ភ្នំពេញ៖ សមាគនារីកម្ពុជា ដើម្បីសន្ដិភាពនិងអភិវឌ្ឍន៍ និងមានសមត្ថភាពគ្រប់គ្រាន់ ដើម្បីចូលរួមអភិវឌ្ឍន៍សង្គមកម្ពុជាឲ្យរីកចម្រើននាថ្ងៃអនាគត ទាំងនៅក្នុងឆាកនយោបាយ សេដ្ឋកិច្ច ពាណិជ្ជកម្ម ការទូត យោធា និងវប្បធម៌ បន្ទាប់សមាជិកសមាគមនារីកម្ពុជា ដើម្បីសន្ដិភាព និងអភិវឌ្ឍន៍ បានទៅទស្សនកិច្ចសិក្សាស្វែងយល់ផ្លាស់ប្ដូរដំណេះដឹង ពីគ្នាទៅវិញទៅមក នៅសាធារណរដ្ឋសង្គម និយមវៀតណាម អស់រយៈពេល៤ថ្ងៃរួចមក។
នេះបើតាមការបញ្ជាក់ឲ្យដឹងពីលោកស្រី ម៉ែន សំអន ឧបនាយរដ្ឋមន្ដ្រី រដ្ឋមន្ដ្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជា ដើម្បីសន្ដិភាព និងអភិវឌ្ឍន៍ក្នុងដំណើរនិវត្ដមកមាតុប្រទេសវិញ កាលពីព្រឹកថ្ងៃទី១៩ ខែមិថុនា ឆ្នាំ២០១៤ នៅអាកាសយានដ្ឋានអន្ដរជាតិភ្នំពេញ ។ លោកស្រីម៉ែន សំអន បានបញ្ជាក់ថា៖ ប្រទេសកម្ពុជា និងវៀតណាម ជាប្រទេសជិតខាង ដែលមានទំនាក់ទំនងកិច្ចសហប្រតិបត្តិការជាប្រពៃណី និងជាយុទ្ធសាស្ត្រដ៏យូលង់មកហើយ។
ប្រទេសទាំងពីរ បានពង្រឹងទំនាក់ទំនង និងកិច្ចសហប្រតិបត្តិការលើគ្រប់វិស័យ ជាពិសេសនយោបាយ ការទូត យោធា និងសេដ្ឋកិច្ច។ ដោយឡែកក្នុងវិស័យសេដ្ឋកិច្ច យើងបានពង្រីកសកម្មភាពពាណិជ្ជកម្ម វិនិយោគ ទេសចរណ៍ និងការទាក់ទងរវាងបណ្តាខេត្តតាមព្រំដែនយ៉ាងសកម្ម។
ទំហំពាណិជ្ជកម្មរវាងប្រទេសទាំងពីរ នៅឆ្នាំ ២០១៣ គឺមាន ៣.៤៣ ពាន់លានដុល្លារ និងគ្រោងកើនដល់ ៥ ពាន់លានដុល្លារនៅឆ្នាំ២០១៥។ វៀតណាមជាប្រទេសដែលដាក់ទុនវិនិយោគធំជាងគេទី៥នៅកម្ពុជា ដែលមកទល់នឹងឆ្នាំ ២០១៣ មានទំហំវិនិយោគ ជាង ៣ ពាន់លានដុល្លារ លើគម្រោងវិនិយោគ១២៨ គម្រោង។ លោកស្រីបានបន្ដទៀតថា៖ សាធារណរដ្ឋសង្គមនិយមវៀតណាមបានផ្តល់នូវការឧបត្ថម្ភ គាំទ្រយ៉ាងច្រើនដែលមិន អាចកាត់ថ្លៃបានដល់កម្ពុជា គ្រប់ដំណាក់កាល។ ដោយឡែកសហព័ន្ធនារីវៀតណាម ក៏បានផ្តល់នូវការគាំទ្រ ទាំងស្មារតី និងសម្ភារៈដល់សមាគមនារីកម្ពុជា ដើម្បីសន្តិភាព និងការអភិវឌ្ឍន៍យ៉ាងច្រើនសន្ធឹកសន្ធាប់។
ជំនួយទាំងនេះបានផ្តល់លទ្ធភាពដល់សមាគមនារីកម្ពុជា ក្នុងការបង្កើនប្រសិទ្ធភាពការងារបណ្តុះបណ្តាល និងការងារអភិវឌ្ឍន៍។ សមិទ្ធផលនៃ កិច្ចសហប្រតិបត្តិការ រវាងសមាគមនារី នៃប្រទេសយើងទាំងពីរពិតជា មិនអាចកាត់ផ្តាច់បានពីការយកចិត្តទុកដាក់និងការឧបត្ថម្ភ គាំទ្រយ៉ាងពេញទំហឹងរបស់ថ្នាក់ដឹកនាំបក្ស និងរដ្ឋាភិបាលនៃប្រទេសយើងទាំងពីរ ដែលជានិច្ចជាកាលតែងចាត់ទុកថា មានតែការរួមសាមគ្គីគ្នាជាធ្លុងមួយ ទេទើបអាចជំនះបានគ្រប់ឧបសគ្គ និងទទួលបានវឌ្ឍនភាព។
ក្នុងដំណើរទស្សនកិច្ចនេះលោកស្រីក៍បានអគុណដល់សមាគមនារីវៀតណាម ចំពោះទំនាក់ទំនង ដ៍ល្អជាមួយគ្នា ក្នុងបំណង ដើម្បីរឹតចំណងមិត្តភាពសហប្រតិបត្តិការរឹងមាំដែល ពីមួយថ្ងៃទៅមួយថ្ងៃកាន់តែចម្រើនទូលំទូលាយ និងស៊ីជម្រៅលើគ្រប់វិស័យ សមាគមនារីនៃប្រទេសយើងទាំងពីរ នឹងខិតខំថែរក្សា ពង្រឹងចំណងសាមគ្គីភាពនេះ ឲ្យស្ថិតស្ថេរយូរអង្វែងសម្រាប់ជាឧត្តមប្រយោជន៍ និងវិបុលភាពរបស់ប្រជាជនយើងទាំងពីរ៕ ដោយ៖ សំរិត