ខេត្តបាត់ដំបង ពិធីបញ្ចុះបឋមសិលាបើកការដ្ឋានសាងសង់ គម្រោងពង្រីកប្រព័ន្ធផ្គត់ផ្គង់ទឹកស្អាត ក្នុងខេត្តបាត់ដំបង និងពិធីសម្ពោធសមិទ្ធផលគម្រោងផ្លាស់ប្តូរបណ្តាញចាស់និងពង្រីកនូវបណ្តាញថ្មី របស់រដ្ឋាករទឹកខេត្តបាត់ដំបង ក្រោមជំនួយឥតសំណងរបស់ប្រទេសជប៉ុន ដែលមានតម្លៃ ជាង៣២លាន ដុល្លារអាមេរិក សំរាប់ការសាងសង់នូវ រោងចក្រប្រព្រឹត្តកម្មទឹកស្អាតថ្មីមួយ នៅក្នុងខេត្តបាត់ដំបងនិងមួយទៀតនៅ ខេត្តកំពង់ចាម ត្រូវបានប្រារព្វធ្វើឡើង ក្រោមអធិបតីភាពឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រី ក្រសួងឧស្សាហកម្ម និងសិប្បកម្ម និងវត្តមានពីតំណាង
ប្រទេសជាម្ចាស់ជំនួយ ឯកឧត្តម គូម៉ាម៉ារូ យូជិ ឯកអគ្គរាជទូតវិសាមញ្ញនិងពេញសមត្ថភាពរបស់ប្រទេសជប៉ុន ប្រចាំនៅព្រះរាជាណាចក្រកម្ពុជា។ ឯកឧត្តម ច័ន្ទ សុផល អភិបាលខេត្តបាត់ដំបង បានគូសបញ្ជាក់ថា៖ បច្ចុប្បន្ននេះ អង្គភាពរដ្ឋាករ ទឹកខេត្តបាត់ដំបងមានរោងចក្រផលិតទឹកស្អាតមួយកន្លែងដែលមានសមត្ថភាពផលិត១១.៥២០ម៉ែត្រ ត្រីគុណ បរិមាណទឹកស្អាតផ្គត់ផ្គង់អតិប្បរិមា៩.៦៦៨ម៉ែត្រត្រីគុណក្នុង១ថ្ងៃ គិតជាមធ្យម ៨.៦៤៣ ម៉ែ ត្រត្រីគុណក្នុង១ថ្ងៃ ចំនួនអ្នកប្រើប្រាស់សរុប ១០.៦៣៦ខ្នងផ្ទះ។ឯកឧត្តមបានបន្តទៀតថា ដោយសារ
កំណើនប្រជាជនក្នុងក្រុងបាត់ដំបងជិត១៥ម៉ឺននាក់បានធ្វើឲ្យអត្រានៃការប្រើប្រាស់ទឹកស្អាតគ្របដណ្តប់បានតែ៤០%ប៉ុណ្ណោះ នៃប្រជាជនក្នុងក្រុងទាំងមូល។ ឯកឧត្តម គូម៉ាម៉ារូ យូជិ ឯកអគ្គរាជទូតប្រទេសជប៉ុន ប្រចាំនៅកម្ពុជា បានមានប្រសាសន៍ថា៖ ខ្ញុំ សង្ឃឹមថា៖គម្រោងនេះគ្រោងបញ្ចប់នៅពាក់កណ្តាលឆ្នាំ២០១៦ខាងមុខ នៅពេលដែលគំរោងនេះត្រូវ បានបញ្ចប់នោះ រោងចក្រប្រព្រឹត្តកម្មទឹកស្អាតនៅក្នុងខេត្តបាត់ដំបង នឹងត្រូវបានពង្រីក ការរចែកចាយ ដើម្បីធ្វើឲ្យប្រសើរឡើងនូវស្ថានភាពរស់នៅរបស់ប្រជាជននៅក្នុងតំបន់ដែលគ្របដណ្តប់
ដោយគំរោងមួយនេះ ហើយអត្រាសេវាកម្មផ្គត់ផ្គង់ទឹកស្អាតនៅក្នុងទីរួមខេត្តត្រូវបានរំពឹងទុកថា៖នឹងអាចកើនឡើងដល់៨៤%នៅក្នុងឆ្នាំ២០១៩។ ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងថា៖ នេះគឺ ជាសមិទ្ធផលនៃការអភិវឌ្ឍន៍ ពង្រីកហេដ្ឋារចនាសម្ព័ន្ធក្នុងវិស័យទឹកស្អាតដ៏ធំនិងថ្មីបន្ថែមទៀត ក្រោម ជំនួយហិរញ្ញប្បទានឥតសំណងរបស់រាជរដ្ឋាភិបាលជប៉ុន នៅក្នុង
ខេត្តបាត់ដំបង។ក្នុងនាមរាជរដ្ឋាភិបាលកម្ពុជាទាំងមូល និងជួសមុខឲ្យពលរដ្ឋរស់នៅក្នុងខេត្តទាំង២ (បាត់ដំបង-កំពង់ចាម) សូមសំដែងនូវការដឹងគុណដ៏ជ្រាលជ្រៅជូនចំពោះប្រជាជននិងរាជរដ្ឋាភិបាលជប៉ុន ដែលជានិច្ចជាកាល បានផ្តល់នូវ ជំនួយឥតសំណងដ៏ច្រើនសន្ធឹកសន្ធាប់ដល់ប្រជាជនកម្ពុជា ក្នុងការរួមចំណែកដល់ការអភិវឌ្ឍន៍សេដ្ឋ កិច្ចកម្ពុជា ការលើកកម្ពស់សុខមាលភាព និងកាត់បន្ថយភាពក្រីក្រ តាមរយៈនៃការអភិវឌ្ឍន៍ជាក់ស្តែង នៃគម្រោង ដែលយើងបាននិងកំពុងតែប្រារព្វធ្វើនាថ្ងៃនេះ ដើម្បីជាភស្តុតាងស្រាប់៕./