធំ កំពង់ចាម សៀមរាប ឲ្យឡើងរថយន្តទៅជាមួយគ្នា ។
នៃឳកាសនោះឯកឧត្តម បានសួរសុខទុក្ខ និងសំណេះសំណាលជាមួយ ឯកឧត្តម អភិបាលខេត្តបន្ទាយមានជ័យ ដើម្បីសហការក្នុងការទទួលពលករ ត្រឡប់ទៅខេត្តកំពង់ធំ ។
ចំណែកពលករចំណាក់ស្រុក ត្រូវបាន អាជ្ញាធរថៃ បន្តការដឹកជញ្ជូន បន្តកន្ទុយគ្នា មានទាំងរថយន្តក្រុង និងរថយន្តបែន ជាច្រើនរយឡាន ក្នុងមួយ ថ្ងៃ ដែលសមត្ថកិច្ចមិនទាន់អាចកំណត់ថា ចំនួនពលករខ្មែរមានប៉ុន្មានពិតប្រាកដនោះទេ គ្រាន់តែតាមការ ប៉ាន់ស្មានរបស់គណៈកម្មការ ដែលជាតួលេខត្រួសៗ គឺក្នុងរយះពេល៨ថ្ងៃ គិតត្រឹមថ្ងៃទី ១៦ ខែ មិថុនា ឆ្នាំ ២០១៤ នេះ ពលករខ្មែរបានកើនឡើង ជិត២០ម៉ឺននាក់ហើយ ។
ឯកឧត្តម គង់ វិមាន បានបញ្ជាក់ថា អាជ្ញាធរខេត្តកំពង់ធំ ដោយមានការគាំទ្រ ពីឯកឧត្តម អ៊ុត សំអន អភិបាលខេត្តកំពង់ធំ និងបានឯកភាព ឲ្យនាយករងរដ្ឋបាលសាលាខេត្តកំពង់ធំ និងកំលាំងមន្ត្រីជាច្រើនរូប ព្រមទាំងក្រុមគ្រូពេទ្យ ប្រចាំការ ឈរជើងនៅប៉ោយប៉ែត ដើម្បីចាំទទួលពលករខ្មែរ រហូតទាល់តែអស់ទើប ត្រឡប់ទៅវិញ។