កីឡាករ Kevin-Prince Boateng (ខេវីន ព្រីន បូថេង) បាននិយាយថា រូបគេនិងក្រុមហ្គាណា ទាំងមូលនឹងប្រយុទ្ធដាច់កជើងចោលពេលដែលពួកគេប៉ះអាល្លឺម៉ង់នៅថ្ងៃសៅរ៍នេះ ។ ខ្សែបម្រើដែលមានដើមកំណើតនៅទីក្រុងប៊ែកឡាំងរូបនេះអាចនឹងត្រូវប្រឈមមុខជាមួយប្អូនប្រុសរបស់ខ្លួនគឺ Jerome Boateng (ជើរ៉ូម បូថេង) ពេលដែលក្រុមទាំងពីរប៉ះគ្នាក្នុងទីក្រុង ហ្វរតាឡេហ្សា នៅចុងសប្តាហ៍នេះ ។ ប្រទេសមកពីតំបន់អាហ្វ្រិកមួយនេះបានប្រកួតចាញ់អាមេរិក២-១ក្នុងការប្រកួតលើកដំបូង របស់ខ្លួនហើយ Boateng ជឿជាក់ថា ជំនួបជាមួយអាល្លឺម៉ង់លើកនេះក្រុមមិនអាចភ្លាត់ចាញ់បាន នោះទេព្រោះបើចាញ់ក្រុមនឹងធ្លាក់ ។
កីឡាកររបស់ក្រុម Schalke 04 (ស្កាល់ សូន្យបួន) រូបនេះប្រាប់គេហទំព័រ Bild ថា “វាដូចជា ចម្បាំងអ៊ីចឹង មានមនុស្សជាច្រើនក្នុងទីលានដែលត្រូវប្រយុទ្ធគ្នាហើយយើងត្រូវតែប្រយុទ្ធដល់ទីបញ្ចប់” ។ គួរបញ្ជាក់ថា ការប្រកួតរវាងហ្គាណានិងអាល្លឺម៉ង់នឹងត្រូវធ្វើឡើងនៅថ្ងៃសៅរ៍វេលាម៉ោង២រំលងអាធ្រាត ៕