ព្រះវិហារ៖ ឯកឧត្តម អ៊ុំ ម៉ារ៉ា បានមានប្រសាសន៍ថា យុទ្ធនាការដ៍ធំនេះ ជាប្រវត្តិសាស្ត្រ នៃការអនុវត្តនយោបាយ ចាស់សកម្មភាពថ្មីលើវិស័យដីធ្លី ដែលត្រូវបានផ្តួចផ្តើមឡើង និងដឹកនាំផ្ទាល់ដោយសម្តេចអគ្គមហាសេនាបតីតេជោ ហ៊ុន សែន គឺជាជំហានថ្មីមួយទៀត នៃការកែទំរង់ដីធ្លីដ៍ស៊ីជម្រៅ ដើម្បីដោះស្រាយស្ថានភាព នៃការកាន់កាប់ដីធ្លីឱ្យមានសុវត្ថិភាពរឹងមាំ ធ្វើអោយកសិករមានដីកសិកម្ម ដើម្បីធ្វើអាជីវកម្មលើកកំពស់ជីវភាពរស់នៅ ដែលជាគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិ ។
យុទ្ធនាការនេះបានបង្ហាញអោយឃើញកាន់តែច្បាស់ ពីការយកចិត្តទុកដាក់ខ្ពស់របស់រាជរដ្ឋាភិបាល ក្នុងការងារវិស័យដីធ្លី ស្មារតីទទួលខុសត្រូវរបស់រាជរដ្ឋាភិបាល ចំពោះផលប្រយោជន៍របស់ប្រជាពលរដ្ឋ ជា ពិសេសប្រជាពលរដ្ឋជាកសិករនៅតាមជនបទ និងការប្តេជ្ញាចិត្តរបស់រាជរដ្ឋាភិបាលក្នុងការដោះស្រាយបញ្ហា អសកម្ម និងអវិជ្ជមានជុំវិញបញ្ហាដីធ្លី ។
ឯកឧត្តមបានបន្តទៀតថា ខេត្តព្រះវិហារបានប្រារពពិធីចែកប័ណ្ណកម្មសិទ្ធដីធ្លីជូនបងប្អូនប្រជាពលរដ្ឋ ចំនួន ២៣លើករួចមកហើយ ហើយឯកឧត្តមក៍បានវាយតម្លៃខ្ពស់ចំពោះការខិតខំ នឹងការយកចិត្តទុកដាក់ របស់អាជ្ញាធរពាក់ព័ន្ធគ្រប់លំដាប់ថ្នាក់ ក្នុងការរៀបចំកិច្ចដំណើរការនៃការអនុវត្តនយោបាយចាស់ សកម្មភាព ថ្មីលើវិស័យដីធ្លីរបស់រាជរដ្ឋាភិបាល នៅគ្រប់ក្រុង ស្រុក គោលដៅរបស់ខេត្ត ទៅតាមជំហានការងារ
នីមួយៗ តាំងពីការវាស់វែងទីតាំងតំបន់ដែលមានការពាក់ព័ន្ធ ការវាស់វែងក្បាលដីនិមួយៗ ការស្រង់ទិន្ន័យក្បាលដី ការ បិទផ្សាយជាសាធារណៈនូវទិន្ន័យនៃក្បាលដីទាំងអស់ក្នុងទីតាំងនិមួយៗក្នុងរយៈពេល ៣០ថ្ងៃ សម្រាប់ទុក ពេលអោយម្ចាស់ដី និងអ្នកពាក់ព័ន្ធធ្វើការផ្ទៀងផ្ទាត់ សុំកែតម្រូវទិន្ន័យ រហូតបានបញ្ចប់រយៈពេលបិទផ្សាយ ជាសាធារណៈ និងអាចប្រារពពិធីចែកប័ណ្ណកម្មសិទ្ធជាបន្តបន្ទាប់ផងដែរ ។
ឯកឧត្តម ក៍បានផ្តាំផ្ញើដល់ប្រជាពលរដ្ឋទាំងអស់ ដែលបានទទួលប័ណ្ណកម្មសិទ្ធ ចាប់ពីថ្ងៃនេះតទៅ បងប្អូនទាំងអស់គឺជាម្ចាស់ដីពេញលក្ខណៈ ហើយត្រូវបានការពារដោយច្បាប់ ប្រជាពលរដ្ឋជាម្ចាស់ដីមាន សិទ្ធប្រើប្រាស់អាស្រ័យផល និងចាត់ចែងដីរបស់ខ្លួនផ្តាច់មុខ និងទូលំទូលាយ កុំអោយយកដីនោះទៅប្រើ ប្រាស់ ក្នុងបទណាមួយដែលច្បាប់បានហាមឃាត់ ។
ដោយឡែកប្រជាពលរដ្ឋ គឺពួកគាត់មានការត្រេកអរសប្បាយរីករាយ ដោយបានទទួលប័ណ្ណកម្មសិទ្ធដី ធ្លីស្របច្បាប់ នឹងបានថ្លែងអំណរគុណដល់ថ្នាក់ដឹកនាំគ្រប់លំដាប់ថ្នាក់ ជាពិសេស សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ជកាលសម្តេចតែងតែគិតគូរយកចិត្ត ទុកដាក់ជួយដល់ប្រជាពលរដ្ឋគ្រប់កាលៈទេសៈ ជាក់ស្តែងដូចជាថ្ងៃនេះស្រាប់ ៕ ដោយ ឈឿង ចាន់