អភិបាលខេត្តតាកែវ ឯកឧត្តម ឡាយ វណ្ណៈ បានប្រាប់ក្រុមពលករ ដែលទើបតែត្រលប់មកពីប្រទេសថៃវិញ សូមកុំវិលត្រលប់ទៅធ្វើការនៅប្រទេសថៃម្ដងទៀត ព្រោះការត្រលប់ទៅប្រទេសថៃវិញ គឺហាក់ដូចជាយកជិវិត ទៅផ្សងនិងគ្រោះថ្នាក់ ។
មានប្រសាសន៏សំណេះសំណាល ជាមួយក្រុមពលករដែលទើបតែវិលត្រលប់ មកពីប្រទេសថៃវិញ នៅសាលាខេត្តតាកែវ ។
ឯកឧត្តម ឡាយ វណ្ណៈ បានលើកឡើង ពីការខឹតខំប្រឹងប្រែង របស់រាជរដ្ឋាភិបាលកម្ពុជា ក្នុងការបង្កើតការងារជូនដល់ប្រជាពលរដ្ឋខ្មែរយើង និងថ្មីៗនេះ រាជរដ្ឋាភិបាលបានបង្កើតគណៈកម្មាការ ដែលមានសមាភាព ខាងក្រុមហ៊ុនឯកជនចូលរួមផងដែរ ដើម្បីធ្វើការតម្លើងប្រាក់ខែ ជូនដល់កម្មករ ហើយជាពិសេសទៅទៀតនោះ សម្ដេចតេជោ ហ៊ុន សែន កំពុងតែស្ថិតនៅក្រៅប្រទេសដើម្បីធ្វើយ៉ាងណា គៀងគរក្រុមអ្នកវិនិយោគបរទេស ឲ្យមកបណ្ដាក់ទុននៅកម្ពុជា ហើយវានិងធ្វើឲ្យទីផ្សារការងារនៅកម្ពុជា កាន់តែសម្បូរបែបថែមទៀត ។
ឯកឧត្តមអភិបាល ខេត្តតាកែវ បានបន្តថា ដូច្នោះស្ថានភាពការងារ នៅក្នុងប្រទេសកម្ពុជាយើង វាមិនខ្វះទេ ហេតុដូច្ឆេះហើយ សូមបងប្អូនប្រជាពលរដ្ឋ កុំធ្វើដំណើរត្រលប់ទៅធ្វើការ នៅប្រទេសថៃម្ដងទៀត ព្រោះដូចបងប្អូនបានជ្រាបហើយ ការដែលទៅធ្វើការដោយខុសច្បាប់ នៅប្រទេសថៃ គឺដូចយកអាយុជីវិតយើង ទៅផ្សងគ្រោះថ្នាក់ ព្រោះអាចត្រូវទាហ៊ានថៃ បាញ់សំលាប់ ហើយម្យ៉ាងទៀតពលករដែលបានទៅធ្វើការ នៅប្រទេសថៃ ត្រូវបានគេចាប់ដាក់គុក និងត្រូវមើលងាយដូចសត្វធាតុ មានពេលខ្លះត្រូវបានគេវាយ ទាត់ធាក់ និងប្លន់យកលុយអស់ថែមទៀតផង ដូច្នោះគ្មានទីណាដែលមានភាពសុខសាន្ត ដូចនៅធ្វើការក្នុងស្រុករបស់យើងនោះទេ បើទោះបីជាបានទទួលប្រាក់ខែខុសគ្នាបន្តិចបន្តួចក្ដី ៕
