កំពង់ចាម: ទីតាំងបើកសង្វៀនបញ្ជល់មាន់១កន្លែង ត្រូវបានកម្លាំងជំនាញអធិការនគរបាលស្រុកកំពង់សៀម សហការណ៍ជាមួយ កម្លាំងប៉ុស្តិ៍
នគរបាលរដ្ឋបាលរអាង បើកប្រតិបត្តិការណ៍ចុះបង្ក្រាប ដោយឃាត់ខ្លួនជនសង្ស័យចំនួន២នាក់ និងដកហូតបានម៉ូតូចំនួន១១គ្រឿង រួមជាមួយវត្ថុតាងមួយចំនួនផងដែរ។
ប្រតិបត្តិការណ៍ចុះបង្ក្រាបនេះសមត្ថកិច្ចបានធ្វើឡើង កាលពីវេលាម៉ោង១១និង៣០នាទី ថ្ងៃទី១៦ ខែធ្នូ ឆ្នាំ២០១៧ នៅចំណុចភូមិរអាងលើ ឃុំរអាង ស្រុកកំពង់សៀម ខេត្តកំពង់ចាម។
លោកវរសេនីយ៍ទោ ឯក ប៉ាន់ដន អធិការនគរបាលស្រុកកំពង់សៀម បានឲ្យដឹងថា ជាលទ្ធផលក្នុងការចុះបង្ក្រាបល្បែងស៊ីសងខុសច្បាប់នេះ កម្លាំងជំនាញបានធ្វើការឃាត់ខ្លួនអ្នកលេងល្បែងបាន២នាក់ ទី១.ឈ្មោះ ស៊ត កុយ ភេទប្រុស អាយុ៤៥ឆ្នាំ និងទី២.ឈ្មោះ ហ៊ត គឹមហ៊ន់ ភេទប្រុស ៣៨ឆ្នាំ អ្នកទាំង២មានទីលំនៅនៅភូមិគៀនជ្រៃក្រៅ ឃុំគៀនជ្រៃ ស្រុកកំពង់សៀម ខេត្តកំពង់ចាម។
លោកអធិការបានបន្តថា ក្រោយពីឃាត់ខ្លួនក្រុមអ្នកញៀនល្បែងទាំង២នាក់នោះហើយ កម្លាំងបានដកហូតយកវត្ថុតាងម៉ូតូចំនួន១១គ្រឿង និងឧបករណ៍មួយចំនួនទៀត។
បច្ចុប្បន្ន ជនសង្ស័យ រួមជាមួយវត្ថុតាង ត្រូវបានបញ្ជូនមកកាន់អធិការរដ្ឋាននគរបាលស្រុកកំពង់សៀម ដើម្បីធ្វើការសាកសួរ និងកសាងសំណុំរឿងអនុវត្តតាមនីតិវិធីច្បាប់ ៕
