កំពង់ចាម៖ យ៉ាងហោចណាស់ក៏មានមនុស្ស២នាក់ រងរបួសធ្ងន់ធ្ងរ ខណៈដែលជនរងគ្រោះកំពុងតែដេកលង់លក់ក្នុងផ្ទះ ត្រូវរថយន្ត១គ្រឿងបើកបុកសម្រុកចូលដល់ក្នុងផ្ទះ កាលពីវេលាម៉ោង៤និង៣០នាទីទៀបភ្លឺ ថ្ងៃទី២៣ ខែធ្នូ ឆ្នាំ២០១៧
នៅចំណុចផ្លូវកោង ស្ថិតក្នុងភូមិព្រែងរំដែងកើត ឃុំពង្រ ស្រុកកោះសូទិន ខេត្តកំពង់ចាម។
សមត្ថកិច្ចនគរបាលមូលដ្ឋានបានឲ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយថរយន្ត១គ្រឿងម៉ាក់កាមរី សេរីឆ្នាំ៩៥ ពាក់ស្លាកលេខ ញ 3518 ភ.ព2 បើកបរដោយបុរសម្នាក់ ឈ្មោះ ងន់ សុភក្ត័ អាយុ៣៦ឆ្នាំ រស់នៅភូមិព្រែកជីក ឃុំទន្លេបិទ ស្រុកត្បូងឃ្មុំ ខណៈដែលបើកបរមកដល់ត្រង់ចំណុចផ្លូវកោងស្រាប់តែរ៉េចង្កូតជ្រុលទៅបុកចូលផ្ទះជនរងគ្រោះ បណ្តាលឲ្យម្ចាស់ផ្ទះទាំង២នាក់ប្តីប្រពន្ធ រងរបួសធ្ងន់ ដែលជនរងគ្រោះជាប្តីឈ្មោះសេង គីមចន អាយុ៦២ឆ្នាំ ជាអនុភូមិ និងប្រពន្ធឈ្មោះស៊ន់ សុខឃឿន អាយុ៤៧ឆ្នាំ រងរបួសបាក់ជើង និងចង្កេះ។
ក្រោយពីកើតហេតុ សមត្ថកិច្ចបានឃាត់ខ្លួនអ្នកបើកបរ និងស្ទូចយករថយន្តទៅរក្សាទុក នៅអធិការដ្នាននគរបាលស្រុកកោះសូទិន ដើម្បីរង់ចាំដោះស្រាយតាមនីតិវិធី ៕